Noriva arishyuza Dream Boyz imyenda yo mu myaka irenga ibiri ishize

Yanditswe na Dean Irak
Kuya 23 Kamena 2013 saa 02:01
Yasuwe :
0 0

Kuva aho batangiye kugaragariza ko bari gukorana na Kina Music, abasore Platini na TMC bagize itsinda rya Dream Boyz bugarijwe n’igitutu cya Ndicunguye Olivier uzwi ku izina rya Noriva uvuga ko batatiye igihango bari bafitanye na Studio bamenyekaniyemo yitwa Dream Records. Gusa Dream Boyz bo bavuga ko nta masezerano bigeze basinyana nawe.
Aganira na Radio Voice of Africa, Noriva, yavuze ko afite amasezerano yanditse basinyanye na Dream Boyz yemeza ko ibikorwa byose bibyara inyungu Dream (...)

Kuva aho batangiye kugaragariza ko bari gukorana na Kina Music, abasore Platini na TMC bagize itsinda rya Dream Boyz bugarijwe n’igitutu cya Ndicunguye Olivier uzwi ku izina rya Noriva uvuga ko batatiye igihango bari bafitanye na Studio bamenyekaniyemo yitwa Dream Records. Gusa Dream Boyz bo bavuga ko nta masezerano bigeze basinyana nawe.

Aganira na Radio Voice of Africa, Noriva, yavuze ko afite amasezerano yanditse basinyanye na Dream Boyz yemeza ko ibikorwa byose bibyara inyungu Dream Records igomba kubigiraho uruhare.

Yagize ati “Nta wutazi ko Dream Boyz yavukiye muri Dream Records, hari ibyo twari twaravuganye mbere ariko ntabwo bigeze babyubahiriza. Biri no mu nyandiko ariko bagiye babyirengagiza. Iyo kontaro ihindutse ni byiza ko mwicara mukayahindura ariko bo ntabwo nigeze mbabona ngo bampakanire. Nabo barabizi ko hari impuzandengo bagombaga kumpa ku kintu cyose cya Dream Boyz binjije, bagombaga kunyishyurira ibyo nabakoreye kuko nanababereye umujyanama mu gihe kingana hafi umwaka.”

Noriva anongeraho ko atifuzaga cyane amafaranga, ahubwo ko Dream Boyz bari kugira uruhare mu kurushaho kwamamaza iyi studio mu bikorwa byose bagiyemo.

Ku ruhande rwa Dream Boyz, Platini yavuze ko icyo ari ikinyoma cyambaye ubusa kuko ngo nta kontaro bigeze basinyana. Yagize ati “Sha ni ukuri kw’Imana yo mu Ijuru ndarahiye ibyo bintu ntabwo ari byo. Mu 2009 yaratubwiye ngo ndashaka kubasinyisha twe tumusaba ko studio yitwa Dream Records ariko studio ye yaramenyekanye. Iyo kontaro niba ihari nayibereke.”

Platini yongeraho ko ahubwo ari Noriva wakwiye kubishyura kuko ngo Dream Boyz ari yo yamenyekanishije iyo studio.

Ati “Sinzi impamvu abantu basigaye birukankira ku maradiyo kandi amaradiyo atari inkiko. Kuki twebwe atabitubwiye? Kugeza n’ubu ntacyo yatubwiye. Natwegere atubwire ikintu ashaka. Ariko kuki abantu banga umuntu wimereye neza? Ni ibintu twumvikanye mu magambo. Ahubwo yakwiye no gutegura agahembo akavuga ati ‘Dream Boyz kuko twamenyekanishije studio ye, ariko nta n’ako dushaka’.”

YabaProducer Junior na Lick Lick bazi imikoranire y’aba bahanzi na Noriva bavuga ko ayo masezerano nta yahari nk’uko Dream Boyz ibivuga.

Muyoboke wari umujyanama wa Dream Boyz muri icyo gihe we yagize ati “Ngitangira gukorana na Dream Boyz, uwo mugabo yangejejeho icyo kibazo ariko musaba ayo masezerano arayabura, ibyo mbifata nko gusebanya.”

Dream Boyz ntirasinya ku mugaragaro muri Kina Music, ariko bigaragara ko mu gihe cya vuba izasinyamo kuko hari ibihangano bamaze gukorerwa n’iyi nzu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza