Iteranamagambo ryubuye hagati ya Safi na Knowless

Iteranamagambo ryubuye hagati ya Safi na Knowless


Yanditswe kuya 5-06-2013 - Saa 07:25' na Richard Irakoze

Biri kuvugwa ko akangononwa n’agahinda Safi wo muri Urban Boyz yakomeje guterwa no kwamburwa umukunzi we Butera Knowless yakagaragarije mu ndirimbo nshyashya yitwa “Barahurura”.

Umwe mu banyamakuru b’imyidagaduro mu Rwanda, akaba n’umwe mu bakurikiranira hafi ibisobanuro by’indirimbo nyarwanda avuga ko amagambo yuzuye indirimbo nshyashya ya Urban Boyz "Barahurura" nta kindi Safi yashatse kuvuga uretse gusubiza amagambo Butera Knowless yaririmbye mu ndirimbo “Wari Uri He?” yavuzweho byinshi mu itangazamakuru.

Muri iyi ndirimbo "Barahurura", Safi atera agira ati “Iyo dushwanye barahurura, bagahururza. Ugira uti nari ndi he? Ese bo dukundana bari hehe? Oya si ndi umukara kandi si ndi n’umweru gusa nanga abanyiba umugono.”

Iyi ndirimbo "Barahurura" bivugwa ko Safi yaririmbye asubiza ni iyitwa “Wari Uri he?” Butera Knowless aheruka gushyira hanze umwaka ushize. Muri iyo ndirimbo “Wari Uri He?” Butera Knowless atera agira ati “Iyo ntaza kubona umukara samba naramenye ko umweru ubaho”, n’andi magambo yerekana ko yasaga n’uwari warayobye mu rukundo ariko ko ubu yabonye urukundo rwa nyarwo yifuzaga kuva kera ariko akarubura.

N’ubwo we yakunze kubihakanira itangazamakuru, byavuzwe kenshi ko indirimbo “Wari Uri He?” Butera Knowless yayihimbye ashaka gusobanura ko yishimiye kuba yaramenyanye na Producer Clement Ishimwe uyobora Kina Music [binavugwa ko ari we bakundana] wamubereye nk’uje mu rukundo amuhoza amarira Safi, wahoze ari umukunzi we yari yaramuteye.

Mu mvugo iteruye neza, Safi yabwiye IGIHE ko mu guhimba iyi ndirimbo "Barahurura" yahimbye agendeye ku buzima yabayemo. Gusa yanze kwerura ngo avuge ko ipfndo ry’iyi ndirimbo ari Knowless nyir’izina ariko agira ati “Mu guhimba njye ngendera ku bijyanye n’ubuzima mbamo”.

Safi na Knowless bakomeje guterana amagambo mu rukundo rwabo bitana ba mwana ku cyatumye batandukana. Gusa abahanga mu by’ibisobanuro by’amagambo y’indirimbo nyarwanda z’ubu bagaragaza ko iyi ndirimbo nshya ya Urban Boyz Safi agaragaza ko atashimishijwe no kuba yaratandukanye na Knowless bivugwa ko ubu akundana na Producer Clement Ishimwe.

Safi na Knowless ubwo bari mu rukundo

Umva amagambo ari izo ndirimbo zombi:

Umwe mu banyamakuru yemeza ko Safi yifashishije "Barahurura" ngo abwire Clement (uri i bumoso) ko yamwibye umugono amutwara Butera Knowless (uri i buryo)
Bivugwa ko Clement ari we wigaruriye Knowless mu rukundo
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO