“Theo Bosebabireba” arasabwa kunyomoza amakuru yavuze cyangwa akajyanwa mu nkiko

Yanditswe na

Richard Irakoze

Kuya 24 Kamena 2013 saa 07:54
Yasuwe :
0 0

Umunyamakuru witwa Samuel wo kuri Radio Flash FM aratangaza ko niba umuhanzi uririmba indirimbo zihimbaza Imana, Uwiringiyimana Theogene, atemeye kujya kuri Radio Authentique ngo anyomoze amakuru yatangaje azamujyanwa mu nkiko.
Uti ayo makuru ni ayahe?
Ni uko uyu muhanzi umenyerewe ku izina rya Theo Bosebabireba yavuganye n’uyu munyamakuru kuri Radio Flash FM akamubwira ko yagiye mu Bwongereza kandi ko ko urugendo rwagenze neza. Nyuma y’igihe gito Theo yaje kongera gutangariza Radio (...)

Umunyamakuru witwa Samuel wo kuri Radio Flash FM aratangaza ko niba umuhanzi uririmba indirimbo zihimbaza Imana, Uwiringiyimana Theogene, atemeye kujya kuri Radio Authentique ngo anyomoze amakuru yatangaje azamujyanwa mu nkiko.

Uti ayo makuru ni ayahe?

Ni uko uyu muhanzi umenyerewe ku izina rya Theo Bosebabireba yavuganye n’uyu munyamakuru kuri Radio Flash FM akamubwira ko yagiye mu Bwongereza kandi ko ko urugendo rwagenze neza. Nyuma y’igihe gito Theo yaje kongera gutangariza Radio Authentique avuga ko atigeze ajya mu Bwongereza kandi ko n’umunyamakuru wabitangaje ari umutekamutwe.

Uyu Samuel, aganira na Radio Salus mu kiganiro Salus Relax, yagize ati “Natunguwe no guhamagarwa n’abandi banyamakuru bo kuri Radio Authentique bambaza bati ‘ko Theo ari kuvuga ngo ibyo bintu ntabyo yatangaje bimeze gute? Theo afite ikibazo nakwita ko ari gushaka kuba icyamamare (umustar) kurusha kuba umukristo. Ikintu cyambabaje cyane ni uko ajya kubivuga yavuze ati ‘Njyewe uwo muntu wampamagaye sinanamuzi ni n’umutekamutwe’. Naramuhamagaye ndamubwira nti ‘Njyewe nguhaye igihe iki n’iki, utaranyomoza ibyo bintu njyewe ndakujyana mu butabera’, yaramparabitse kandi anyita umutekamutwe, ubu niho nerekeje.”

Umva mu majwi uko umunyamakuru Samuel abisobanura:

Theo we yisobanura avuga ko uwo munyamakuru atamuzi. Avuga ko atakwizera amagambo y’abantu bamuhamagara kuri telefone, akavugako yifuza ko babonana. Theo avuga ko muri icyo gihe abantu bari bari kumuhamagara ari benshi bamubaza iby’uko ngo yagiye mu Burayi. Theo akavuga ko akeka ko uwo munyamakuru nawe ashobora kuba ari muri abo bamuhamagaye akamubwira ko yagiye mu Bwongereza yiganirira.

Yagize ati “Ntabwo muzi ntabwo muzi. Njyewe abantu barampamagaraga benshi batandukanye umwe akambwira ngo i Burayi uzanzanirayo iki... abantu benshi batandukanye. Muri ako kavuyo rero niho namubwiye iriya nkuru ndimo nikinira [ntera blague]. Njyewe ntabwo numvaga ari inkuru nyankuru umuntu wese araguhamagara akagusobanuza, we rero yamfatiranye muri ako kavuyo mpita mubwira inkuru itandukanye n’iy’abandi.”

Abajijwe impamvu noneho yavugiye ku yindi Radio ko uyu munyamakuru ari umutekamutwe, ari nayo mpamvu uyu Samuel avuga ko agiye kumujyana mu nkiko, Theo yasubije ati “Njye natekereje ko nawe yashatse kunsebya kuko amaze kubona ko iyo nkuru atari yo kuko yumvise izindi nkuru nawe yatangiye kujya afata iyo nkuru akayijyana ku yandi maradiyo akabaha iyo nkuru bakajya bazifata zombi [ngasa n’uwivuguruza]. Ntabwo navuga ngo naramusebeje ahubwo nawe yaransebeje”.

Ababajijwe icyo avuga ku kuba uyu munyamakuru yarakomeje kumuhamagara ngo bahure, Theo yavuze ko bari barateganije kubonana ariko akemera ko ari we wishe gahunda kuko umunsi bari barahanye wo kubonana yahise ajya mu gitaramo mu Karere ka Rubavu (ku Gisenyi). Ati “Ni njye wishe gahunda kuko byagonganye n’igiterane nari mfite i Gisenyi”.

Gusa Theo asoza avuga ko ibyo kujyanwa mu butabera nta mpungege na nke bimuteye, agatanga n’urugero rw’uko Yesu nawe yajyanywe imbere ya Pilato.

Theo yagize ati “Ibyo kujya mu rukiko byo si njye wa mbere waba ugiye mu rukiko kandi ntabwo ntinya no kujya mu rukiko kuko ubundi twe tubaho dutegereje ko n’ibirenze kujya mu nkiko byaya kuko Satani uturwanya we ntabwo aba ashaka ko wanabaho. Na Yesu bamujyanyeyo; ntuzi ko yagiye kwa ba Pilato na hehe hose banamwanga kandi ari mu nkiko, kandi ari inzirakarengane?”

Ubwo IGIHE twatangazaga inkuru y’uko Theo agiye kwitabira igitaramo mu Bwongereza, byakiriwe neza n’Abanyarwanda benshi. Gusa byaje kuza kuba urujijo kuko haje gusakara izi nkuru ebyiri, imwe ivuga ko yagiyeyo [yatangarijwe kuri Flash FM] naho indi ikavuga ko atagiyeyo [yatangarijwe kuri Authentique].

Byanavuzwe kenshi ko Theo yaba yari yarabuze itike yo kugaruka, mu gihe abandi bakunze kuvuga ko yahisemo kwiherera mu Burayi. Gusa ukuri ni uko Theo atigeze ajya mu Bwongereza nk’uko we ubwe abyemera.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza