Biography

Yanditswe na
Kuya 6 Mata 2012 saa 12:39
Yasuwe :
0 0

Umuhanzi Munyanshoza Dieudonne yavutse kuwa 25 Nzeri 1975, avukira i Kimbogo, muri Mibilizi ubu hasigaye hitwa Akarere ka Rusizi mu Ntara y’i Burengerazuba. Yahise abatizwa nyuma y’iminsi itatu akivuka. Ni umwanditsi w’indirimbo, umucuranzi akaba n’umuhanzi nyarwanda uzwi cyane mu ndirimbo zo kwibuka abazize Jenoside yakorewe abatutsi mu 1994.
Ni mwene Anaclet Munyanshoza wapfuye mbere ya Jenoside. Nyina ni Marie Mukarugema; yakomerekejwe bikabije muri Jenoside nuko aza kwitaba Imana nyuma (...)

Umuhanzi Munyanshoza Dieudonne yavutse kuwa 25 Nzeri 1975, avukira i Kimbogo, muri Mibilizi ubu hasigaye hitwa Akarere ka Rusizi mu Ntara y’i Burengerazuba. Yahise abatizwa nyuma y’iminsi itatu akivuka. Ni umwanditsi w’indirimbo, umucuranzi akaba n’umuhanzi nyarwanda uzwi cyane mu ndirimbo zo kwibuka abazize Jenoside yakorewe abatutsi mu 1994.

Ni mwene Anaclet Munyanshoza wapfuye mbere ya Jenoside. Nyina ni Marie Mukarugema; yakomerekejwe bikabije muri Jenoside nuko aza kwitaba Imana nyuma yayo gato. Munyanshoza Dieudonné arubatse afite umwana umwe w’umukobwa.

Akirangiza amashuri abanza muri Mibilizi, Munyanshoza yahawe amahugurwa mu kigo gitanga amahugurwa y’ubuhinzi n’ubuhanzi cya Kibogora. Mu 1989 yatangiye umwuga w’ububaji.

Akiri mu mashuri abanza yakunze kujya asubiramo indirimbo z’abandi bahanzi bakomeye yumvaga kuri Radiyo bigatungura abamwumva.
Mu 1993 yabaye umusirikare. Iki gihe nibwo yatangiye gusohora indirimbo ze za mbere zirimo "Urukundo Ruzira Icyasha" avuga ku ntwari Rudahigwa, Rukeba, Bisangwa, Rwigema …

Abifashijwemo n’abandi basirikare, Munyanshoza yaje guhimba izindi ndirimbo arazisohora zirimo iyitwa "Horana Ubutwari". Mu 1997, Munyanshoza yasohoye album ye ya mbere iriho indirimbo nka Mibilizi, Umwari, Umunsi wandutiye iyindi, Amazi si ya yandi, Urukundo ruzira icyasha, Amahoro meza, Horana ubutwari, Iyizire, Ngira nkugire.

Yaje gusohora album ye ya kabiri mu 1999. Iyi album yari igizwe n’indirimbo zo kwibuka gusa. Iyi album yari iriho indirimbo nka Mibilizi, Nyanza ya Butare, Mugote, Twarabakundaga, Umunsi avuka, Ibijya gucika, Jenoside ntikagaruke, Karama na Kabagari. Nyuma y’izi ndirimbo Munyanshoza yaje gusohora izindi ndirimbo 34 zose zo kwibuka abazize Jenoside yakorewe abatsutsi mu 1994.

Nyuma yaho uyu muhanzi yaje gusohora izindi ndirimbo noneho zivuga kuby’urukundo no gushyingirwa. yasohoye indirimbo nka Mubaye umwe, Nibaguhigamire na Umwari. Izi ndirimbo yazisohoye kuri Album ye nshya yashize hanze muri Gicurasi 2010.

Nyuma ashyigikiwe n’abahanzi bagenzi be Kitoko, Grâce, Eric Senderi, Mani Martin, Dieudonné Munyanshoza yaje gusohora indirimbo yo kwibuka ku nshuro ya 16 yitwa Nturi Wenyine. yaje guhita ashyira hanze izindi ndirimbo 5 zo kwibuka ari zo Bisesero, Gisagara, Jali, Kabuye na Rugara rwa Kigali.

Mu 2011 Munyenshoza yahimbye indirimbo yo kwibuka ku nshuro ya 17 Jenoside yakorewe abatutsi nyuma yo guhuza abahanzi Eric Senderi, Sgt Robert, Mariya Yohani, Kitoko, Mani Martin, Patrick Nyamitari, Tonzi, Grâce n’abandi. Iyo ndirimbo yayise Twaza Tujye Imbere.

Zimwe mu ndirimbo za Munyanshoza zagiye zihabwa ibihembo ku rwego rw’Igihugu by’uko zunga abanyarwada. Izo ndirimbo ni nka Ngira nkugire, Tubogore Umuco, n’izindi.

Hari n’indirimbo ze zagiye zitsindira ibindi bihembo zirimo nka Amazi si yayandi yahawe igihembo cyo kurwanya SIDA, yagihawe na REMA. Muri Mutarama 2009, Munyanshoza yaje ku mwanya wa kane mu marushanwa y’indirimbo zubahiriza Igihugu.

Mu 2011 Munyanshoza yaje ku mwanya wa Kabiri mu marushanwa yateguwe na MINICOM yitwa Hanga Umurimo. Yahembwe Miliyoni y’Amanyarwanda.

Mu 2012 Munyanshoza yahimbye indirimbo yo kwibuka ku nshuro ya cumi n’umunani (18) yitwa Twige Twubake ihuza n’insanganyamatsiko y’umwaka igira iti:"Twigire ku mateka twubaka ejo hazaza."


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza