Urban Boyz ivugwamo gucikamo ibice ‘ikeneye amasengesho’

Yanditswe na Munyengabe Murungi Sabin
Kuya 19 Kanama 2015 saa 09:01
Yasuwe :
0 0

Safi Niyibikora, Nshimiyimana Muhamed(Nizzo) na Manzi James(Humble Jizzo) bagize Urban Boyz, bakeneye gusengerwa no kuramburirwaho ibiganza n’abakozi b’Imana basize amavuta kugira ngo bakomeze bunge ubumwe nk’itsinda aho gucikamo ibice nk’uko benshi babikeka.

Urban Boyz ni bahanzi rukumbi bari imbere y’abandi mu Rwanda mu muvuduko wo kwambutsa imipaka umuziki nyarwanda. Ni bo bayoboye abandi mu gukorana n’ibyamamare bikomeye muri muzika haba mu Karere ndetse no muri Afurika muri rusange.

Mu minsi mike ishize, iri tsinda ryavuzwemo gucikamo ibice no gutatanya imbaraga biturutse ahanini ku kuba buri muhanzi muri bo yari asigaye akorana indirimbo n’abandi bahanzi bitanyuze mu itsinda bityo benshi bakabibona inzira yo gusenyuka kwa ‘Urban Boyz’.

Mu mpera z’icyumweru gishize, Urban Boyz yatangarije Isango Star ko bavugutiye umuti ikibazo cy’abagize iri tsinda bari bamaze iminsi bakorana indirimbo n’abandi bahanzi buri wese ku giti cye bidakozwe nk’itsinda.

Ngo kugeza ubu, nta n’umwe mu bagize Urban Boyz wemerewe gukorana n’undi muhanzi uturutse ku ruhande bikitirirwa uwo muhanzi aho kwitirirwa itsinda muri rusange.

Manzi James uzwi nka Humble, yatangarije Isango Star ko bamaze kugirana ibiganiro hagati yabo bagasanga bajya bakorana collabo n’abandi bahanzi nk’itsinda ryose aho kuba umwe.

Uyu mwanzuro ntiwabujije abantu gukomeza gukeka ko Urban Boyz iri mu marembera gusa Humble Jizzo umwe mu bagize iri tsinda yasobanuye ko ubumwe bwabo ntaho buzajya ndetse asaba Abapasiteri n’abandi bakozi b’Imana gusengera iri tsinda hato umwanzi atazarica urwaho akaricamo ibice.

Yagize ati “Abapasiteri musengera Urban Boyz. Urban Boyz uzabeho akaramata tutitaye ku byo abantu batekereza cyangwa bavuga […] turacyari itsinda rimwe”

Urban Boyz, ni itsinda ryatangiye umuziki mu mwaka wa 2008 ubwo ryabaga mu Majyepfo y’u Rwanda i Butare. Ryatangiye rigizwe n’abasore batanu gusa bamwe bavamo risigaramo batatu.

Safi, Nizzo na Humble Jizzo, abasore bigaranzuye benshi mu muziki w’u Rwanda baratangiriye mu cyaro, ubu ni bo bari imbere y’abandi mu gukorana n’ibyamamare byinshi mu muziki wo muri Afurika.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza