Kizito Mihigo na Fondation ye basuye abarokotse Jenoside n’abagororwa

Yanditswe na Mathias Hitimana
Kuya 16 Mata 2013 saa 08:24
Yasuwe :
0 0

Mu cyumweru Abanyarwanda n’inshuti zabo barimo kwibuka Jenoside yakorewe abatutsi ku nshuro ya 19, kuva ku wa 7 kugeza kuwa 13 Mata 2013, umuhanzi Kizito Mihigo na Fondation ye KMP (Kizito Mihigo pour la Paix / Kizito Mihigo for Peace) bifatanyije n’ibyiciro binyuranye by’abanyarwanda mu bitaramo bitanga inyigisho ku ndangagaciro z’amahoro.
Usibye imihango yo kwibuka inyuranye uyu muhanzi yagiye yitabira akaririmbamo indirimbo ze nk’inshyashya yise “UMUJINYA MWIZA”, Kizito Mihigo na Fondation (...)

Mu cyumweru Abanyarwanda n’inshuti zabo barimo kwibuka Jenoside yakorewe abatutsi ku nshuro ya 19, kuva ku wa 7 kugeza kuwa 13 Mata 2013, umuhanzi Kizito Mihigo na Fondation ye KMP (Kizito Mihigo pour la Paix / Kizito Mihigo for Peace) bifatanyije n’ibyiciro binyuranye by’abanyarwanda mu bitaramo bitanga inyigisho ku ndangagaciro z’amahoro.

Usibye imihango yo kwibuka inyuranye uyu muhanzi yagiye yitabira akaririmbamo indirimbo ze nk’inshyashya yise “UMUJINYA MWIZA”, Kizito Mihigo na Fondation KMP basuye umudugudu w’abacitse ku icumu w’i Kinyinya mu karere ka Gasabo, banasura na Gereza ya Nyanza mu Ntara y’Amajyepfo.

Igikorwa cyo kwigisha abagororwa hakoreshejwe ubuhanzi, si ubwa mbere KMP igikoze, ahubwo ni igikorwa gihoraho iyi Fondation yise “Umusanzu w’umuhanzi mu kugorora”.

Kizito Mihigo ataramira impfubyi n’abapfakazi ba Jenoside i Kinyinya

Ku mugoroba wo kuwa Gatanu, tariki ya 12 Mata 2013, KMP yasuye imfubyi n’abapfakazi bo mu mudugudu wa Kinyinya mu Karere ka Gasabo; utuwe n’abacitse ku icumu bagera kuri 500 ndetse n’abana babo bagiye bavuka nyuma ya Jenoside irabataramira, ariko ihatangira ubutumwa butandukanye.

Mu butumwa Kizito Mihigo yagejeje ku batuye uyu mudugudu wa Kinyinya ndetse n’abashyitsi bari bahari, bwibanze ku kugereranya Jenoside yakorewe abatutsi n’umusaraba wa Yezu. Yabwiye abari bari aho, ko umusaraba nubwo wabambweho umwana w’Imana, usigaye wambarwa ndetse ugatakwa mu mazu no mu nsengero, kubera ko uzwi ko wakurikiwe n’izuka. Kizito asanga kuva aho Yezu azukiye, aribwo umusaraba wabaye ikimenyetso cyiza, naho ubundi ngo wari igikoresho cy’iyicarubozo, ikimenyetso cy’urupfu.

Yavuze ko Jenoside yakorewe abatutsi nayo itagomba kwibagirana ati “Ntidukwiye kuyibuka ngo turekere aho, ahubwo dukwiye kuzirikana amasomo yatwigishije atuma tutazongera guhungabana.”

Mu gutanga ubutumwa bwo guharanira kwigira, Umuhanzi Kizito Mihigo, yahaye urubuga abana bato bo muri uwo mudugudu, bavuga icyo bifuza kuzakora nibamara gukura, bose bakagenda bagaagaza intego bafite, birimo kuzaba abayobozi b’igihugu, kuzatwara indege, kuzaba abapolisi n’abasirikare, ariko abenshi bahurije ku mwuga w’ubuganga.

Indirimbo zakunzwe cyane muri uyu mudugudu, ni Ijoro ribara uwariraye, Twanze gutoberwa amateka n’Inuma.

Iki gitaramo kitabiriwe n’umuyobozi w’akagari ka Gasharu ariko karimo uyu mudugudu, ndetse n’intumwa y’akarere ka Gasabo.

Kizito ataramira abagororwa muri gereza ya Nyanza

Gereza ya Nyanza niyo gereza ya mbere yo ku rwego mpuzamahanga iri mu Rwanda. Iyi gereza icumbikiye abagororwa barenga ibihumbi bitanu, umubare munini ukaba ari uw’abafungiye icyaha cya Jenoside yakorewe abatutsi. Iyi gereza kandi, icumbikiye abanyapolitiki bafungiye ibyaha binyuranye ndetse n’abanyamahanga.

Mu butumwa bwa Fondation KMP, Kizito Mihigo yatanze ubuhamya bw’ubuzima bwe muri Jenoside na nyuma yayo, avuga ko icyatumye ashinga Fondation KMP arinuko yemera ko uwacitse ku icumu afite uruhare rw’indasimburwa mu bwiyunge bw’abanyarwanda, no mu gusana imitima.

Yavuze kandi ko abakoze Jenoside nabo bakwiye guhumurizwa, kuko ibyaha byabo byabahungabanyije ku buryo bugaragara, kandi ko umuntu ushobora kubahumuriza bakabyemera, ari uwo bagiriye nabi.

Kizito Mihigo yemereye abagororwa ko KMP itazigera igwa mu ikosa ryo kwitiranya icyaha n’umunyacyaha, ko ahubwo izakomeza gukangurira abantu ko barusha imbaraga ibyaha byabo, kandi ko babirusha agaciro. Yagize ati: “Abantu bose iyo bava bakagera, bakwiye kwiga kurwanya icyaha batarwanyije nyira cyo, bakitoza kwanga icyaha no gukunda umunyacyaha.”

Muri icyo kiganiro cyamaze hafi amasaha abiri, Kizito Mihigo yifashishije indirimbo za gikristu yahimbye, nk’iyitwa “Iteme”, abagororwa baza kwisabira Kizito Mihigo ko yabaririmbira indirimbo n’iyo yise “Inuma” ndetse na “Turi abana b’u Rwanda”, barahaguruka barabyina . barishimiye baza no guha umuhanzi Kizito Mihigo, impano y’ishapure n’inkoni.

Kizito Mihigo na KMP batanga ubutumwa muri Gereza ya Nyanza, hari n’abayobozi batandukanye barimo Umuyobozi wa Gereza ya Nyanza, Mahoro Innocent, Umunyamabanga Nshingwabikorwa w’Umurenge wa Mukingo, Jean Pierre Nkundiye, Umuyobozi w’Ingabo mu turere twa Nyanza na Ruhango, Lt Col Frank M. Basemaki, Umuyobozi wungirije w’Akarere ka Nyanza, Appoline Kambayire, na Komiseri w’Urwego rw’igihugu rushinzwe imfungwa n’abagororwa (RCS), Mukanyangezi Dative.

Kizito Mihigo yashimiye RCS ko ikomeje kubakingurira imiryango muri gereza, ndetse yizeza abari aho ko Fondation ye, KMP izakomeza kuba umufatanyabikorwa wa Leta y’u Rwanda mu bikorwa byubaka ubumuntu nyuma ya Jenoside yakorewe abatutsi.

Kizito Mihigo na KMP aganiriza imfubyi n'abapfakazi mu mudugudu wa Kinyinya
Muri Gereza ya Nyanza, abagororwa bishimiye ubutumwa bw'indirimbo za Kizito Mihigo
Abanyamuryango ba KMP

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza