Inzu y’imideli ya Gucci yokejwe igitutu bitewe n’igitambaro cyo mu mutwe yashyize ku isoko

Yanditswe na Muvunyi Arsène
Kuya 17 Gicurasi 2019 saa 12:48
Yasuwe :
0 0

Inzu y’imideli ya Gucci yokejwe igitutu n’abantu batandukanye nyuma y’aho ishyize ku isoko igitambaro cyo mu mutwe ‘turban’ gisanzwe cyambarwa n’abo mu idini rya Sikh.

Aba- Sikh ni idini ry’abantu bo mu bice by’Aziya y’Amajyepfo ryakomotse mu gace ka Punjab mu kinyejana cya 15. Ni idini risenga Imana imwe benshi bakunze kuryitiranya na Islam.

Mu mwaka ushize ubwo herekanwaga bwa mbere igitambaro cyo mu mutwe cyo mu bwoko bwa ‘turban’ cyakozwe n’inzu y’imideli ya Gucci, yanenzwe n’abantu benshi biganjemo abo mu idini rya Sikh binubira kuba rwakoresheje umunyamideli w’umuzungu aho gukoresha uwo muri Aziya aho idini rikomoka.

Gucci oingeye kotswa igitutu muri iki cyumweru ubwo iki gitambaro cyiswe “Indy Full Turban” cyacururizwaga ku rubuga rwa Nordstorm ku $800, hagaragara ko cyakorewe umurimbo gusa.

Ibi byafashwe nko gutesha agaciro ukwemera kw’abo mu idini ry’aba Sikh kuko bo bemera ko icyo gitambaro gikwiriye kwambarwa gusa mu bikorwa by’idini kandi nabwo kikambarwa n’umuyoboke wabo gusa.

Kwambara icyo gitambaro muri iri dini bisobanuye kwiyemeza gukurikiza indangagaciro n’amahame y’umuco wabo.

Ihuriro ry’abayoboke ba Sikh ryanditse kuri Twitter ryiyama Gucci ko icyo gitambaro kitakorewe kwambarwa by’umurimbo gusa, ahubwo gifite igisobanuro gikomeye mu myemerere yabo.

Icyo gitambaro ngo ntkiigurishwa byongeye no kuba Gucci iri kukigurisha ku giciro gihanitse babifata nko guheza abakene kandi muri iryo dini bitabaho.

Kuri uyu wa Kane urubuga rwa interineti rwa Nordstorm rwagaragaje ko ibyo bitambaro byamaze gushira n’igiciro nticyongera kugaragara.

Ntacyo Gucci iratangaza ku bijyanye n’icyo gitambaro cya Indy Full Turban.

Ihuriro ry’abasengera mu idini ry’aba Sikh ritangaza ko ku Isi yose rihafite abayoboke bagera kuri miliyoni 25.

Mu bihe bitandukanye abayoboke bo muri iri dini bagiye bahohoterwa bakanicwa bashinjwa kuba mu mitwe y’iterabwoba.

Muri Werurwe uyu mwaka nabwo Gucci yashyizwe ku gitutu n’abantu benshi aho bayshinja ivanguraruhu hagendewe ku mupira ugaragaza isura y’umwirabura yari yasohoye.

Icyo gihe basabye imbabazi bemeza ko batazongera gukora ikosa nk’iryo.

Ihuriro ry’abayoboke ba Sikh ryanditse kuri Twitter ryiyama Gucci ko icyo gitambaro kitakorewe kwambarwa by’umurimbo gusa, ahubwo gifite igisobanuro gikomeye mu myemerere yabo.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza