Meddy yongeye gusohora indirimbo nyuma y’umwaka acecetse

Yanditswe na Munyengabe Murungi Sabin
Kuya 21 Nyakanga 2016 saa 10:38
Yasuwe :
0 0

Meddy yaherukaga gusohora indirimbo ye bwite ‘Burinde bucya’ muri Mutarama 2015 yongeye gukora mu nganzo aririmba ku rukundo mu yo yise ‘Nta wamusimbura’, icuranze mu buryo bwisanisha n’indirimbo zo hambere.

Uyu muhanzi ukorera umuziki i Texas muri Leta Zunze Ubumwe za Amerika, yaherukaga gukora indirimbo muri Gicurasi 2015 ubwo yaririmbanaga na Kitoko iyitwa ‘Sibyo’. Meddy uri mu bahanzi bakunzwe cyane mu Rwanda, avuga ko kuba amaze igihe adahanga byatewe n’amasomo yari amuhugije.

Ati “Nari maze iminsi mu bitaramo nagiye ntumirwamo hirya no hino cyane cyane ahatuye Abanyarwanda, ikindi ni uko amasomo yamperanye ku buryo byari bigoye cyane kuba nabifatanya no gukora indirimbo nshya.”

Meddy yabwiye IGIHE ko yiga mu mwaka wa Gatatu mu ishuri ryitwa Tarrant College riherereye mu Mujyi waTexas aho yiga mu ishami rya Actuarial Science. Ati “Urumva ndi mu mwaka wa Gatatu, ndabura umwaka umwe ngo ndangize uvanyemo iki gihembo ndimo, byansabaga umwanya munini bigatuma ntakora umuziki neza ariko ubu ndi mu kiruhuko kugeza muri Kanama 2016.”

Yavuze ko muri iki gihe ari kurwana no kurangiza amasomo muri Tarrant College aho ateganya kuva akajya gusoreza muri UTD University of Dallas.

Ati “Nindangiza hano nzakomereza muri UTD University of Dallas ari naho nteganya kurangiriza mu mwaka wa 2017. Ubu ndashaka gukora ibishoboka video ya ‘Nta wamusimbura ikazasohoka bitarenze ibyumweru bitatu mbere y’uko nsubira mu masomo.”

Meddy kandi yiteguye ibitaramo yatumiwemo muri Canada, bizatangira kuwa 6 Kanama 2016 mu Mujyi wa Edmonton naho ku itariki ya 12 Kanama akorere ikindi gitaramo ahitwa Ottawa hatuye Abanyarwanda batari bake.

Indirimbo nshya Meddy yise ‘Ntawamusimbura’ yakozwe na Producer Lick Lick usanzwe warakoze indirimbo z’uyu muhanzi zakunzwe nka ‘Nasara’, ‘Burundi bucya’, ‘Nka Paradizo ft Priscillah’, ‘Ni njyewe’ n’izindi.

Meddy avuga ko amaze iminsi ahugijwe n'amasomo ateganya gusoza muri 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza