Kwamamaza

Bosebabireba yiyunze n’umubyeyi wamwihakanye agitunzwe no gucukura imisarane

Yanditswe kuya 19-10-2016 saa 10:21' na Munyengabe Murungi Sabin


Uwiringiyimana Théogène [Theo Bosebabireba] wamamaye mu ndirimbo zo kuramya no guhimbaza Imana yahamije ko yahaye imbabazi umubyeyi we wamwihakanye bakiri mu buzima bushaririye bw’ubukene n’ibibazo akamwemera amaze kubona yarabaye icyamamare.

Theo Bosebabireba yakunzwe bikomeye mu ndirimbo zakanyujijeho zirimo ‘Ikiza urubwa’, ‘Ibigeragezo si karande’, ‘Bosebabireba’, ‘Ingoma’ n’izindi.

Ni umuhanzi uri mu ba mbere bakunzwe bidasanzwe mu Rwanda, afite amateka yihariye ndetse mu muziki we yibanda ku bibazo yanyuzemo kuva akibana na nyina muri nyakatsi n’urundi rukurikirane rw’ibibazo yanyuzemo kugeza amenyekanye.

Mu kiganiro cyihariye na IGIHE, Theo Bosebabireba yavuze ko gucengerwa n’ijambo ry’Imana byatumye yemera kwiyunga na se wamwihakanye akivuka nyamara yabona azamutse ndetse akamenyekana mu gihugu akabona kwemera kumwita umwana we.

Theo Bosebabireba avuga ko yakandagiye ku Isi ku itariki 3 Nyakanga 1977 atangira gusogongera ku nkongoro y’uruhuri rw’ibibazo byiganjemo ubuzima bubi yabanagamo na nyina mu nzu ya muviringo y’ibyatsi agakorwa mu bisebe na se wihakanye nyina.

Uyu muhanzi avuga ko yanyuze mu buzima bushaririye aho yacukuraga imisarane, guhingira abantu no gukata urwondo ashakisha icyatunga nyina wari ufite uburwayi budakira yamaranye igihe kirekire kugeza muri 2003 ubwo yitabye Imana.

Yagize ati “Nababaye nkivuka, twabaga mu nzu y’ibyatsi ihomesheje ibyondo, nacukuraga imisarane ngahembwa kuri metero, nahomaga inzu z’abandi, guhinga imishike nca inshuro […] ubukene si ikibazo ahubwo uwo nakwita Papa yihakanye mama turateseka ku buryo hari igihe mbitekereza no kubivuga bikananira. Iyo wenda papa atwemera ntabwo nari guteseka kuriya.”

Ati “Igihe cyarageze mama arapfa kandi uwo bari barabyaranye twakwita Papa yari yaramwihakanye biba ngombwa ko twirwariza. Icyo gihe twari dufite ikibazo gikomeye n’ubu turacyagifite, ahantu mama yavukaga kuri gakondo ye bwite ntabwo ari ho yatubyariye, kugeza ubu ntabwo tuhazi. Ndacyashakisha ngo ndebe ko nazamenya abavandimwe bacu, kutamenya aho dukomoka binkomanga ku mutima.”

Yavuze ko mu buzima bw’ubupfubyi yanyuzemo yongererwaga agahinda no kumva ko se ahari ariko adashobora kumusanga ngo amutakambire anamufashe mu bibazo yarimo.

Ati “Ibyo byarabaye yarabikoze, papa utubyara yaratwihakanye ndetse atwihakana na Mama, yamwihakanye arembye cyane nkeka ko wenda yabonaga agiye gupfa akanga kwemera ko ari umugore we kugira ngo atazasigarana ibibazo byacu njye na mushiki wanjye.”

“Mama yamureze mu nkiko zishoboka aramwihakana, twabuze ibimenyetso, aho hose twaratsinzwe birarangira. Ikintu cyanteye agahinda ni uburyo icyo gihe Papa yihakanye mama amubwira ngo ‘sinjye mugabo utuye inaha gusa’, icyo gihe siwe yihakanaga kuko yari ageze iminsi ya nyuma yo kubaho, nit we yihakanaga.”

Imyaka yose Theo yabayeho mu bubabare bwo gushaka icyamutunga na mushiki we ngo nta munsi n’umwe se yigeze agira ikintu na kimwe abafasha kugera mu mpera za 2009 asaba imbabazi umuhungu we ndetse amubwira ko yifuza ko ‘amwemerera akitwa umubyeyi’.

Yiyunze n’umubyeyi wamwihakanye...

Yongeyeho ko imbaraga z’ijambo ry’Imana no gukomera mu by’umwuka byatumye yemerera kubabarira umubyeyi we bariyunga. Ubu ngo babaye mu mudendezo usesuye, barasurana ku buryo muri iyi minsi umubano wabo nta gatotsi kawurangwamo.

Theo Bosebabireba yiyunze na se wari waramwihakanye

Ati “Nariyubatse, ndwana n’ubuzima nshakisha imibereho ejobundi mpinduka Theo wa nyawe, mba umukozi w’Imana ndamenyekana abantu baramvuga. Ubu uwo Papa yarabihinduye ubu yemeye ko ari we watubyaye njye na mushiki wanjye, ubu tubanye neza ni data. Yatwemeye ejobundi muri 2009…”

Yongeraho ati “Muri iki gihe ubu turavugana nta kibazo, turasurana nta kibazo, ni njye mukuru w’umuryango, iyo ubukwe bwabaye mfata ijambo nkavuga tukishimana nta kibazo. Ubu namuhaye imbabazi, mwita umubyeyi wanjye.”

Theo Bosebabireba atuye i Kigali mu gihe se wari waramwihakanye agituye mu cyaro mu Ntara y’Uburasirazuba ahitwa i Kayonza.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved