Social Mula yataramiye abo muri GS Mère du Verbe yishimirwa bikomeye (Amafoto)

Yanditswe na Akayezu Jean de Dieu
Kuya 9 Kamena 2019 saa 11:33
Yasuwe :
0 0

Umuhanzi Mugwaneza Lambert [Social Mula], umaze guhamya ibigwi mu muziki Nyarwanda yishimiwe bikomeye mu gitaramo yakoreye mu Rwunge rw’Amashuri rwa Nyina wa Jambo i Kibeho mu muhango wo gufungura ku mugaragaro amacumbi yaryubatswemo.

Uyu muhanzi yaririmbye mu muhango wari witabiriwe n’abayobozi mu nzego za leta, abapadiri n’abandi bihaye Imana, abanyeshuri n’ababyeyi barerera muri GS Mère du Verbe.

Ibyumba byatashwe ku wa Gatandatu, tariki ya 8 Kamena 2019, byubatswe binyuze ku Munyarwandakazi Immaculée Ilibagiza wagejeje igitekerezo kuri David Stirling n’umugore we Laurea Stirling cy’uko iri shuri rikeneye inkunga nk’ahantu habereye amabonekerwa ya Bikira Mariya, abana baho bakiga baba ahantu heza.

David Stirling n’umugore we, ni Abanyamerika bafite Umuryango Stirling Foundation usanzwe ugaragara mu bikorwa byo gufasha abatishoboye hirya no hino ku Isi.

Icyiciro cya mbere cyatashywe kigizwe n’inyubako ebyiri zuzuye n’ibikoresho nkenerwa birimo ibitanda, utubati two gushyiramo imyenda, amazi, ubwogero, ubwiherero n’aho gusubiriramo amasomo mu gihe bibaye ngombwa.

Yuzuye atwaye miliyoni $1.7, akabakaba miliyari 1.5Frw, yubatse mu buryo bugezweho agiye gucumbikira abanyeshuri 360.

Abitabiriye uyu muhango basusurukijwe kandi na Korali yo muri GS Mère du Verbe yaririmbye indirimbo zayo zitandukanye. Banataramiwe n’itorero ribyina imbyino gakondo.

Social Mula wari watumiwe nk’umuhanzi uza gutaramira abitabiriye ibi birori yaririmbye indirimbo ze zirimo ‘Ku ndunduro’, ‘Umuturanyi’, ‘Stamina’ n’izindi zishimiwe n’ingeri zose by’umwihariko abanyeshuri.

GS Mère du Verbe izwi mu mateka y’Isi by’umwihariko muri Kiliziya Gatolika kuko ku itariki 28 Ugushyingo 1981, aribwo Bikira Mariya yabonekeye umukobwa witwa Mumureke Alphonsine waryigagamo.

Nyuma y’umwaka umwe, hari ku wa 12 Mutarama 1982, Bikira Mariya yongeye kubonekera uwitwa Mukamazimpaka Anathalie, wakurikiwe Mukangango Marie Claire wabonekewe ku wa 2 Mata 1982.

Icyo gihe biganaga mu ishuri ryisumbuye ry’abakobwa ry’i Kibeho. Muri uko kubonekerwa, babanje kujya batungurwa na Bikira Mariya ariko nyuma akajya ababwira isaha nyayo aza kubabonekeraho ndetse ku karubanda.

Mu butumwa yabahaga buri gihe yabasabaga gusenga, bavuga ishapule y’ububabare burindwi bwa Bikira Mariya, kugira urukundo nyarwo ruzira uburyarya no gukunda Imana.

Amabonekerwa yabo yaje kumara imyaka umunani, akaba ari na yo yamaze igihe kinini ku Isi, kuko ahandi yagiye abera yaba i Fatima muri Portugal na Guadeloupe mu Bufaransa yamaraga igihe gito.

Igihe cyose ngo babonekerwaga na Bikira Mariya wazaga atari mu isura y’umwirabura cyangwa umuzungu, ahubwo ngo yazaga mu isura y’ubwiza budasanzwe [buhebuje], babona ari umukobwa uri mu kigero cy’imyaka iri hagati ya 20 na 30, wambaye ikanzu y’umweru kugera ku birenge, ndetse witeye igishura cy’ubururu kuva ku mutwe kugera ku birenge. Yababonekeraga aturutse Iburengerezuba ahagaze mu kirere muri metero enye.

Social Mula yataramiye abarimo abanyeshuri bo muri GS Mère du Verbe baramwishimira bikomeye
Social Mula yageze ku ndirimbo zirimo iyitwa 'Stamina' abanyeshuri bose bamufasha kuyibyina
Byari ibyishimo bidasanzwe kuri aba banyeshuri bari bataramiwe na Social Mula
Social Mula yaririmbye indirimbo zirimo 'Ku ndunduro' yishimiwe cyane
Social Mula yishimiwe ku rwego rwo hejuru
Social Mula yataramiye muri GS Mère du Verbe, ishuri ryanditse amateka kubera amabonekerwa ya Bikira Mariya yabereye i Kibeho
Umuhanzi Social Mula amaze guhamya ibigwi mu muziki Nyarwanda
Umulisa Ange wahoze ari umugore wa Deejay Pius ni we wayoboye ibirori byo gutaha izi nyubako zo muri GS Mère du Verbe
Meya Habitegeko akaraga umubyimba bya gitore
Umuyobozi w'Akarere ka Nyaruguru, Habitegeko François, yari yizihiwe by'ikirenga
Itorero rya GS Mère du Verbe ryasusurukije abitabiriye ibirori byo gutaha amacumbi
Nyuma y'ibirori habaye n'ubusabane, ababyitabiriye basangira ibigori

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza