Meddy yasubiye muri Amerika bimutunguye

Yanditswe na Munyengabe Murungi Sabin
Kuya 27 Ukwakira 2017 saa 08:24
Yasuwe :
1 0

Umuririmbyi Ngabo Medard[Meddy] wari umaze ukwezi i Kigali yasubiye muri Leta Zunze Ubumwe za Amerika aho yari asanzwe aba kuva mu mwaka wa 2010.

Meddy yageze mu Rwanda kuwa 26 Kanama 2017, yakiriwe n’imbaga yiganjemo abafana b’abo mu muryango we. Mu gusubirayo, ku mugoroba wo kuri uyu wa Kane yaherekejwe n’abatageze kuri batanu ku bw’uko yakoze urugendo bimutunguye.

Inshuti ya hafi ya Meddy iri muri bake bamuherekeje ku kibuga cy’indege asubira muri Amerika, yabwiye IGIHE ko uru rugendo rwamutunguye kuko ‘yagombaga kuzava mu Rwanda kuwa Gatandatu tariki ya 28 Ukwakira 2017 biba ngombwa ko agenda umunsi umwe mbere.

Yagize ati “Yaraye agiye, abenshi ntabwo babimenye, nanjye yampamagaye ku munota wa nyuma agiye kurira indege. Namuherekeje ndi kumwe na mubyara we hamwe na Safi, nta bandi bahageze”.

Yongeyeho ati “Abo mu muryango ntabwo bamuherekeje, yari yiteguye ko agomba kubabwira bakazaza kumuherekeza kuwa Gatandatu ariko abamuguriye itike y’indege batunguwe […] Guhindura itike bishobora kuba byagoranye”.

Meddy ku kibuga cy'indege asubiye muri Amerika

Meddy yaje mu Rwanda ahakorera igitaramo nyamukuru cyabereye mu Mujyi wa Nyamata ku wa 2 Nzeri 2017, yakoze n’ibindi byazengurutse u Rwanda ku bufatanye na Airtel.

Mbere yo gusubira muri Amerika, Meddy yatemberejwe mu ndege za Akagera Aviation yerekwa ibyiza bitatse u Rwanda by’umwihariko Umujyi wa Rubavu.

Mbere yo gusubira muri Amerika yatemberejwe na Akagera Aviation

Amafoto: Kigali Today


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza