Imyambarire mu bimansuro, ubushotoranyi

Imyambarire mu bimansuro, ubushotoranyi


Yanditswe kuya 17-01-2013 - Saa 09:30' na Vénuste Kamanzi

Muri Kigali utubari n’amahoteri biberamo imbyino za nijoro zizwi nk’ikimansuro bimaze kuba byinshi, gusa benshi ntibabyumvaho kimwe kuko n’ubwo bishimisha ababyitabira ku buryo bigenda bikundwa cyane, ariko ntibivugwaho rumwe, kubera ko imyambarire y’abakobwa babyitabira ngo yaba ishotora abagabo.

Akenshi ababyeyi bajya kureba ibimansuro usanga bavuga ko basanzemo nk’abakobwa babo batakiranuka, abasore na bo bakavuga ko basanze ari nk’abakunzi babo batandukana ubwo. Izi mvugo z’abareba ikimansuro zigaragaza ko atari umurimo mwiza abantu bose bibonamo, kabone n’ubwo baza kuwureba ariko abawukora, cyane cyane abakobwa, usanga hamwe na hamwe bafatwa nk’abamazeho.

Mu kimansuro ntibiba byoroshye

Akenshi abantu bakururwa no kureba imibyinire n’imyambarire y’urukoza soni iba ihari.

Umusaza Straton Nsanzabaganwa, umukozi mu nteko y’ururimi n’umuco by’abanyarwanda yatubwiye ko kubera akazi akora, byatumye afata umwanya ajya kwirebera ibimansuro bikomeje kuvugisha benshi, ariko ngo yumijwe no kuhasanga abantu yise ko babashije kwerura (barengeje urugero rukwiye). Agira ati “Aba yaje kubyina mu gitaramo, ese babyina bambaye kuriya kugira ngo imbyino irusheho kuba nziza cyangwa ni ugukurura za ngeso mbi z’abantu? Burya aba ashaka kugira ngo rya jisho ribona ritekereze ibyongibyo, amukurure ashobore kuba yajya no muri gahunda atari yateganyije.”

Akomeza avuga ko n’ubwo ubusanzwe mu muryango w’abantu muri rusange ikibi n’icyiza bigendana, ariko Abanyarwanda bakwiye kurebera hafi ikibi kitaraganza icyiza, kuko icyo gihe umuryango waba urimo urononekara.
Nsanzabaganwa avuga ko iyo mu muco hajemo ibintu nk’ibyo bifatwa nk’ibyirirwa bisakarizwa kuri za internet cyangwa muri za mbuga nkoranyambaga (social network), mu mafilimi cyangwa n’ahandi.

Ati “Usanga ari ibintu by’ibyuririzi birimo kutwinjirana mu gihugu, usanga hatagize ubyamagana bishobora kuzana ikibi kikaganza icyiza. Hari hakwiye kuba uburyo bwo gucunga ibintu bimwe na bimwe byinjira mu gihugu, ndetse hakaba hajya hanafatirwa imyanzuro bimwe na bimwe ku bufatanye na Polisi y’igihugu.”

Aha ariko kandi yashimangiye ko Inteko y’ururimi n’umuco ifite ubushobozi bwo kuvuga ko ikintu runaka kidakwiye cyangwa gikwiye mu muco w’u Rwanda, ndetse ngo mu minsi iri imbere imyanzuro iratangira kujya ifatwa ku bintu bimwe na bimwe.

Uretse ko Muzehe Straton Nsanzabaganwa avuga ko abamansuzi baba bagamije kubyutsa ingeso z’ababareba, usanga ku tubare twinshi n’amahoteri, ahabera ibimansuru, akenshi indaya hafi aho ziba zirekereje kugira ngo na zo zibonere ibiraka. Bityo uburaya bukaba bubonye ikibutiza umurindi, ubwo n’ingaruka zibuturukaho zikarushaho kwiyongera.

Ibimansuro n’ababibyinamo bakabita abamansuzi, ni umuco bivugwa ko waturutse muri Uganda uza hano mu Rwanda, ariko Uganda ngo ubu bageze no ku rwego rw’uko hari ibimansuro bigibwamo n’abifite, aho abakobwa babyina bambaye uko bavutse.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO