Meddy yerekanye umukunzi we mu gitaramo yakoreye i Kigali (Amafoto&Video)

Yanditswe na Muvunyi Arsène
Kuya 2 Mutarama 2019 saa 08:40
Yasuwe :
0 0

Umuhanzi w’umunyarwanda uba muri Leta Zunze Ubumwe za Amerika, Ngabo Medard (Meddy), yakoreye igitaramo cy’amateka i Kigali yanerekaniyemo umukunzi we ukomoka muri Ethiopia.

Iki gitaramo cyiswe East African Party kibaye ku nshuro ya 11, cyabaye kuri uyu 01 Mutarama 2019. Cyitabiriwe n’abantu benshi bari buzuye parikingi ya Stade Amahoro, barimo ibyamamare mu ngeri zitandukanye n’abayobozi mu nzego za leta.

Byari ku nshuro ya kabiri mu mateka y’iki gitaramo, umuhanzi umuhanzi w’umunyarwanda atumirwa nk’umuhanzi w’Imena.

Saa kumi n’ebyiri nk’uko byari biteganyijwe, MC Tino yageze ku rubyiniro atangira kuganiriza abafana mu rwenya rwinshi. Ni nako aba DJ barimo Phil Peter bavangaga imiziki. Mu kabeho karinganiye, ikirere cyari kibuditsemo ibicu ubona ko isaka iyo ariyo yose imvura ishobora kwisuka, ikadobya ibirori byari byahuruje abakunda umuziki.

Saa moya n’iminota 20 nibwo itsinda Sebeya Band ryageze ku rubyiniro, ribanza gushyushya ibyuma, bidatinze ritangirana na Victor Rukotana winjiriye ku ndirimbo ye ‘Promise.’

MC Tino yahaye umwanya MC Buryohe yakira Social Mula nk’umuhanzi wa mbere mu bibanze. Indirimbo ye ‘Abanyakigali’ yamamaye muri 2013 niyo yahereyeho, akurikizaho ‘Amahitamo’, ‘Ku Ndunduro’, ‘Humura’, asoreza kuri ‘Super Star’. Abantu bamwe bari bacyinjira, abahageze kare nabo batarashyuha.

Bruce Melodie waririmbye nk’umuhanzi wa kabiri yakiriwe na MC Kate Gustave, agihamagarwa ku rubyiniro ibintu bihindura isura. Indirimbo ‘Tuza’ yafatanyije na Allioni niyo yatangiriyeho, abayizi bafatanya nawe kuyiririmba.

Adahagaritse, yagendaga asimburanye indirimbo ze zirimo ‘Embela Zo’ yakoranye na Sheebah wo muri Uganda, ‘Incwi’, ‘Silibateri’ yakoranye na Jay Polly na ‘Tubivemo’.

Uzandubure iri mu ndirimbo zatumye amenyekana yongereye ubushyuhe mu bafana bari bamaze kugwira cyane cyane mu myanya y’icyuhahiro. Mu ndirimbo ze nka Ndakwanga, Bloca, Ntundize, Ndumiwe abantu bari bishimye ku buryo bugaragara. Izi ndirimbo zirangiye bazimije amatara, urumuri rugaruka Riderman ahagaze ku rubyiniro.

Nta kindi cyari kimuzanye kitari ukwanzika mu ndirimbo bahuriyemo ari zo ‘Ikinyarwanda’ na ‘Nta Kibazo’. Izi zakoze neza ku ndiba y’imitima. Nta gutinda, umugaba mukuru w’Ibisumizi yahise afata urubyiniro, ubundi asubiza abakunzi ba Hip Hop muri 2008, aririmba ‘Ibitendo.’

Yakomereje ku Inyuguti ya R, Nisamehe na Come Back yakoranye na Safi Madiba, agikubitaho Umwana w’Umuhanda yakunzwe muri 2010 abantu bariyamira. Yasoreje kuri ‘Horo’, ubundi amashyi ngo ‘kacikaci’.

Saa tatu n’iminota 10 nibwo MC Sylivie yasimbuye Kate Gustave, aha ikaze DJ Phil Peter na DJ Lenzo bongera kuvanga imiziki. Uyu mukobwa nta mwanya yamazeho, yahise asimburwa na Anita Pendo.

Buravan wabanjirije Meddy yageze ku rubyiniro saa tatu n’iminota 35, aherekejwe n’abacuranzi be bihariye. Indirimbo ye Heaven niyo yahereyeho, akomereza kuri ‘Oya’, ‘Just Dance’, Malaika na Si Belle. Yanyuzagamo akaganiriza abakunzi be ati “ndabizi ko bamwe muri mwe mukundunda, nanjye ndabakunda.”

Ajya kurangiza indirimbo ye ‘Garagaza’ yasabye abari aho gucana udutoroshi twa telefoni zabo, bazishyira mu kirere hahinduka urwererane.

Meddy yageze kuri Stade Amahoro ahaberaga igitaramo saa yine zuzuye. Yari mu modoka ya Toyota Land Cruiser V8 ijya kuba umweru, ari kumwe n’umukunzi we.

DJ Marnaud uri bakunzwe mu Mujyi wa Kigali yahawe akanya abanza kunyuzaho indirimbo ze zigezweho nka Bape na Ribuyu, akomeza kuvanga imiziki ajyanisha n’abacurangaga mu buryo bw’umwimerere.

Saa yine n’iminota 50 nibwo ababyinnyi ba Meddy bageze ku rubyiniro. Adatinze nawe yabasanzeyo yambaye imyenda y’ubururu, umukara n’umweru n’agatambaro mu mutwe, ahera ku ndirimbo ye ‘Mubwire’, yaciye ibintu mbere y’uko ajya muri Amerika.

Indirimbo ya kabiri ‘Igipimo’ yabaye akiyitangira ibyishimo biramurenga arasimbuka, ajya kuririmbira imbere y’abafana. Yakurikijeho ‘Inkoramutima’, biba ubwiza bugiye mu bundi, ashyizeho Ubanza Ngukunda’ na ‘Everthing’, yanafashijwemo na Uncle Austin.

Meddy yanyujijemo afata gitari acuranga Aicha ya Cheb Khaled, Nimuze Tubyine ya Jean Paul Samputu na Burinde Bucya ye bwite.

Yerekanye umukunzi we…

Ubwo yari ageze hagati mu ndirimbo Ntawamusimbura, yerekanye umusore avuga ko basa ariko ntacyo bapfana, yemeza ko asigaye amufata nk’umuvandimwe we.

Iyi ndirimbo itararangira umukunzi wa Meddy ukomoka muri Ethiopia, Mimi Mehfra, uherutse no kwerekanwa mu muryango we yagiye ku rubyiniro amwereka abakunzi be, ubundi ati “mwabonye?”

Uyu mukobwa yishwe n’amasoni, yahise asubira hasi ubundi igitaramo kirakomeza.

Mbere y’uko aririmba ‘Slowly’ yamugize ikimenyabose mu mahanga, DJ Marnaud yasabye abari aho bose gucana amatara ya telephone zabo, ubundi bazimanika mu kirere, bakazerekana bazunguza amaboko iburyo n’ibumoso.

Saa sita nibwo igitaramo cyarangiye, Meddy aririmba indirimbo ye aheruka gushyira hanze ‘Adi Top.’ Abari bahari bose batashye banyuzwe n’umuziki w’umwimerere.

Amaso bari bayahanze urubyiniro nta guhumbya
Anita Pendo yari amaze igihe kinini adakora mu bitaramo binini
Bruce Melody yagaragaje ko ari umuhanga mu kuririmba live
Bruce Melody yakoresheje imbaraga ngo indirimbo ze ziryohere abitabiriye igitaramo
Yanyuzagamo akaririmbisha abakunzi b'indirimbo ze
Bruce Melody na Riderman baririmbanye indirimbo bahuriyemo
Buravan yasimbukaga
Iyo byabaga ngombwa yamanukaga mu mbyino zose akajyayo
Kubyina ni ibintu bye
Abafite telefoni zigezweho babitse urwibutso
Abana bato banyuzwe n'umuziki barabyina karahava
MC Buryohe umenyerewe muri Guma Guma niwe wahamagaye Social Mula
MC Sylvie ntiyatinze ku rubyiniro nyuma yo kuvuga amagambo nyandagazi
MC Tino niwe wabanje gushyushya abafana bari bazindutse
Meddy yaje yiyemeje gukora mu muhogo abantu bagataha bamwirahira
Meddy yanyuzagamo akaririmba ahagaze
Meddy yari yizaniye ababyinnyi bamufasha
Meddy yavuze ko umusore basa ntacyo bapfana yamaze kumubera umuvandimwe
Meddy yerekanye umukunzi we imbere y'imbaga
Riderman yagaruye indirimbo ze za kera abantu baranyurwa
Social Mula niwe wabanje ku rubyiniro indirimbo ye Ma Vie yishimiwe
Social Mula yakoze ibyo yari yarasezeranyije abakunzi b'umuziki
Ubutumwa buri mu ndirimbo yahisemo kububwira uwo bari bicaranye
ubwitabire bwerekanye ko Meddy akunzwe bidasubirwaho
Umukunzi wa Meddy ukomoka muri Ethiopia yari afite amasoni
Umusore usa na Meddy asanzwe ari n'umufana we
Uncle Austin ufitanye indirimbo na Meddy bafatanyije kuziririmba
Uncle Austin yatunguranye muri iki gitaramo
Urukundo yeretswe n'abafana rwamuteye ibinezaneza
Yageze hagati afata gitari aracuranga
Yerekanye umukunzi ubwo yaririmbaga 'Ntawamusimbura'

Kanda hano urebe andi mafoto

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza