Intego nshya z’umuhanzi w’umunyempano Jean Luc Ishimwe wifuza gushinga imizi muri muzika

Yanditswe na Dusabimana Aimable
Kuya 18 Mata 2017 saa 02:15
Yasuwe :
0 0

Umuririmbyi Jean Luc Ishimwe uri mu bahanzi bashya bigaragaje nk’abanyempano mu mwaka wa 2016, yafashe ingamba nshya yiteze ko zizamugeza ku rwego rwiza mu muziki w’u Rwanda, akanambutsa ibikorwa bye imbibi z’igihugu.

Ishimwe Jean Luc yazamukiye mu irushanwa ryo gufasha abafite impano idasanzwe yo kuririmba ryateguwe na King James. Uyu muhanzi ukiri muto yakomeje kwigaragaza mu ndirimbo zitandukanye zakiriwe neza n’abakurikira muzika y’u Rwanda.

Yaririmbye indirimbo zitandukanye zirimo iyitwa ’Uri Uwanjye’, ’Nimpagera’, ’Uze Njye Nkomora’, ’Urumuri’ ndetse n’iyo yasohoye yitwa ’Narahindutse’ ivuga inkuru mpamo y’umugabo wahinduriwe imico n’umukobwa wari inshuti ye isanzwe akamukura mu biyobyabwenge n’izindi ngeso mbi zari zaramubase nyuma bakarushinga.

Mu kiganiro yagiranye na IGIHE nyuma yo gushyira hanze iyi ndirimbo, Jean Luc Ishimwe, yavuze ko ari kugerageza uburyo bwose bushoboka bwo kuzamura urwego umuziki we uriho yongeraho ko gukora umuziki ucuranzwe mu buryo bwa Live ndetse no kubakira ku mwihariko w’umuco w’Igihugu ari bimwe mu byo ashaka kwibandaho mu minsi iri imbere.

Ati "Zimwe mu ntwaro numva nkwiriye kwifashisha cyane ni umuziki wa Live kuko usanga ari wo uramba cyane. Ubu ndi gukomeza kurushaho kongera ubumenyi bwawo no kwita ku bihangano bicuranze mu buryo bwa gakondo yacu nk’umwihariko w’Igihugu cyanyibarutse. Naje mu muziki atari iby’igihe gito, ahubwo hari gahunda ndende mfite irimo no kuba nageza umuziki nkora ku rwego rukomeye byaba ngombwa ukanambuka imbibi."

Ishimwe azwi cyane nk’umubyinnyi kuva mu mashuri yisumbuye aho yize muri Groupe Scolaire Officiel de Butare (GSOB) Indatwa n’Inkesha no muri College Ami des Enfants.

Uyu muhanzi avuga ko ibyo kuririmba yabyinjiyemo yiga muri Uganda muri St Lawrence London College aho yabaye umuyobozi wa Korali mu Kiliziya nyuma abamwumvise aririmba bamugira inama yo kwinjira mu buhanzi ari nabwo yatangiye kubigerageza mu 2016.

Muri iki gihe umuziki akora awufatanya n’amasomo aho yiga mu Ishami ry’Ubukungu n’Ubucuruzi (Business & Economics) mu mwaka wa gatatu muri Kaminuza y’u Rwanda, Ishami rya CBE [yahoze yitwa SFB].

Yifuza ko mu mwaka wa 2020 azaba ari umuhanzi uri ku rwego rwo gutegura ibitaramo bizenguruka igihugu (tour) mu turere twose abona abafana benshi bakunda ibihangano bye.

Kanda hano wumve ‘Narahindutse’ ya Jean Luc Ishimwe

Jean Luc Ishimwe yigaragaje nk’umunyempano ukomeye mu 2016
Uyu musore w'imyaka 21 afite intego zo gukora umuziki gakondo
Ishimwe ni umwe mu baririmbyi bashya bagaragaza ubuhanga mu miririmbire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza