Bwa mbere mu mateka ye, Young Grace yaririmbye yambaye ingutiya(VIDEO)

Yanditswe na

Munyengabe Murungi Sabin

Kuya 23 Kamena 2014 saa 10:29
Yasuwe :
0 0

Abayizera Marie Grace wahisemo amazina y’ubuhanzi ya Young Grace, kuva mu mwaka wa 2011 atangiye kwigaragaza mu muziki kugeza ubu, mu bitaramo byose yitabiriye by’umwihariko mu buzima busanzwe kumubona yambaye ingutiya ntibipfa kubaho.
Mu gitaramo cya mbere cya Live abahanzi 10 bahatanira PGGSS4 bakoreye mu mujyi wa Kigali kuwa Gatandatu tariki ya 21 Kamena 2014, uyu muraperikazi wamenyekanye cyane mu ndirimbo nka Mpa umusada, Uri Final, Like a Boy n’izindi, yatunguye abari bitabiriye iki (...)

Abayizera Marie Grace wahisemo amazina y’ubuhanzi ya Young Grace, kuva mu mwaka wa 2011 atangiye kwigaragaza mu muziki kugeza ubu, mu bitaramo byose yitabiriye by’umwihariko mu buzima busanzwe kumubona yambaye ingutiya ntibipfa kubaho.

Mu gitaramo cya mbere cya Live abahanzi 10 bahatanira PGGSS4 bakoreye mu mujyi wa Kigali kuwa Gatandatu tariki ya 21 Kamena 2014, uyu muraperikazi wamenyekanye cyane mu ndirimbo nka Mpa umusada, Uri Final, Like a Boy n’izindi, yatunguye abari bitabiriye iki gitaramo aza ku rubyiniro yambaye ingutiya igera hejuru y’amavi ndetse n’ababyinnyi be b’abakobwa bakaba bari bambaye utwenda tugufi cyane.

Senderi hano yibazaga uburyo Young Grace agiye kuririmba yambaye atya nyamara atazi ko umukobwa yitwaje ijipo mu gikarito.
Young Grace ati, "umukecuru ni umukecuru"

Uyu mukobwa ukunze kugaragara yambaye nk’abahungu, mu myaka igera kuri ine amaze mu muziki, ni ubwa mbere yaje ku rubyiniro yambaye ingutiya by’umwihariko akambara impenure nyamara yari asanzwe yiyambarira nk’abasore bakora Hip hop ndetse akaba yaranyuzagamo na we akambarira ipantaro munsi y’ikibuno(pocket down)

Imiririmbire ya Young Grace mu buryo bwa Live ihagaze ite?

Mu mwaka wa 2012 nibwo Young Grace yinjiye bwa mbere muri PGGSS2 ndetse akaba yarakoze iyo bwabaga yigaragaza neza ava mu irushanwa ageze mu cyiciro cya nyuma aho yari ahanganye n’abahanzi bakomeye mu Rwanda nka King James, Jay Polly na Knowless.

Muri uwo mwaka, Young Grace yavuyemo bigoranye cyane dore ko yigaragazaga neza haba mu buryo bwo gutorwa binyuze ku butumwa bugufi, mu kuririmba live no guhanga udushya mu bitaramo byaberaga hirya no hino mu gihugu aba bahanzi biyereka abafana babo.

Mu bitaramo byo kuririmba Live byabaye muri PGGSS2, Young Grace yatunguye benshi ubwo abakomeye kumurusha barimo Riderman, Urban Boyz, Bull Dogg, Dream Boyz n’abandi, basezerewe kubera imiririmbire ya Live no gutorwa kwabo byari hasi kurusha uyu mukobwa.

Muri iki gitaramo cya mbere cya Live cyabereye i Kigali kuwa Gatandatu tariki ya 21 Kamena, Young Grace yari yongeye kugaragaza ko kuba yaragarutse muri iri rushanwa hari byinshi amaze kwiyungura, haba mu gutegura urubyiniro, kwambara, kuririmba no kwigirira icyizere imbere y’abafana.

Nguwo Young Grace azunguza umubyimba n'ababyinnyi be

Ibisabwa kugira ngo umuhanzi abone amanota meza muri ibi bitaramo bya Live : Kugira abafana benshi (popularity 50%), uko aririmba(performance30%), uko agaragara ku rubyiniro(stage appearance10%) n’ikinyabupfura(Discipline10%).

Abafana n’igikundiro cya Young Grace byifashe bite?

Nubwo Young Grace yari yakoze iyo bwabaga ngo yemeze abafana n’akanama nkemurampaka, ubwitabire no kwigaragaza kw’abitwa ko ari abafana be kwagerwaga ku mashyi. Yari yagerageje gutegura neza urubyiniro, ababyinnyi abambika neza ndetse na we aza agaragara nk’umuntu mushya ariko nta bafana uyu mukobwa yari afite.

Ni ubwa mbere Young Grace yaririmbye yambaye ingutiya

Utabariyemo abafana umuhanzi ntibabyerekane bakabigumana ku mutima, abagaragaje ibyishimo bari bafitiye uyu mukobwa babarirwaga ku ntoki dore ko yanabasaga kuzamura amaboko ngo baririmbana na we amaboko bakayagumisha mu mifuka.

Imiririmbire ye

Ubwo yatangiraga kuririmba BINGO ari nayo yahereyeho, Young Grace yatangiranye ingufu ndetse n’abacuranzi be bagerageje kuyicuranga ukumva ko ijya kumvikana nk’iyo Young Grace yakoreye muri studio.

Uyu mukobwa yatangiye kuririmba wumva ko afite ingufu muri we ndetse n’ijwi ryasohokaga neza ndetse rikumvikana kurusha urusaku rw’ibicurangisho. Uko iminota yagiye ishira, niko Young Grace yagiye ananirwa ariko kubera icyizere yari yifitiye akomeza guhanyanyaza araririmba.

Ku ndirimbo Ikimenyane, ari nayo yaririmbye ubwo hatoranywaga abahanzi binjiye muri PGGSS4 mu gitaramo cyabereye i Gikondo muri Werurwe 2014, uyu mukobwa n’abacuranzi be bagerageje kuyikora neza. Ubwo iyi ndirimbo yatangiraga, Young Grace yanyuzagamo akabyinana n’abana batatu b’abahungu yari yazanye.

Ababyinnyi be yari yabambitse imyenda isa n'iye

Uko ijwi rye risanzwe rumvikana mu ndirimbo ze, siko ryasohokaga muri iki gitaramo cya mbere yakoreye i Kigali. Urebye uko Young Grace yaririmbaga muri 2012 ubona ko kuri iyi nshuro ya kabiri yinjiye muri PGGSS amaze kongera ubumenyi mu miririmbire gusa ijwi ryo akeneye kurikora cyane dore ko muri iki gitaramo hari aho yageraga ukumva ko ingufu zibuze agasa n’usubiye hasi yahagira.

Uko yagaragaraga ku rubyiniro n’ikinyabupfura

Mu bijyanye no kugaragara neza ku rubyiniro, uyu mukobwa ashobora kuzabona aya manota kuko ni umwe mu bahanzi bari bagerageje kwambara neza, kwerekana ko bamaze igihe bitegura iki gitaramo ndetse ibyo yakoraga akajyana n’abacuranzi ndetse n’ababyinnyi be.

Ku bijyanye n’ikinyabupfura , ku giti cye yari afite amanota gusa ababyinnyi be bashobora kuzamubuza make dore ko abakobwa yazanye ku rubyiniro agitangira kuririmba Bingo bari bambaye mu buryo bwatumye benshi babibazaho.

Iyi ni imyambarire y'umwe mu bakobwa Young Grace yazanye ku rubyiniro. Foto/Umuseke

Abo bana b’abakobwa Young Grace yazanye ku rubyiniro, bari bambaye utujipo tugaragaza amatako nyamara mu mabwiriza bahawe bagomba gukurikiza ku rubyiniro harimo gukora iyo bwabaga ntibagaragaze imico itari myiza haba mu myambarire no mu mivugire yabo.

REBA UKO YOUNG GRACE YARIRIMBYE LIVE I KIGALI:

AMAFOTO: Faustin N
VIDEO: Eliel Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza