Riderman avuga ko abayeho nk’indaya mu ndirimbo

Riderman avuga ko abayeho nk’indaya mu ndirimbo "Amateka"


Yanditswe kuya 5-01-2012 - Saa 16:00'

Mu gusobanura amateka y’uko yatangiye n’uko yinjiye mu muziki, umuhanzi Riderman yashyize hanze indirimbo ndende y’iminota 10 n’amasegonda 42. Iyi ndirimbo Riderman yayise "Amateka" yayikorewe na Producer Davydenko usanzwe ukorera muri Studio F2K ndetse n’Ibisumizi.

Muri iyi ndirimbo, agaya cyane imibanire mibi irangwa muri bagenzi be b’abahanzi aho nta muntu ushobora gufasha mugenzi we nta yindi nyungu runaka abitezemo. Yagize ati:“Iyo ukora uraka (uramenyekana ukamamara), ukavugwa, ukarabagirana, wacecekaho gato ukazima (ntiwongere kuvugwa no kwitabwaho nka mbere) ukanibagirana, ubuzima tubamo ni nk’ubw’indaya neza; iyo imaze gusaza irazima bakayiheza”.

Riderman akomeza atanga ubuhamya bwa bimwe mu byamubayeho ngo arusheho gusobanura uburyo mu bahanzi nta rukundo rubaho. Agira ati: “Narwaje Mama amezi menshi amaze kubagwa, abangezeho ni mbarwa, niba mbeshya mpfe iki gihe, nta mubano w’abantu baba mu muziki uramba, wanapfusha ukabura ugutabara.”

Ubu bunararibonye Riderman abwenderaho akaburira abashaka kuba abahanzi ngo bashishoze babikore bazi neza ibyo barimo. Agira ati:“Bana mwinjira mu muziki muwumenye mube menge imyumvire yanyu ntizawusenye”.

Mu gusoza iyi ndirimbo Riderman kandi agaruka ku bushyamirane yigeze kugirana n’abahanzi bagize itsinda rya B-Gun aho bateranye amagambo babinyujije mu ndirimbo buri wese yirata ubutore anishongora kuri mugenzi we avuga ko ariwe urusha undi.

Avuga ko yinjiye mu buhanzi mu mwaka wa 2005, akemeza ko ari we muntu wa mbere wakoze igitaramo cyitabiriwe kurusha abandi bahanzi. Izi ngero zose azitanga avuga ko ubuzima yagiye anyuramo n’ibyo yakunze guhura nabyo mu muziki uretse urukundo rw’amafaranga, abona aba abayeho mu buzima busa n’ubwo indaya zibamo.

Uretse kuba aririmbye indirimbo ndende gutya, Riderman yanaririmbye indirimbo y’igitero kimwe n’inyikirizo gusa imara iminota isanzwe, mu gihe izimenyerewe zikunze kugira ibitero 3.



KANDA HANO USHOBORE KUMVA
  Amateka By Riderman
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO