Tom Close ntari ku rutonde rw’abarangije muri Kaminuza

Tom Close ntari ku rutonde rw’abarangije muri Kaminuza


Yanditswe kuya 24-10-2012 - Saa 08:49' na IGIHE Team

Kaminuza Nkuru y’u Rwanda yashyize hanze urutonde rw’abanyeshuri barenga 3200 bayirangijemo mu mashami atandukanye no mu byiciro bitandukanye batangiye guhabwa impamyabumenyi guhera tariki ya 23 kuzageza ku itariki ya 25 Ukwakira 2012.

Kuri uru rutonde ariko ntihagaragaraho izina Muyombo Thomas, ari we Tom Close, umuhanzi wegukanye umwanya wa mbere mu irushanwa rya Primus Guma Guma Super Star I, wagombaga kuba aruriho.

Tom Close, aganira n’umunyamakuru wa IGIHE kuri uyu wa 24 Ukwakira 2012 ahagana mu ma saa tatu, yavuze ko ntacyo yifuza gutangariza IGIHE kuri iki kibazo.

Yagize ati "nta kintu numva nshaka kubitangazaho kuko kuri icyo kibazo nari niyemeje kutagira icyo ntangariza ibinyamakuru ku mpamvu zanjye bwite.”

Umwe mu banyeshuri biga mu ishami rimwe na Tom Close, tutifuje gutangaza amazina ye, yabwiye IGIHE ko Tom Close ashobora kuba hari ibizamini yatsinzwe. Yavuze ko uyu muhanzi yasubiyemo ikizamini cya pédiatrie (kuvura abana), muri CHUK.

Tom Close yagombaga kuba ari muri uyu mubare w’abahabwa impamyabushobozi nk’umunyeshuri wagombaga kuba arangije muri Kaminuza Nkuru y’u Rwanda agahabwa Bachelor of Medicine and Surgery.

Ntaho izina Muyombo Thomas (Tom Close) rigaragara kuri uru rutonde yagombye kuba ariho

Uretse Tom Close, umunyamakuru Issiaka Mulemba, ukora urubuga rw’imikino n’amakuru y’imyidagaduro kuri Radio Voice Of Africa nawe ntiyabashije kwemererwa gusoza amashuri ku bw’impamvu z’uko igitabo yanditse kitakiriwe.

Abantu bazwi mu myidagaduro bahawe impamyabumenyi uyu mwaka ni Platini Nemeye (uririmba muri Drema Boyz), Claude Kabengera (ukora kuri radio Isango star), Elisee Mpirwa & Fiacre Igihozo (bakora muri IGIHE), Sabbin Murungi (ukora kuri Inyarwanda), Emmanuel Ntivuguruzwa (ukora kuri Radio Inteko), Liliane Umuhoza (ukora kuri City Radio), Bienvenu Redamptus &Godfrey Sangano Andrew Kareba (bakora kuri RTV) n’abandi.

Andi makuru avugwa mu myidagaduro...


Vd Frank na Dada Cross ngo bagiye kurushinga
Vd Frank ari kumwe na DadaCross i Mozambique

Nyuma y’igihe kitari gito atagaragara mu ruhame, umuhanzi Vd Frank akaba n’umukinnyi wa filime mu kiganiro yagiranye na IGIHE yadutangarije ko ahigiye mu myiteguro y’ubukwe bwe na Dada Cross.

IGIHE : Uraho Vd Frank

Vd : Uraho

IGIHE : Umaze iminsi myinshi utaboneka mu ruhame rwa muzika waba warahagaritse umuziki cyangwa ?

Vd : Oya umuziki ndacyawurimo ni uko muri iyi minsi mpugiye mu myiteguro y’ubukwe bwanjye ariko maze iminsi mike mvuye muri Zanzibar.

IGIHE : Umukunzi wawe se bamwita nde ? Ubukwe buzaba ryari ?

Vd : Nta wundi ni Dada Cross kandi tuzabukora vuba aha.

[Dada Cross ntitwabashije kuvugana nawe ngo agire icyo abitubwiraho.]

IGIHE : Ko mwari mwarahakanye ko mudakundana byagenze bite ?

Vd : Muri icyo gihe badushinja ko dukundana twari tutarakundana, ariko kubera guhorana cyane no kumenyerana none ahubwo ni uko tutashakaga ko bijya ahagaragara.

IGIHE : Bivugwako Dada Cross yari afite umukunzi mbere y’uko aza mu Rwanda ndetse banabanaga, ubwo ntiwaba waramukoreye gapapu ?

Vd : Nta gapapu nakoze, niba Dada Cross yari anafita umukunzi birashoboka kuko sinjye wa mbere twaba dukundanye, ariko nziko tujya gukundana yari yaratandukanye n’uwo mukunzi we.

IGIHE : muri Zanzibar wari waragiyeyo gukorayo iki ?

Vd : Nari naragiye kwerekanayo filime yanjye n’izindi nke z’Abanyarwanda nkanareba uko isoko ryaho uko rimeze, ntabwo ariho honyine nagiye, nageze Mozambique na Zambia.

Hose nasanze amasoko yabo ageze kure mu rwego rwa filime ndetse bakaba baranakunze filme zo mu Rwanda ariko basabye ko Abanyarwanda nibazajya bakina filime mu kinyarwanda bajye bashyiraho ubusobanuro bw’amagambo mu Cyongereza, ibyo bakunze kwita sub-title/sous titre.

Filme tuzibanira ya Vd Frank na Dada Cross

IGIHE : Ni igiki uhishiye abakunzi bawe ?

Vd : Abakunzi banjye mbahishiye byinshi kuko uyu munsi Tuzibanire igice cya II irajya ku isoko, muri iyi minsi. Muri muzika ho, mu kwezi gutaha nzasohora indirimbo 2, nkaba nzashyira ahagaragara Album yanjye ya kane mu mwaka utaha kuya 14 Gashyantare.

IGIHE : Urakoze kandi ukomeze kwitegura neza.

Vd : Urakoze nawe.


Mahogany Jones-Live, itsinda rikora injyana ya Hip-hop ryo muri Amerika i Kigali

Umwe mu baraperi bakomeye muri Amerika witwa Charyse Bailey ari kumwe n’itsinda rye rya Mahogany Jones-Live, bari mu Rwanda guhera ku itariki 19 kugeza 26 ukwakira 2012.

Barateganya kuzanakorera igitaramo kizabera kuri Petit Stade i Remera ku itariki 26 kwinjira bikazaba ari ubuntu. Iki gitaramo kije gikurikira icyo bakoreye kuwa Kabiri i Huye muri Kaminuza Nkuru y’u Rwanda.

Mahogany Jones- LIVE batoranyijwe na The Association of American Voices mu bufatanye na Ambasade y’Amerika mu bahanzi basabaga kuza gukora ibitaramo byiganjemo kwibanda ku muco barenga 300.

Iri tsinda rya Mahogany Jones- LIVE ryatoranyijwe mu bahanzi 12 bazakorana na Ambasade y’Amerika mu bitaramo bizenguruka isi mu rwego rwo gusakaza no kumenyekanisha umuco.

Iri tsinda rya Mahogany Jones-LIVE riyoborwa n’umukobwa witwa Mahogany Jones, watsinze inshuto nta wumuhiga mu irushanwa ry’ikiganiro cya BET’s 106 & Park’s “Freestyle Friday’s” mu 2001. Anakora mu kiganiro cya 5e’ The Foundation Open Mic cyibanda ku baraperikazi b’abagore.

Si igitaramo gusa aba bahanzi bazakora kuko barateganya n’ibindi birimo ingendoshuri, gufatanya n’abahanzi ba hano mu Rwanda, gukorana n’abanyamakuru, n’ibindi.


Senderi International agiye kurongora umukobwa witwa Zahabu

Eric Sederi Nzaramba, ubu witwa Senderi International Hit yatangarije IGIHE ko agiye kurongora umukobwa witwa “Zahabu”. Zahabu, iyi ikaba ari indirimbo ye nshya ari kumwe na "Two 4Real", ubu ikaba iri hanze mu mashusho.

Senderi avuga ko ubukwe buzaba mu mwaka utaha. Yagize ati “ngiye kurongora nibyo. Umukobwa yitwa Zahabu, arangije mu mashuri makuru. Nzamubazanira mu mumurebe kuri IGIHE”.

Uyu muhanzi uhorana udusha avuga ko uyu mukobwa azaba ari mu mashusho y’indirimbo ye nshya yahimbye mu njyana ya Hip-Hop.


Sonia Rolland arateganya kuza mu Rwanda

Abinyujije kuri Twitter, Sonia Rolla, umunyarwandakazi wabaye Miss France 2000, ari kwitegura kuza mu Rwanda muri gahunda y’umushinga we Maisha Afria yo kongera ishuri rya Ntarama ho mu Bugesera.

Sonia Rolland, witwa izina ry’ikinyarwanda rya Uwitonze, yagize ati “Sonia Rollad aritegura urugendo mu Rwanda rw’umuryango wanjye wa Maisha Africa. Gahunda ya 2013 yo kongera ishuri ryaa Ntarama… ni ukuvuga impano !”

Aya magambo yayanditse anagaragaza ifoto y’icyapoa cyanditseho kiti “G.S Ntarama Primary Section” kiyobora aho iryo shuri riri.

IGIHE Team : Gaston Rwaka, Joel Rutaganda, Teddy Kamanzi na Richard Irakoze

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO