Princess Priscillah na Meddy bahurije imbaraga mu ndirimbo ‘Nka Paradizo’

Yanditswe na Munyengabe Murungi Sabin
Kuya 2 Gicurasi 2015 saa 07:16
Yasuwe :
0 0

Ku nshuro ya mbere, umuhanzi Princess Priscillah yahuje imbaraga na mugenzi we Meddy bombi bakorera umuziki muri Leta Zunze Ubumwe za Amerika bakora umushinga w’indirimbo bise ‘Nka Paradizo’.

Mu kiganiro na IGIHE, Princess Priscillah yasobanuye ko asohoye iyi ndirimbo nyuma y’uko yari amaze igihe kinini afite gahunda yo gukorana umushinga w’indirimbo na Meddy ndetse by’akarusho akaba ari umwe mu bahanzi akunda anemera ko bafite ubuhanga bwabo mu muziki.

Ubwo Lick Lick yakoreraga Priscillah iyi ndirimbo Meddy yaje muri Studiio ayumvise arayikunda bityo asaba uyu mukobwa ko bayikorana undi ntiyazuyaza ahita abyemera.

Ati “Muri make indirimbo ibyo ivuga birumvikana,njyewe na Meddy twifuje gushyira imbaraga hamwe tugakora umushinga twumva uzashimisha abanyarwanda muri rusange.”

Princess Priscillah na Meddy kandi ngo barakataje mu rugendo rwo kwereka abafana babo ko nubwo bari kure y’u Rwanda babazirikana kandi batazahwema gukora.

Ati “Ibi birerekana ko mu rugendo turimo dufite gahunda ihamye yo gukora ibihangano binogeye amatwi tugakomeza kuzamura ibendera ryacu no kwereka abafana ko twiyemeje kutabatenguha”

Mu ndirimbo ‘Nka Paradizo’ Princess Priscillah na Meddy ngo baba basobanura uburyo abakundana bagera igihe bakumva bari mu munyenga w’umunezero ku buryo bumva bari muri Paradizo.

Ati “Ni nka cya gihe abantu bakundana bageramo ibintu byose bimeze neza bakumva bibereye muri Paradizo. Ni cyo kigereranyo nk’uko bavuga ngo urugo ni ijuru rito”

Ku ruhande rwa Meddy na we avuga ko yishimiye gukorana na Priscillah, umukobwa abonamo ubuhanga bukomeye bityo ngo akumva bizamufasha gukomeza kwereka abafana be ko ahari. Uyu muhanzi na we ngo afite ibindi bikorwa bye bwite azashyira hanze bidatinze.

Iyi ndirimbo yakozwe na Producer Lick Lick, amashusho yayo azajya hanze mu minsi ya vuba.

Twitter: @murungisabin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza