Mama Nick wo muri City Maid yagaragaye mu berekanye imideli muri Rwanda Modesty Fashion Show (Amafoto)

Yanditswe na Uwiduhaye Theos
Kuya 8 Ukuboza 2019 saa 06:13
Yasuwe :
0 0

Mukakamanzi Béatha uzwi nka Mama Nick muri filime y’uruhererekane City Maid ica kuri Televiziyo Rwanda ari mu berekanye imideli mu birori bya Rwanda Modesty Fashion Show byabaye ku nshuro ya Kane muri Scheba Hotel iherereye mu Kiyovu.

Ni mu gikorwa cyahurije hamwe abamurika imideli batandukanye bo mu Rwanda batambutse imbere y’abari bitabiriye iki gikorwa gikundwa n’abakunda kureba abikwije. Cyabaye ku wa 7 Ukuboza 2019.

Watereraga amaso mu cyumba cyabereyemo ukabona abantu hafi ya bose nta n’umwe uzinze umunya kubera uburyo buri kanya abanyamideli batambukaga mu buryo bunogeye ijisho.

Abanyamideli batambutse neza mu myambaro yadozwe na Mao wo muri Centrafrique, Gogo Décor, Lii collection, Keza Coutile, Jeanette Design na Mama Khalim Décor.

Umuyobozi mukuru wa Berwa Platinum Ltd itegura ibi birori, Ngabitsinze Abdul Wahab, yavuze ko yishimye cyane bitewe n’uburyo iki gikorwa cyagenze.

Ati “Nishimiye uburyo igitaramo cyagenzemo. Ku nshuro ya kane kuri twe icyo tubonye ni uko tugomba kumenyekanisha igitaramo cyacu. Twishimye ariko umubare twifuzaga ntabwo wagezweho. Abanyarwanda bategereze inshuro ya gatanu izaba imeze neza.”

Abanyamideli bagaragaye muri iki gikorwa babanje guhabwa amahugurwa, ku wa 5 Ukuboza 2019 habaho ikiganiro gifunguye kuri buri wese ku bijyanye n’uruhare rw’abamurika imideli ku muco Nyarwanda, hari hatumiwe inzego za leta zifite umuco mu nshingano.

Rwanda Modesty Fashion ifite intego yo kwigisha Abanyarwanda uburyo bwo kwambara neza buboneye, guteza imbere uruganda rw’imideli mu Rwanda no guteza imbere gahunda ya ‘Made in Rwanda’.

Iki gikorwa cyo kwerekana imideli y’abikwije cyitabirwa n’abasengera mu madini atandukanye mu Rwanda barimo Abayisilamu n’abandi bafata kwikwiza nk’indangagaciro ikomeye kandi ituma umuntu ahorana igitinyiro. Ibi birori bifite intego yo kugaragaza ‘Ubwiza bw’uwikwije’.

Igitaramo cya mbere cya Rwanda Modesty Fashion Show cyabaye mu 2016 kuri Petit Stade Amahoro i Remera, icya kabiri kiba mu 2017 muri Kigali Serena hotel, icya gatatu kibera muri Onomo Hotel.

Abanyamideli batambutse mu myambaro itandukanye yiganjemo iyakorewe mu Rwanda
Audace Willy Mucyo wamamaye muri filime Rwasa ni umwe mu berekanye imideli muri iki gikorwa
Buri munyamideli yatambukaga imbere y'abitariye mu buryo bwe
Chris Junior Rutagengwa wabaye Mister Elegancy 2016 ari mu banyamideli batambutse imbere y'abari bitabiriye iki gikorwa
Herekanwe n'udutimba tw'abageni bishimisha benshi
Ibi birori biba bifite intego yo kwerekana imyambaro yo kwambara ukikwiza
Abakuru bahawe umwanya muri iki gikorwa nabo bayirekana mu myambaro itandukanye
Abantu batandukanye bari bitabiriye iki gikorwa
Audace Willy Mucyo n'umukobwa batambukanye muri ibi birori
Julias Chita Nitegeka niwe wari uyoboye ibi birori
Kwikwiza niyo ntego ya mbere ya Rwanda Modesty Fashion Show
Lii Collections ubwo yatambukanaga n'abanyamideli yari yambitse
Mama Nick wo muri City Maid ni umwe mu berekanye imideri muri iki gikorwa
Nkubito Larson ni umwe mu bagaragaye muri Rwanda Modesty Fashion Show 2019
Uwase Aisha witabiriye Miss Rwanda na Miss Supranational ari mu banyamideli biyerekanye mu birori bya Rwanda Modesty Fashion Show byabaye ku nshuro ya Kane muri Scheba Hotel iherereye mu Kiyovu ku wa 7 Ukuboza 2019
Uwimana Joseph na we muri uyu mwaka ni umwe mu banyamideli bigaragaje muri Rwanda Modesty 2019
Uyu mwaka iki gikorwa cyari gifite umwihariko wo guteza imbere imyambarire yo kwikwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza