The Ben na Priscillah bakoreye video ku kiraro cy’amateka i San Francisco

Yanditswe na Munyengabe Murungi Sabin
Kuya 22 Gashyantare 2016 saa 09:34
Yasuwe :
0 0

Abahanzi Mugisha Benjamin [The Ben] na Umuratwa Priscillah [Princess Priscillah], basohoye amashusho y’indirimbo y’urukundo bakoreye muri kamwe mu duce nyaburanga dufite amateka akomeye mu Mujyi wa San Francisco.

The Ben akunzwe bikomeye mu Rwanda mu ndirimbo z’urukundo nka ‘Ko Nahindutse’, ‘Urabaruta’ n’izindi, mugenzi we Princess Priscillah babana muri Amerika na we afite indirimbo zaciye ibintu nka ‘Paradizo ft Meddy’ na ‘Icyo Mbarusha’.

‘Ntacyadutanya’ yabongereye gukundwa bidasanzwe ndetse iri mu ndirimbo ziharawe cyane mu Rwanda muri iki gihe. Yakozwe na Producer Lick Lick mu buryo bw’amajwi n’amashusho.

Yafatiwe amashusho mu Mujyi wa San Francisco muri Amerika ku kiraro gifite amateka yihariye cya ‘Golden Gate Bridge’. Iki kiraro kiri mu bimenyetso by’ibanze biranga uyu mujyi ku ikarita y’Isi ndetse kiri mu bisurwa cyane na ba mukerarugendo batemeberera muri California.

Ikiraro ‘Golden Gate Bridge’ cyubatswe n’Umudage witwa Joseph Strauss wanubatse ibindi bisaga magana atanu bikomeye ku Isi. Cyafunguwe ku mugaragaro mu 1937, kugeza mu mwaka wa 1964 ni cyo cyafatwaga nk’icya mbere mu burebure ku Isi [1,300 m] ndetse muri icyo gihe cyasurwaga ubutitsa.

The Ben yabwiye IGIHE ko indirimbo ‘Ntacyadutanya’ iri ku isonga mu bihangano bye yizeyemo umusaruro kubera imbaraga yayishyizemo mu mashusho ndetse ngo yatangiye kwakira ibitekerezo bitabarika bimushimira.

Ati “Ni indirimbo twashyizemo ingufu kuva yatangira gukorwa mu buryo bw’amajwi kugeza isohotse na video yayo. Byanyongereye imbaraga kuko yakiriwe neza hanze, binyereka ko hari byinshi izanyongerera mu muziki wanjye.”

Amashusho yafatiwe mu Mujyi wa San Francisco' ku kiraro cya ‘Golden Gate Bridge’

Kuba yarakorewe kuri ‘Golden Gate Bridge’ na byo abibonamo ikintu kidasanzwe kuko iki kiraro kiri mu duce dusurwa cyane i San Francisco bityo ko n’indirimbo ye izakurura benshi.

Mu masaha atageze kuri 30 iyi ndirimbo imaze ishyizwe ku rubuga rwa YouTube, imaze kurebwa inshuro zigera ku bihumbi mirongo itatu. Niyo ndirimbo ya mbere ya The Ben irebwe mu buryo bwihuse kuva yatangira kuririmba ndetse iri mu za mbere zarebwe ku muvuduko wo hejuru ikijya hanze mu Rwanda.

The Ben ashyize hanze iyi ndirimbo mu gihe yitegura kujya gukorera igitaramo mu Bubiligi. Azava muri Amerika ku itariki ya 28 Gashyantare hanyuma igitaramo kibe kuwa 5 Werurwe 2016.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza