Knowless mu bahatanira igihembo muri Kora Awards 2016

Yanditswe na Munyengabe Murungi Sabin
Kuya 4 Ukuboza 2015 saa 08:25
Yasuwe :
0 0

Urugendo rwa Knowless muri muzika ruri gufata indi ntera; ni we munyarwanda rukumbi watoranyijwe mu bahatanira ibihembo muri Kora Awards 2016.

Umwaka wa 2015 wabaye uw’ishya n’ihirwe kuri Knowless kuva mu ntangiriro kugeza magingo aya.

Usibye kuba yaregukanye irushanwa rya PGGSS 5, muri uyu mwaka yanakoranye indirimbo n’abahanzi bakomeye nk’Umunya-Zambia Roberto, akorera amashusho y’indirimbo ze mu bihugu byo hanze nka Dubai na Zanzibar, ariko igisumbye ibindi, kuri ubu yabashije kuza mu bahanzi bake bitwaye neza kurusha abandi muri Afurika nzima.

“Peke Yangu”, indirimbo Knowless yaririmbye mu rurirmi rw’Igishwahili, niyo yamubashishije kuza ku rutonde rw’abahanzi b’ibihangange muri Afurika bitwaye neza bazatoranywamo abazahembwa muri Kora Awards 2016 izabera Windhoek muri Namibia tariki 20 Werurwe 2016.

Umuhanzi Butera Knowless akimara kumenya ko ari mu bahatanira ibihembo muri Kora Awards, yihutiye gusangiza abakunzi be iyo nkuru nziza ndetse anabasaba kumushyigikira.

Abinyujije kuri Instagram yagize ati “Nshuti bavandimwe nejejwe no kubamenyesha ko natoranyijwe mu bazahatana muri Kora Awards 2016. Ndashimira buri umwe wabigizemo uruhare.”

Knowless ari mu cyiciro kitoroshye kuko ahanganye n’abahanzi bafite amazina akomeye mu muziki wa Afurika.

Mu cyiciro cy’umuhanzi w’umugore witwaye neza kurusha abandi mu Karere k’Uburasirazuba (Best Female- East Africa) Knowless ahatanye na Juliana(Uganda), Vanessa Mdee(Tanzania), Victoria Kimani(Kenya), Irene Ntale(Uganda) ndetse na Avril Nyambura(Kenya).

Urubuga rwa Kora Awards rwatangaje ko ibi birori biteganyijwe kuzaba ku itariki 20 Werurwe 2016 bikabera mu mujyi wa Windheok muri Namibia.

Kuva KORA Awards zatangira gutangwa mu mwaka w’1996, Jean Paul Samputu ni we Munyarwanda rukumbi wegukanyemo igihembo. Hari mu mwaka wa 2003 ubwo yahabwaga igihembo cy’umuhanzi w’indirimbo gakondo muri Afurika kubera indirimbo ‘Nyaruguru’.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza