Kitoko ari kwiga ibijyanye na Politiki mu Bwongereza

Yanditswe na

Bukuru JC.

Kuya 4 Ukwakira 2014 saa 08:07
Yasuwe :
0 0

Kitoko Bibarwa, umuhanzi wubatse izina mu muziki w’injyana ya Afrobeat mu Rwanda, ari gukurikirana amasomo arebana na Politiki mu Bwongereza. Uyu muhanzi ufite igitaramo mu Burundi azaririmbanamo na Kidum ku itariki ya 10 Ukwakira, yabwiye IGIHE ko hatagize igihinduka yazagera mu Rwanda hagati y’itariki ya 12 na 13 Ukwakira. Kitoko yabwiye IGIHE ko azamara iminsi mike mu Rwanda kuko mu Bwongereza bari mu gihe cy’amasomo. Yagize ati “Hatagize igihinduka nzagera mu Rwanda muri matariki ya 12 (...)

Kitoko Bibarwa, umuhanzi wubatse izina mu muziki w’injyana ya Afrobeat mu Rwanda, ari gukurikirana amasomo arebana na Politiki mu Bwongereza.

Uyu muhanzi ufite igitaramo mu Burundi azaririmbanamo na Kidum ku itariki ya 10 Ukwakira, yabwiye IGIHE ko hatagize igihinduka yazagera mu Rwanda hagati y’itariki ya 12 na 13 Ukwakira. Kitoko yabwiye IGIHE ko azamara iminsi mike mu Rwanda kuko mu Bwongereza bari mu gihe cy’amasomo.

Yagize ati “Hatagize igihinduka nzagera mu Rwanda muri matariki ya 12 cyangwa 13 mvuye i Burundi mu gitaramo natumiwemo na Brarudi hamwe na Kidum, kuko inaha turi mu masomo, ntabwo nzatinda aho, nzasura umuryango”

Abajijwe amasomo ari gukurikirana, Kitoko yavuze ko ari kwigira muri Kaminuza ya London South Bank University ibijyanye na Politiki.

Yagize ati “Nageze inaha nsanga mbere yo kujya muri Kaminuza bisaba kubanza kwihugura mu ndimi, nabanje gufata umwaka niga indimi, inaha umwaka utangira mu kwa Cyenda ukarangira mu kwa Karindwi, ubu twatangiye umwaka ndi kwiga ibijyanye na Politiki”

Kwiga indimi byahaye Kitoko umwanya wo gukurikirana n’andi masomo ya muzika. Ati “Kuko inaha biga amasaha make ni iminsi itatu gusa mu Cyumweru, nahise nshaka uburyo nakwiga n’umuziki mu masaha ya nijoro. Ubu namaze kubona impamyabushobozi ku bintu bijyanye n’umuziki nakoreye mu gihe cy’umwaka, nize ibintu bijyanye no gukoresha ijwi, kwandika indirimbo no kuzisoma kuri muhundwanota n’ibindi.”

Abajijwe niba ntacyo yumva yasangiza abiga mu ishuri rya muzika riheruka gufungurwa mu Rwanda, Kitoko yavuze ko hari byinshi yungutse ku buryo aramutse aje afite umwanya uhagije atabura icyo yungura abaryigamo.

Ku birebana n’umuziki we by’umwihariko Kitoko ari gutegura album nshya ariko yirinda kugira byinshi ayitangazaho kuko hari ibyo atarashyira ku murongo.

Yagize ati “Mfite indirimbo nshya, hari album ndi gutegura ariko igihe cyo kubivugaho birambuye ntikiragera, abafana banjye bategerezaho gato”.

Kitoko yagiye mu Bwongereza kuwa 29 Werurwe 2013 ku mpamvu z’amasomo ya Kaminuza. Mbere yo kuyatangira yabanje gufata amasomo y’indimi nk’uko yabitangaje. Yavuze ko nyuma y’amasomo azagaruka mu Rwanda kubera urukundo arukunda hamwe n’Abanyarwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza