Umuhanzi ’Mibirizi’ arasaba Abanyarwanda kugira ubutwari mu gihe cyo kwibuka

Yanditswe na
Kuya 6 Mata 2012 saa 11:17
Yasuwe :
0 0

Mu gihe twegereje igihe cyo kwibuka inzirakarengane zazize Jenoside yakorewe Abatutsi mu mwaka w’i 1994, umuhanzi Munyanshoza Dieudonné uzwi nka Mibirizi arasaba Abanyarwanda kugira ubutwari mu rugamba rwo kwiyubaka.
Ashingiye ku nsanganyamatsiko yo kwibuka uyu mwaka igira iti " Twigire ku mateka twubaka ejo hazaza’’, Munyanshoza Dieudonné yashyize ku mugaragaro indirimbo ebyiri; iya mbere ivuga ku butwari bw’imfubyi n’abapfakazi ba Jenoside bigaragaza n’ibyo bamaze kugeraho yise ’Dusane (...)

Mu gihe twegereje igihe cyo kwibuka inzirakarengane zazize Jenoside yakorewe Abatutsi mu mwaka w’i 1994, umuhanzi Munyanshoza Dieudonné uzwi nka Mibirizi arasaba Abanyarwanda kugira ubutwari mu rugamba rwo kwiyubaka.

Ashingiye ku nsanganyamatsiko yo kwibuka uyu mwaka igira iti " Twigire ku mateka twubaka ejo hazaza’’, Munyanshoza Dieudonné yashyize ku mugaragaro indirimbo ebyiri; iya mbere ivuga ku butwari bw’imfubyi n’abapfakazi ba Jenoside bigaragaza n’ibyo bamaze kugeraho yise ’Dusane ubuzima’.

Iya kabiri ni iyo yise ’Twige Twiyubake’, aho agaruka ku mateka y’urwa Gasabo yaje kugeza kuri Jenoside, mu gihe mbere y’uko abakoloni baza Abanyarwanda babanaga neza ariko ba mpatsibihugu baza bagatangira gutanya bwa buvandimwe, n’aho repubulika iziye iza yenyegeza ifumba yari yarakijwe n’abakoloni.

Ati:" Ntibyatinze ab’inkwakuzi barinuba, abahejejwe hanze botsa igitutu ngo babohore u Rwanda n’Abanyarwanda".

Gusa Mibirizi avuga ko atari amateka gusa ahubwo iyi ndirimbo inibutsa amarorerwa yabaye muri Jenoside hagamijwe gushishikariza abantu kutiheba no kuremamo abantu icyizere.

Akomeza avuga ko iyi nsanganyamatsiko iziye igihe kuko usanga akenshi dukunze kwibuka ariko ntidusubize amaso inyuma ngo turebe uko byahemberewe, ati :" Utazi iyo ava agirango aho ageze niho yajyaga. Bityo tugomba kumenya aho tuva tukamenya n’aho tugeze mbere yo gutegura ahazaza, kuko ibyabaye bitituye ku bantu".

Mibirizi ashimangira ko mu gihe tugiye kwibuka buri wese hari uruhare asabwa mu kwibuka ibyabaye no mu gusibisha ikibi icyiza mu kwiyubaka, uwabigizemo uruhare akigaya kugira ngo turusheho kubaka igihugu cyiza gifite ejo hazaza heza ku bana bacu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza