Tekle na Uwera babaye abanyamideri ba mbere mu Rwanda

Tekle na Uwera babaye abanyamideri ba mbere mu Rwanda


Yanditswe kuya 29-12-2012 - Saa 13:29' na Vénuste Kamanzi

Nyuma y’igihe gisaga ukwezi harimo kuba amarushanwa yo gushaka umunyamideri wa mbere mu Rwanda, ryasorejwe i Gikondo ku wa Gatanu tariki 28 Ukuboza 2012, Musie Tekle (ukomoka muri Eritrea) mu bahugu na Uwera Alexia Mupende mu bakobwa bahize abandi.

Ku munsi wa nyuma w’irushanwa ryo kumurika imideri, inkumi 12 n’abasore 12 babanje kujya biyerekana mu ntambuko n’imyambaro bitandukanye, abatanga amanota bakora akazi kabo.

Nyuma yo kwiyereka, itsinda ry’abakemurampaka barimo Makuza Laurent, umuyobozi w’umuco muri Minisiteri y’Umuco na Siporo, Jeanne de Chantal Mugabushaka bakunze kwita Eminente, Mike Karangwa, Francis, Brigitte, Nadine na Jolie bari bagize itsinda ry’abakemurampaka (judges) bagiye kwiherere, bagaruka bemeze abatsinze ku nshuro ya mbere y’iri rushanwa.

Bavuye mu mwiherero, Jeanne de Chantal Mugabushaka Eminente avuga ko byagoranye gutoranya abatsinze kubera ko inkumi n’abasore bose bagaragaje ubuhanga mu gutambuka, ariko hari abahize abandi mu gutorwa , ati “Twakurikije amajwi babonye kuri internet, imitambukire n’ubuhanga bagaragaje mu kwifotoza.”

Abahize abandi mu mideri bose bari hamwe

Mu ba nyamideri b’abahungu, hatangajwe ko Musie Tekle ariwe wabaye uwa mbere , Rwirangira Fabrice aba igisonga cya mbere, Ubaruta Jean Marshal aza ari igisonga cya kabiri.

Mu nkumi, Alexia Uwera Mupende yaje ku isonga, Nimugire Umutoni Sandrine aba igisonga cya mbere naho Umutoniwase Flora aba igisonga cya kabiri.

Abahize abandi bahembwe n’uruganda rwa Sulfo amafaranga asaga miliyoni, ariko n’abandi bagenerwa ishimwe uko ari 24.

Musie Tekle uri mu mwaka wa kabiri muri Kaminuza ya Mount Kenya, akimara gutsinda yashimiye ababyeyi be n’abamutoye, by’umwihariko anavuga ko bimubereye intangiriro nziza mu mwuga wo kumurika imideri.

Umujyanama wa Minisitiri w’umuco na Siporo (MINISPOC), Guillaume Serge Nzabonimana, yavuze ko MINISPOC ishyigikiye ibikorwa byo kumurika imideri, anashimira uburyo byagenze neza kandi ari ubwa mbere biteguwe.

Ati “Byagenze neza, ndashimira PMA yariteguye kuko ryagenze neza, ubirebye ntiwakwemera ko ari ubwa mbere aya marushanwa abaye.”

Akomeza avuga ko kugeza ubu boze bamaze kuba abanyamideli anabasaba gukoresha aya mahirwe babonye yo kuba bihangira imirimo.

Ndayishimiye Jean Claude umuyobozi mukuru wa Premier Model Agency yateguye iri rushanwa ku nshuro yaryo ya mbere, yatangarije IGIHE ko yigiye byinshi muri iri rushanwa, ko agiye gutangira gutegura irushanwa rya kabiri ry’umwaka utaha.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO