Ingamba nshya kuri Auddy Kelly wabanje kugorwa no kubangikanya ishuri n’umuziki

Yanditswe na Dusabimana Aimable
Kuya 5 Mutarama 2017 saa 06:34
Yasuwe :
0 0

Umuririmbyi Audace Munyangango umenyerewe mu muziki nka Auddy Kelly ahamya ko yihaye ingamba nshya nyuma yo kugorwa no kubangikanya ibikorwa bya muzika n’amasomo.

Auddy Kelly azwi cyane mu ndirimbo ’Ndakwitegereza’, yakoze izindi zirimo iyitwa ‘Sinzagutererana’ yakoranye na Jody, ‘Ubyumve’, ‘Sinkakubure’ n’izindi zitandukanye.

Auddy Kelly yahawe impamyabumenyi y’icyiciro cya Kabiri cya Kaminuza ku wa 30 Nyakanga 2015, yize mu Ishami ry’Imenyekanishabikorwa (Marketing) muri Kaminuza y’u Rwanda, Ishami rya CBE. Muri iki gihe ari kwiga ibijyanye n’Ibaruramari n’Icungamutungo (Accounting & Finance) mu cyiciro cya gatatu cya Kaminuza.

Mu kiganiro na IGIHE, Auddy Kelly yavuze ko umwaka wa 2017 ashaka kuwukoramo ibikorwa bigomba kuwuhindura ’uw’amateka ku muziki’ we nyuma y’igihe agerageza gushakisha uburyo yawubangikanya n’amasomo yiga mu cyiciro cya gatatu cya Kaminuza (Master’s Degree).

Ati “Nyuma yo kurangiza amasomo y’icyiciro cya kabiri cya Kaminuza nari nijeje abantu ko noneho ngiye kuboneka gusa byabaye ngombwa ko mpita nkomeza Master’s mu buryo buntunguye bituma ntubahiriza ibyo nari nabasezeranyije.”

Yongeye ati “Ubu namaze kumenyera kandi mu by’ukuri ntabwo mvunika cyane nka mbere nkiri mu cyiciro cya kabiri cya Kaminuza. Muri 2017 mbahishiye byinshi hamwe na Rday Entertainment dukorana.”

Auddy Kelly avuga ko mu rwego rwo gutangira 2017 nk’umwaka ugomba kumuhindurira amateka mu muziki agiye guhita asohora amashusho y’indirimbo ’Ruzakugarura’ yaherukaga gushyira ahagaragara.

Amashusho y’iyi ndirimbo azanayamurikira abakunzi be mu gitaramo yateguye abifashijwemo n’itsinda ry’abafana be bitwa “El Familia” kigomba kuba kuri uyu wa Gatanu tariki 6 Mutarama 2017.

Iki gitaramo kizabera kuri Ambassador’s Park i Gikondo guhera ku isaha ya saa kumi n’ebyiri. Auddy Kelly azaba afatanyije n’abandi baririmbyi bamenyerewe barimo Jules Sentore, Jody Phibi na Gabiro Gitari.

By’umwihariko Auddy Kelly avuga ko yatumiye irindi tsinda ryitwa Yemba Voice rigizwe n’abaririmbyi bazamufasha gususurutsa abazitabira iki gitaramo mu buryo bwihariye.

Reba agace gato k’indirimbo Auddy Kelly yaririmbanye na Yemba Voice yitwa Ruzakugarura

Auddy Kelly agiye gukora igitaramo cye cya mbere mu 2017
Auddy Kelly agarukanye imbaraga no gukora birushijeho muri uyu mwaka wa 2017
Audi Kelly yabanje kugorwa no kuvanga umuziki ndetse n'amasomo icyarimwe
Audi Kelly azahurira mu gitaramo n'abandi bahanzi bakunzwe mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza