Mfite isoni zo kwitwa umuntu kubera amabi yabo-Riderman

Mfite isoni zo kwitwa umuntu kubera amabi yabo-Riderman


Yanditswe kuya 1er-05-2012 - Saa 12:17'

Kubera isura ya kimuntu imaze guhindana, isi imaze kwandura, n’urukundo rwashize kandi byose biterwa n’abantu, umuraperi Riderman yemeza ko asigaye afite isoni zo kwitwa umuntu.

Mu kiganiro yagiranye na IGIHE, Riderman yavuze ko muri Bibiliya bavuga ko umuntu yaremwe mu ishusho y’Imana kandi iyo shusho dufite ikaba atari umubiri kuko Imana idafite umubiri nkatwe.

Ati :”Ishusho duhuriyeho n’Imana ni imico myiza, ahanini ariko ni urukundo kuko no muri Bibiliya handitse ngo ’utagira urukundo ntazi Imana kuko Imana ari urukundo’.”

Akomeza avuga ko iyo ureba uburyo abantu batakaje urukundo, uburyo isi twateretswemo n’Imana imeze neza imaze guhumana, ukuntu abashakashatsi birirwa bakora ama virus aho gukora imiti ivura indwara, uburyo abantu bica abandi, wareba ukuntu ibintu byose biri kugenda biba bibi mu isi, wumva ugize isoni zo kwitwa umuntu.

Ati :"Kuba ya sura y’Imana buri wese yakagombye kuba afite tutakiyifite ndetse twarayanduje, bituma wumva ufite isoni zo kwitwa umuntu kuko nawe uri umuntu kandi uwo muntu ariwe urimo kwangiza isi no gutuma ibintu byose bidogera."

Aha Riderman yaboneyeho no gusaba Abanyarwanda ko bakwitekerezaho bakareba niba bahitamo ubumuntu bwa none cyangwa bagahitamo ubumuntu nyabumuntu Imana yabaremanye, bityo bagafata umwanzuro.

Ati :”Tugomba kugira urukundo, ufite urukundo ntiwaba umunyabyaha ”.

Ashimangira ko ufite urukundo utakwica umuntu, utaroga, utagambana, kandi ufite urukundo udashobora kuba umunyabyaha, kuko uri umukobwa utakuramo inda ngo wice umwana, akaba asanga aho kugira ngo ujye mu rusengero kwiga Bibiliya wakwiga kugira urukundo.

N’ubwo avuga ibi ariko, uyu muhanzi yemera ko nawe atari umutagatifu kuko nawe hari ibyo akora akabyicuza, ariko akenshi ngo ahita yiyemeza ko atazongera kubisubira, kugira ngo ishusho y’Imana yoye gukomeza guhindana kandi aheshe Imana icyubahiro.

Aya magambo yo gukangurira abantu kugaruka ku bumuntu kandi agiye kuyasohora mu ndirimbo yise ’Mfite isoni zo kwitwa umuntu’ yafatanyije n’umuraperi Bulldogg.

Muri iyo ndirimbo hari aho agira ati :”Abenshi mu bandika amateka ku isi ni abicanyi, amakaramu yabo akenera wino y’amaraso, nta mutunzi ukiba hagati y’abaturanyi”.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO