Asinah yashyize hanze amashusho y’indirimbo ‘Mapenzi’ iri mu Giswahili

Yanditswe na Munyengabe Murungi Sabin
Kuya 23 Mutarama 2017 saa 09:23
Yasuwe :
1 8

Mukasine Asinah, umuhanzi mu njyana ya Dancehall yasohoye amashusho y’indirimbo yise ‘Mapenzi’ yakoze mu rurimi rw’Igiswahili, ije imbere y’umushinga ukomeye afitanye n’umwe mu bahanzi bakomeye muri Afurika.

Asinah amaze umwaka umwe mu ruhando rwa muzika, yatangiye aririmba mu njyana ya Dancehall ndetse yavuze ko indirimbo zose azahanga zigomba kugira akarango k’umuziki w’ubu bwoko kuko ngo yasanze ufite isoko ryagutse.

Uyu mukobwa yaherukaga gukora amashusho y’indirimbo yise ‘Happy Time’ yatunganyijwe na Producer uba mu Bubiligi. Yasohoye inshyashya yise ‘Mapenzi’ iri mu rurimi rw’Igiswahili ndetse ngo niyo atangiriyeho mu guhindura uburyo bw’imirirmbire ye yibanda cyane ku ndimi z’amahanga mu gushaka umuyoboro yanyuzamo umuziki we akamenyekana hanze y’u Rwanda.

Yagize ati “Ni byinshi nifuza kugera muri 2017, by’umwihariko ndashaka kuririmba cyane mu ndimi zivugwa mu bindi bihugu kugira ngo ndebe ko umubare w’abumva ibyo ndirimba wakwiyongera.”

Asinah yanavuze ko nyuma yo gusohora amashusho ya ‘Mapenzi’ hari undi mushinga w’indirimbo ateganya kuzashyira hanze mu minsi iri imbere. Yavuze ko afite indi mishinga ikomeye ateganya kuzajya gukorera hanze y’u Rwanda gusa ngo ntiyatangaza byeruye abahanzi bo hanze azakorana na bo mu gihe bataranoza amasezerano.

Ati “Navuganye n’abantu bakomeye bashaka kumfasha mu muziki wanjye, hari ibyo turi kunoza mbere y’uko njyayo […] Ntabwo nahita mvuga uko bimeze kuko bitararangira ariko byose nzabitangaza abafana babimenye.”

Reba amashusho ya Mapenzi, indirimbo nshya ya Asinah


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza