NUR:Isimbi Deborah Abiellah yambitswe ikamba rya Miss Campus 2012

NUR:Isimbi Deborah Abiellah yambitswe ikamba rya Miss Campus 2012


Yanditswe kuya 21-01-2012 - Saa 00:09'

Nyuma yo kwiherera hagamijwe kureba Nyampinga wahize abandi mu birori by’Inkera y’abahizi, akanama nkemurampaka katangaje ko Umunyarwandakazi Isimbi Deborah Abiellah ari we wabaye Miss Campus 2012 n’amanota 76,6.

Igisonga cya 2 cya Nyampinga yabaye Umurundikazi Kaneza Arcella, naho igisonga cya 1 aba Umulisa Larissa wari wambaye nimero 2, uyu akaba yanegukanye umwanya wa Nyampinga wakunzwe n’abantu benshi (Miss popularity).

Miss Photogenic we yabaye Umurerwa Ariane wari wambaye nimero 1.

Isimbi Deborah Abiellah wabaye Miss Campus 2012 yagenewe ibihembo bitandukanye birimo Certificat, ibihumbi 300 by’amafaranga y’u Rwanda yatanzwe na Kaminuza, ibikoresho bya SULFO azagenerwa mu gihe kigera ku mwaka, itike y’indege yo kujya mu gihugu cya Kenya yatanzwe na Kalaos Media Design, ikanzu ifite agaciro k’ibihumbi 300 yatanzwe na Francis Zahabu, kwiga amasomo ajyanye no gutwara ibinyabiziga ku buntu mu ishuri rya Campus Driving school, itike y’ingendo 10 Huye-Kigali yatanzwe na Horizon Express, kura amajoro abiri mu cyumba cya VIP muri Hotel Barthos n’ibindi.

Isimbi Deborah Abiellah, wabaye Miss Campus 2012 ni umwana wa Pasiteri Antoine Rutayisire ukundwa n’Abanyarwanda batari bacye kubera inyigisho ze benshi bavuga ko ziba zirimo ubuhanga.

Mu ijambo rye, Pasiteri Rutayisire Antoine yashimiye umukobwa we wabaye Miss Campus 2012 agira ati : “Kuvuka uri mwiza ntacyo uba watanze ariko kuba wabashije gusubiza ibibazo nka biriya ni cyo tugushimira”.

Antoine Rutayisire yakomeje agira ati : “Kujya i Nairobi n’ibindi byose ashatse yabireka bikavunjwamo amafaranga maze agafashishwa umuntu ukeneye gufashwa”.

Abandi bakobwa batsindiye imyanya itandukanye bahawe ibihembo bitandukanye birimo amafaranga ibihumbi 50 yiyongera ku yahawe buri mukobwa witabiriye iki gikorwa, kwiga amasomo yo gutwara ibinyabiziga no gukorera uruhushya rwo gutwara imodoka muri Campus Driving school, ibihembo bitandukanye byatanzwe na Sulfo, ndetse no kurara ijoro rimwe muri Hotel Barthos ku bisonga byombi.

Isimbi Deborah Abiellah akikijwe n'ibisonga bye
Isimbi Deborah Abiellah ari kumwe n'Umuyobozi Mukuru wa Kaminuza Nkuru y'u Rwanda Prof Silas Lwakabamba n'Umuyobozi w'Intara y'Amajyepfo, Guverineri Munyantwali Alphonse
Isimbi Deborah Abiellah, umuryango we, abayobozi ba Kaminuza hamwe n'abayobozi bo mu ntara y'amajyepfo
Pastor Antoine Rutayisire ati : "Kuvuka uri mwiza ntacyo uba watanze ariko kuba wabashije gusubiza ibibazo nka biriya ni cyo tugushimira"
Isimbi Deborah Abiellah ari kumwe n'abayobozi batandukanye bari bitabiriye ibirori
Ashyikirizwa igihembo yagenewe na Kalaos Media Design
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO