Kizito Mihigo na Fondation ye bataramiye amashuri yisumbuye yo mu karere ka Musanze

Kuwa 26 Gicurasi 2012, umuhanzi Kizito Mihigo aherekejwe n’abanyamuryango ba Fondasiyo KMP, bataramiye muri Stade UBWOROHERANE y’akarere ka Musanze, ahari hahuriye ibigo by’amashuri cumi na bitatu (13). Ayo mashuri yari yaturutse mu mirenge ya Gitinda, Karinzi, Cyuve, Bisate, Kampanga, Muhoza, Kabere, Muko, Musanze, Tero, Nkurura na Nyakinama.

Ibi byakozwe muri gahunda yatangijwe mu mu mpera z’umwaka ushize wa 2011, ubwo Fondation KMP (Kizito Mihigo pour la Paix – Kizito Mihigo for Peace) yatangizagaumushinga yise “Inkunga y’Ubuhanzi mu burezi no mu burere mboneragihugu”. Ni ibitaramo iyi fondasiyo igenda ikorera hirya no hino mu mashuri yisumbuye yo mu Rwanda, bigamije gukangurira urubyiruko indangagaciro zo gukunda igihugu, z’Ubumwe n’Ubwiyunge, agaciro ka muntu n’ubutagoma nyuma ya Jenoside yakorewe abatutsi.

Uko igitaramo cyagenze :

Igitaramo cyatangiye i saa cyenda na mirongo itatu n’umwe z’umugoroba (15h31), gitangizwa n’ijambo ry’ikaze ry’umuyobozi (Mayor) w’Akarere ka Musanze, Madamu Mpebyemungu Winifrida. Mayor yahaye ikaze Fondation KMP kandi asaba urubyiruko rwa Musanze ko rwayifataho urugero. Yaboneyeho no gutanga ubutumwa bwo kwirinda ibiyobyabwenge mu rubyiruko. Nyuma y’iryo jambo ry’ikaze, umuhanzi Kizito Mihigo yafashe umwanya aririmba indirimbo ze, ahereye ku zo kwibuka.

Nk’uko bisanzwe, uyu muhanzi mbere yo kuririmba, akunze kuvuga impamvu yamuteye guhimba indirimbo iyi n’iyi, ndetse akaboneraho no gusobanura ubutumwa yashatse gutangamo. Muri iki gitaramo Kizito yahereye ku ndirimbo zo kwibuka, avuga ko kwibuka bikwiye kubanziriza indi mishinga yose igihugu gifite, kuko turamutse tutibutse aho tuva, n’ibyo tugeraho byose bishobora kongera bigahirima.

Yavuze kandi ko abantu bakora umurimo wo gutanga ubutumwa bwo kwiyunga kw’Abanyarwanda, bari bakwiye guhera ku butumwa bwo kwibuka, ndetse bakarwanya ikinyoma gishobora kuza kigamije gutoba ayo mateka. Aha by’umwihariko, Kizito yatinze cyane ku butumwa bwo kurwanya ikinyoma kivugwa ku mateka y’u Rwanda, cyane cyane mbere yo kuririmba indirimbo “Twanze Gutoberwa Amateka”.

Nyuma ya Twanze gutoberwa amateka, hakurikiyeho umuvugo wa Tuyisenge Aimé Valens, umusizi umaze kumenyekana cyane mu Rwanda kubera imivugo myinshi yagiye ahanga cyane cyane mu gihe cyo kwibuka Jenoside yakorewe abatutsi. Muri iki gitaramo, Aimé Valens yavuze umuvugo yise : inyuma y’ubugi hari ubuki.

Nyuma ya Aimé Valens, Kizito Mihigo yagarukanye indirimbo ebyiri : “Tugire umutima wa kimuntu” (iyi yavuze ko yayihimbye agamije gukangurira Abanyarwanda kwita ku bakomerekejwe na Jenoside) na “Isomo twasigiwe na Jenoside” (Yahimbiye kwibuka ku nshuro ya 18).

Izi ndirimbo zakurikiwe n’ikinamico ntoya yahimbwe n’abanyamuryan go ba Fondation KMP ari nabo bayikinnye. Iyo kinamico ntoya (sketch), bayise “Twese Tuva Umutuku”.

Muri uyu mukino, havugwamo inkuru y’umugororwa wakoraga imirimo nsimburagifungo, akaza gukora impanuka, maze igihe yari kwa muganga, aza guhabwa amaraso n’umwana wacitse ku icumu. Uwo mwana wamuhaye amaraso ndetse, ngo yabikoze azi neza ko uwo murwayi yari yaragize uruhare mu kwicwa kw’ababyeyi be. Ubutumwa bw’imbabazi buri muri uyu mukino buri mu bintu byatangaje abantu bari bateraniye muri stade “Ubworoherane”.

Nyuma y’uyu mukino, Kizito yaririmbye “Urugamba rwo Kwibohora”, indirimbo yahimbiwe itariki ya 4 Nyakanga, ndetse n’INUMA. ari nacyo kirango cya Fondation KMP. Iyi ndirimbo inuma ni nayo yaciye agahigo muri iki gitaramo, kuko mu gihe cyo gusaba indirimbo isubirwamo, niyo yabonye amajwi menshi.

Igitaramo cyaje gusozwa na none n’ijambo ry’umuyobozi (Mayor) w’Akarere ka Musanze, warangije anisabira indirimbo Arc en Ciel.

Mu bo Kizito yashimiye muri iki gitaramo, harimo abanyamuryango ba KMP, ubuyobozi bw’akarere ka Musanze, umuryango w’Abanyamerika wa USAID ndetse na Ambasade ya Amerika mu Rwanda kubw’inkunga bateye iki gitaramo, ashimira Minisiteri y’Umuco na Siporo, ndetse n’amashuri yose yitabiriye ibyo birori. Igitaramo cyahumuje ahagana i saa moya z’umugoroba.

Igitaramo mu mafoto :

Mayor Winnifrida Mpembyemungu aha ikaze umuryango KMP

Kizito Mihigo aririmba

Ikinamico ya KMP yashimishije benshi

Ni kenshi bamusangaga kuri Podium ngo babyinane nawe

Bose barahagurutse babyina "Inuma" banasaba ko yasubirwamo

Umusizi Aimé Valens ati : "Inyuma y’ubugi hari ubuki"

Haririmbwa "Inuma" abo byashobokeye kugera kuri Podium bayibyinanye na Kizito

Kizito Mihigo asobanura indirimbo ze n’impamvu yazo

Aba bari mu Kinamico yigisha ubumwe n’ubwiyunge nyabwo

Urubyiruko n’abakiri bato nabo bari benshi

Mu kwizihirwa, buri wese yabyinaga mu buryo bumunyuze

Uyu mwana yabashaga kuririmba "INUMA" adasobwe haba mu ijwi no mu magambo