Kwambara uruhu rw’abahungu byatumye Young Grace ahigika bamwe mu bahanzi(VIDEO)

Yanditswe na

IGIHE

Kuya 29 Kamena 2014 saa 03:18
Yasuwe :
0 0

Abayizera Marie Grace benshi bazi nka Young Grace, ni umwe mu bahanzi 10 bahatanira PGGSS4. Uyu mukobwa umaze kugaragaza ko atagira isoni za gikobwa no kugira ubwoba igihe ageze ku rubyiniro, byose abikesha kuba yarakuze yambaye uruhu rw’abahungu nyamara ari umukobwa.
Ugereranyije n’igihe amaze aririmba, Young Grace amaze gutera intambwe ikomeye dore ko ari umwe mu bakobwa bahagaze neza mu muziki dore ko amarushanwa yose akomeye ayitabira ndetse akenshi akavamo yegukanye ibihambo. Ku nshuro (...)

Abayizera Marie Grace benshi bazi nka Young Grace, ni umwe mu bahanzi 10 bahatanira PGGSS4. Uyu mukobwa umaze kugaragaza ko atagira isoni za gikobwa no kugira ubwoba igihe ageze ku rubyiniro, byose abikesha kuba yarakuze yambaye uruhu rw’abahungu nyamara ari umukobwa.

Ugereranyije n’igihe amaze aririmba, Young Grace amaze gutera intambwe ikomeye dore ko ari umwe mu bakobwa bahagaze neza mu muziki dore ko amarushanwa yose akomeye ayitabira ndetse akenshi akavamo yegukanye ibihambo.

Ku nshuro ya kabiri Young Grace yinjiye muri PGGSS, hari intambwe ikomeye amaze gutera, haba mu buryo bw’imiririmbire n’uburyo yigaragarizamo abafana ubona ko ari umukobwa utagirira igihunga abafana bitewe n’ubwinshi bwabo nk’uko bigenda kuri bamwe Babura amanota mu marushanwa cyangwa bakava mu muziki kubera kunanirwa guhangana n’ibibangamira umukobwa.

I Muhanga Young Grace yerekanye itandukaniro

Mu gitaramo cya Live i Muhanga, Young Grace yaririmbye akoresheje ijwi rye ari wenyine ku rubyiniro bitandukanye cyane no mu bindi bitaramo bya PGGSS yagiye yitabira aho yazanaga ababyinnyi cyangwa abakobwa bagenzi be bamufasha kugira ngo yemeze abafana be.

Mu kweto, ipantaro n’ikote by’abahungu, Young Grace niko yageze ku rubyiniro yambaye maze atangira kuririmba akoresheje ijwi rye bwite nta mudasobwa zikoreshejwe nk’uko bigenda mu bindi bitaramo. Nubwo nta babyinnyi yari afite, uyu mukobwa yagaragaje ko hari intera ikomeye iri hagati y’uburemere bw’ibyo yakoze mu gitaramo cya live giherutse kubera i Kigali n’icyo yaraye akoreye i Muhanga.

Reba uko yaririmbye i Kigali:

Nk’uko akanama nkemurampaka kabisabye abahanzi, ibisabwa kurusha ibindi kugira ngo umuhanzi atahane amanota meza, harimo kuba akunzwe, aririmba live bikumvikana ko indirimbo ari isanzwe yumvwa kuri radiyo cyangwa kuri mudasobwa nk’uko iba yaravuye muri studio ivuga ndetse no kurangwa n’ikinyabupfura, haba mu magambo avuga, uko yambaye n’uko yitwara imbere y’abafana.

Muri ibi byose bisabwa ko umuhanzi abyuzuza kugira ngo yemeze abafana n’akana gatanga amanota, Young Grace yabashije kuririmba wumva ijwi rye risohoka neza, nta kunanirwa ngo ijwi risubire hasi cyangwa aririmbe bidafite injyana. Yanabonye amanota meza kandi mu bijyanye no kugaragaza ikinyabupfura no kubasha kwemeza abafana.

Nubwo atari afite abafana benshi ngo bigaragare ko stade ya Muhanga yayihagurukije, Young Grace yerekanye ko amaze kwigirira icyizere ku rubyiniro, kudatinya cyangwa ngo atebwe ubwoba n’ubwinshi bw’abafana. Hari benshi mu bahanzi yarushije kandi bari bafite ababyinnyi cyangwa bamurusha izina n’ibikorwa mu muziki.

Mu kiganiro yagiranye na IGIHE nyuma yo kuririmbira i Muhanga, yasobanuye ko na we ubwe amaze kuririmba yumvise ko hari itandukaniro rikomeye hagati y’uko yaririmbye i Kigali n’uko yitwaye mu majyepfo.

Kuva mu bwana bwe yitwara nk’abahungu

Ntiyitwaye nk’abahungu atangiye umuziki ahubwo akimenya ubwenge yasanze umubiri we umutegeka kwiberaho nk’abahungu. Gusa uburyo bw’imikorere y’umubiri we ni kimwe n’abandi bakobwa. Kuba yitwara nk’abahungu, akambara nkabo ndetse ahanini akaba ari bo akunda kugendana na bo, Young Grace yemeza ko ari kimwe mu bimuhesha gukomeza kujya imbere no gushirika ubwoba ku rubyiniro.

Ati, “Njye rero nakuze mfite imyitwarire ya gihungu haba no mu muryango wanjye, ku ishuri n’ahandi. Nko mu rugo mfite ababyeyi badutetesha cyane ku buryo burenze ariko wumve ko njye nangaga guteteshwa cyangwa kw akundi abakobwa bakunda ko ababyeyi babasura ku ishuri. Njye sinabyemeraga kabisa nabaga nimereye nk’abajama(abahungu), ntabyo gukumbura ababyeyi. Njye byabaga bigoye ko wansaga mu dutsinda tw’abakobwa baganira ibiganiro bya gikobwa, wapi kabisa nabaga ndi mu bajama twiterera story(twiganirira)”

Kwitwara nk’abahungu ngo bimufasha byinshi

Yiga mu mashuri abanza n’ayisumbuye, Marie Grace yambaraga impuzankano(uniforme) y’abahungu ndetse n’ubuyobozi bw’ikigo bukabyemera kuko babonaga ari byo bimubereye ari na wo muco we kuva kera.

Ati, “No ku ishuri nambaraga ipantaro kabisa abayobozi bankunda babona ntandukanya cyane n’abandi bakobwa. Ni ko nakuze nyine ariko ndi umukobwa nubwo nambara ntyo”

Amaze kwiyumvamo impano yo gukora umuziki, mu bitekerezo bya Young Grace yahise yiyumvamo injyana ya Hip hop ndetse muri we yishyiramo ko agomba kuwukora gihungu nubwo ari umukobwa muri we.

Imyitwarire, imyambarire n’imibereho ya gihungu Young Grace akunda kubamo ni yo yamufashije kwigirira icyizere , kudatinya no gutera imbere mu muziki.

Ati, “Njya kwinjira mu muziki rero nagomba kuza nk’uko nteye nyine niyo mpamvu nambara kuriya ni ukuva kera . Niba ari ukubera no gukura bigenda bishira murabibona namwe ko nyuzamo nkambara ibya gikobwa kuko ndi umukobwa ariko ahanini nkunda kwambara imyambaro ya gisore cyane kukoo usanga binajyanye n’injyana nkora ya hip hop.”

Akomeza agira ati, “Uburyo mba nambayemo mba mbwishimiye, mba numva nuzuye nta kintu na kimwe cyampungabanya nanagera imbere y’abafana uko baba bangana kose nkabazitura. Nizeye ko nzakomeza gutera imbere kuko ndi gukura sindi gusubira inyuma. Kubera gukunda kwitwara bya kigabo byanteye no gukora indirimbo nise Like A Boy”

REBA UKO YOUNG GRACE YARIRIMBYE LIVE:


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza