Uburakari n’imvugo ikarishye kuri Asinah ugiye guhishura amabanga ye na Riderman

Yanditswe na Munyengabe Murungi Sabin
Kuya 28 Kamena 2016 saa 01:10
Yasuwe :
0 0

Riderman yikomye Asinah amusaba kutazongera guhirahira amuvuga mu izina no mu binyamakuru, umukobwa mu gusubiza yavuganye uburakari bukomeye ko ibibazo byavutse hagati yabo bizasozwa no gushyira hanze ukuri kutamenywe.

Icyenyegeje umuriro hagati ya Riderman na Asinah bahoze bakundana, ni amagambo uyu mukobwa aherutse gutangaza ajora indirimbo ‘G.O.O.M.S’ y’uyu muraperi ayishinja guhonyora uburenganzira bw’umugore no kubiba ihohoterwa rikorerwa igitsinagore.

Ibi byarakaje Riderman cyane kugeza ubwo yavugiye mu itangazamakuru ku nshuro ya mbere kuva batandukana yerura ko ‘arambiwe inkuru n’amagambo Asinah amuvugaho kuko ngo bibuza amahwemo umuryango we’.

Mu gusubiza, Asinah wariye karungu yasabye Riderman kutirengagiza ‘ukuri guhishe hagati yabo, kutigeze kumenyekana ari nayo mvano y’ibibazo byose bivugwa’. Yavuze ko ibibazo byabo bombi bizarangira ashyize amabanga yose hanze ari nayo azingiyemo ibyo Riderman yita ‘guteza ibibazo umuryango’.

Yagize ati “Namubwira ngo atuze duhangane n’ibi bibazo kuko biri kuri twembi, ntabwo byahita bipfa kurangira gutyo ngo kuko yankanze ngo ndi kwibasira umuryango we. Nanyumva navuze umuryango we azanjyanye mu nkiko, ariko namvuga nanjye nzamuvuga.”

Riderman yasabye Asinah kutongera kumuvugaho mu itangazamakuru ryo mu Rwanda ngo kuko bibuza umudendezo umuryango bikanabangamira cyane urugo rwe. Asinah avuga ko ibibavugwaho mu itangazamakuru umusaruro wabyo bawusangiye bombi.

Ati “Uburyo yumva abangamiwemo ni bwo buryo nanjye mbangamiwemo cyane ko itangazamakuru ari we warinzanyemo. Ntakwiye kumva ko ari njye kibazo, na we ni ikibazo.”

Ikibazo cyabujije umudendezo imiryango

Riderman yabwiye Isango Star ko aho bigeze yananiwe gukomeza guceceka mu gihe Asinah akomeje kubuza amahwemo umuryango we. Undi ati “Ibyo avuga byo kwataka umuryango we, singera iwe ndetse n’iwabo sinkihakandagira ashakire ibibazo ahandi.”

Riderman na we ati “Mu minsi ishize yaravuze ngo njye n’umugore wanjye ntabwo tuzarambana, ndaceceka birahita, nyuma we na Neg G The General bakora indirimbo avuga ngo umugore wanjye yazaga iwanjye kumesa imyenda, icyo kirahita ndaceceka, muri uyu mwanya ageze ku rwego rwo kwandikira abakoresha banjye aho nabonye akazi ngo nimumwirukane.”

Asinah uherutse kwinjira mu muziki ati “Kuvuga ko namwibasiye mu ndirimbo arandenganya, kiriya gitero kivuga ku mugore we cyaririmbwe na Neg G, ni we akwiye kubibaza. Njyewe yandirimbye gake?”

Yongeraho ati “Yatangiye kundirimba kera akimbeshya ko dukundana, izo yandirimbyemo zirazwi. Indirimbo yandirimbyemo ni nyinshi, nanjye naracecetse ndamureka.

Intambara yo guterana amagambo hagati ya Asinah na Riderman imaze igihe gito itangiye mu itangazamakuru. Bakundanye imyaka umunani ndetse nta wapfaga kumenya ibyiza n’ibibi byabaga hagati yabo uretse mu minsi ya nyuma y’urukundo rwabo ubwo byasakaye ko bateranye ibipfunsi urukundo rugashirira aho.

Asinah agiye gushyira hanze ibyahishwe...

Asinah avuga ko yiteguye gushyira hanze amabanga y’ibyahishwe hagati ye na Riderman ndetse ngo ni cyo kintu cyonyine kizarangiza ibibazo byose. Yavuze ko ukuri nyako kuzamenyakana umunsi azerura akerekana umuzi w’ibyo bapfa bizwi na bo bombi.

Ati “Nanjye simbyishimiye kuba navugwa muri ubu buryo, sinjye wabyiteye we azi imvo n’imvano ya byose. Kuvuga ngo ndamubangamiye, ari kwirengagiza uburyo ambangamiyemo. Nijye uzi uburyo ambangamira kandi nabyo nabishaka nzabishyira hanze biherekejwe n’ibimenyetso bifatika. Kubihisha nibyo bituma mbangamirwa kurushaho.”

Asinah yiteguye gushyira hanze amabanga ye na Riderman

Yongeyeho ko adashotora Riderman ahubwo ko ibiri kuvugwa ari inkurikizi z’ibyabaye hagati yabo bityo ko bizashira bikemuwe na bo ubwabo.

Ati “Kuvugango namushotoye mvuga ku ndirimbo ye nshaka kumwicira isoko ry’ibiraka afite arabeshya. Navuze ku ndirimbo ye nenga amashusho yayo. Ibyo avuga ngo ndashaka kumubuza akazi muri Profemmes, ni urwitwazo, arashaka kwerekana ko ababaye nyamara njye mbabaye kumurusha.”

Asinah na M-Izzo bahoze ari inshuti magara za Riderman, ubu ntibagicana uwaka. Iyi foto yafashwe muri 2011
Asinah na Riderman bakundanye imyaka umunani batandukana ku mpamvu itaramenyekana kugeza ubu

Muri ’NDAKABYA’ ngo ni Asinah wavugwaga?

Muri ’GAME IS OVER’ ni Riderman uvugwa?

Inkuru irambuye ku byaranze urukundo rwa Riderman na Asinah.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza