Umuhanzi Kizito Mihigo ku cyicaro cya Fondation ye KMP, yakiriye abanyeshuri 12 bo mu ishuri rya Woonsoket muri Leta ya Rhode Island yo muri Leta Zunze Ubumwe za Amerika (USA), ku wa Gatanu tariki ya 19 Mata 2013.

Kizito Mihigo yatangarije IGIHE ko abo banyeshuri bari baje gusura ibikorwa bya Fondation KMP ikora byo kubaka amahoro binyuze mu buhanzi.

Mu kiganiro cy’isaha imwe n’igice, Kizito Mihigo yabahaye ubuhamya bw’ubuzima yabayemo muri Jenoside, n’uburyo yaje gutsinda umujinya mubi yari yifitemo, akiyemeza kuba umukozi w’ubwiyunge n’amahoro mu banyarwanda.

Kizito yashimiye abo banyeshuri n’abarimu babo, kuko baje mu gihe cyo kwibuka Jenoside yakorewe Abatutsi, kuko kuri we bituma bumva neza ubutumwa n’inshingano bya Fondation KMP.

Mu bibazo byabajijwe harimo ikijyanye n’imikoranire ya KMP n’ubuyobozi bwa Leta y’u Rwanda, Kizito Mihigo yababwiye ukuntu hari imikoranire myiza, kuko u Rwanda rufite amahirwe yo kugira ubuyobozi bwarwanyije kwihorera ahubwo bukimika umuco w’ubwiyunge n’ubumwe mu banyarwanda, buha umwanya imbabazi no kuvugisha ukuri nyuma ya Jenoside.

Abanyeshuri bavuze ko bifuza kuzagaruka bakitabira igikorwa cya Fondation KMP, kandi basaba ko indirimbo za Kizito Mihigo zashyirwa mu cyongereza nabo bakajya bazumva mu ishuri ryabo.

Abarimu bari baherekeje abo banyeshuri bavuze ko bababajwe cyane na Jenoside yabaye mu Rwanda, ariko ko na none bashimishwa no kubona mu bayirokotse harimo abafata iya mbere mu gukora ubutumwa bw’Amahoro. Bavuze ko ibyo bumvise bizabafasha kwigisha abanyeshuri babo ibijyanye n’amateka y’abantu muri rusange, cyane cyane ibijyanye no kubaka ubwiyunge n’amahoro mu bihugu byabayemo intambara n’ubwicanyi

Kizito Mihigo aganira n'abanyeshuri ba Woonsoket ryo muri USA

Abarimu b'abanyeshuri b'Abanyamerika basuye Fondation KMP basobanurirwa ubutuma itanga

Kizito Mihigo n'Abanyamerika basuye Fondation ye

Abanyeshuri bishimye ubutumwa KMP itanga