Knowless azamurika album ye nshya ku munsi w’abagore

Knowless azamurika album ye nshya ku munsi w’abagore


Yanditswe kuya 11-01-2013 - Saa 16:14' na Vénuste Kamanzi

Knowless aravuga ko yahuje umunsi wo kumurika album ye yise “Uwo ndi we” n’umunsi w’abagore bazaba bizihiza umunsi wabo, kugira ngo azabonereho umwanya wo gutanga ubutumwa bumuri ku mutima nk’umunyarwandakazi ufite icyo amaze kwigezaho.

Mu gihe ubusanzwe Knowless yateganyaga kumurika album ye muri Gashyantare, yabwiye IGIHE ko yaje kubihindura akabishyira tariki 8 Werurwe uyu mwaka, kugira ngo azabashe kwishimana n’abagore bazaba bishimira umunsi wabahariwe uba kuri iyo tariki.

By’umwihariko ariko kuri uwo munsi ngo azaba afite ubutumwa buteye butya : “Turashoboye kandi gushaka ni ko gushobora. Abagore bagiye basubizwa inyuma ariko aho twagiriye ijambo muri iyi Leta, bamenye ko byose bishoboka.”

Akomeza avuga ko igihe kigeze ngo abari n’abategarugori bitinyuke, bagure amarembo y’ubuzima bwabo, bumve ko ntaho bagihejwe bashobora gukora buri kimwe cyose cyabateza imbere, kuko barashoboye kandi asaba n’abari bagenzi be kwihesha agaciro.

Mu gihe nk’iki abagore baba bizihiza umunsi wabo ku Isi yose, mu mwaka ushize ni bwo Miss Jojo na we yamuritse album ye yise “Women” ; ariko Knowless yaduhakaniye ko atigeze yigana igitekerezo cya mugenzi we.
Yagize ati “Ntabwo nari mbizi, ntabwo nabyibukaga rwose ! Gusa ni ibisanzwe na we ni umunyarwandakazi.”

Iyi album yageze hanze tariki 25 Ukuboza 2012, iza no gutangira gucuruzwa mu mpera z’uko kwezi ndetse ngo kugeza ku mugoroba wo kuwa kane tariki 10 Mutarama 2013 ubwo twaganiraga yari imaze kugurishwaho amaCD (copies) zisagaho gato 200.

Umva indirimbo nshya ya Knowless yitwa ’Icyizere’ :

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO