Mani Martin avuga ko atagisinzira

Mani Martin avuga ko atagisinzira


Yanditswe kuya 8-02-2013 - Saa 08:10' na Richard Irakoze

Umuhanzi Mani Martin aratangaza ko impanuka aheruka gukora yamuteye ihungabana, ku buryo ngo asigaye yikanga buri kanya kandi ngo kuva yava mu bitaro atarabasha gusinzira.

Ni mu butumwa burebure yashyize kuri ‘facebook’, aho yavuze ko ateganya kujya gusura umumotari wari umuhetse wahise avunika akaguru.

Muri ubwo butumwa, Mani Martin avuga ko ubu ari kubasha kwiyegura akajya hanze kandi ko ari koroherwa gahoro gahoro n’ubwo ibibazo byo kwikanga cyane ngo bitamworoheye.

Ubu ni ubutumwa burambuye yanditse:

Bavandimwe, nkomeje kubashimira uburyo mudahwema kumba hafi! Imana na yo iri gukora ibyayo ubu ndabasha guhindukira neza mbere ntibyakundaga, nshobora kandi kwiyegura nkanasohoka mu nzu na byo byasabaga abagabo! Imana ishimwe cyane!

Gusa abasenga mukaze umurego kuko ubu mfite ikibazo cyo kwikanga cyane. Ndahumiriza iminota mike nkashidukira hejuru mbona amashusho y’imodoka ingonga! Mbibona buri kanya uko mpumbije amaso kwa kundi agatotsi kaba kenda kuza, maze nabibona ntyo nkaba ndashidutse ni ko gutonekara ku ijosi aho nsangannywe ububabare!

Ubu kuva nakora impanuka sindabasha kugoheka kubera icyo kibazo. Ntinya kwikanga no kwitoneka maze nkirinda icyatuma nsinzira! Ubu koko aya mashusho azarekeraho kunzamo bigenze bite?

Cyakora uyu munsi ndasaba Imana impe agatege mbashe kujya kuri CHUK gusura umumotari twari kumwe dukora impanuka! Rwose we yari ameze nabi cyane! Imana imfashe mbibashe kandi nsange yarabashije kubona abamwitaho bihagije! Mugire amahoro!

Akiva mu bitaro, Mani Martin yongeye arandika agira ati:

Koko burya nyagasani yansimbukije urupfu! Imana ihimbazwe iteka n’iteka! Uyu munsi nabashije kuva mu nzu mazemo iminsi igera kuri ine hafi itanu ndyamye ntabyuka ku bw’impanuka nagize hambere aha.

Nanyarukiye kuri CHUK gushakisha umuvandimwe (umumotari) twakoranye impanuka, mu by’ukuri ntabwo byari byoroshye kumubona kuko sinigeze menya izina ry’uwo muvandimwe, naherutse mutega gusa mubwira aho ngiye twongera guherukana mbona imodoka itugonga.

Sinari namenye irengero rye, gusa niyumvishaga ko ari mu bitaro CHUK, isura ye yo yanzaga mu mutwe buri gihe kuko mpora ndota uko byatugendekeye.

Abavandimwe twari kumwe nabo bumvaga ndi nk’umusazi kuko ndi gushakisha umuntu ntazi n’izina rye, jye numvaga byanze bikunze urugendo rwa mbere nzakora mbashije kubyuka ruzaba urwo kujya gushakisha uwo muvandimwe.

Icyo gihe antwara nabonaga ari umwana muto, nahoranaga impungenge z’uko wenda umuryango we utabashije kubimenya wenda bari kure cyangwa nta n’abo agira hato akazabura uwamuha n’amazi yo kunywa.

Nyagasani yaje kuhagoboka nzenguruka ibitaro mbaza nuko mbona ndamubonye! Yitwa Yves Bicamumpaka arwariye mu cyumba cya 7 hafi y’aho babagira ku gitanda cya17. Mu by’ukuri uko ameze byarushijeho kunyereka uburemere bwo kurusimbuka kwanjye.

Ndetse n’ishimwe ryanjye ryikubye inshuro zitabarika! Nashimye Imana kandi ko nawe ukuguru kwe n’ubwo kwakomeretse bikomeye amagufa akimuka ariko kukaba kutaravuyeho.

N’ubwo nabonye ari mu byuma bisubiza amagufa mu mwanya wayo ndashima Rurema ko agihumeka. Nanasanze abo mumuryango we nabo babashije kubimenya ku bufindo ubu baramurwaje, afite ububabare budasanzwe, icyo twakora ni ukumusengera n’ababishoboye tukamusura tukamuba hafi ngo atigunga. Imana ibahe imigisha isaga ibihumbi! I love u my friends!

Indirimbo nshya ya Mani Martin:

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO