Young Grace waburiwe irengero arashakishwa na Polisi y’u Rwanda

Yanditswe na

Munyengabe Murungi Sabin

Kuya 20 Mata 2015 saa 06:28
Yasuwe :
0 0

Young Grace ugiye kumara ibyumweru bitatu ari ahantu hatazwi arashakishwa na Polisi y’u Rwanda kubera ikirego akurikiranyweho cyo gutanga sheki itazigamiye yahaye umwe mu bantu abereyemo imyenda.

Ku itariki ya 14 Mata 2015 IGIHE yatangaje inkuru yavugaga ko hari umucuruzi wo mu Mujyi wa Kigali wajyanye Young Grace mu butabera nyuma y’uko yari yamuhaye sheki ya miliyoni ebyiri itazigamiye. Icyo gihe twashakishije Young Grace ngo asobanure iby’iki kirego akurikiranyweho turamubura , twabajije umuryango we uvuga ko utazi aho asigaye aherereye ndetse kugeza ubu na wo uri mu rujijo.

Amakuru y’uko Young Grace ashakishwa na Polisi y’u Rwanda kubera sheki ya miliyoni ebyiri yatanze itariho amafaranga agitangira kuvugwa benshi babifataga nk’impuha ndetse mu kiganiro twagiranye n’Umuvugizi wa Polisi mu Mujyi wa Kigali yari yavuze ko nta kintu arabimenyaho.

Young Grace ukurikiranyweho gutanga sheki itazigamiye

Kuva mu ntangiriro za Mata 2015 kugeza ubu, Young Grace ntakigaragara i Kigali ntaheruka gukandagiza ikirenge ku icumbi rye riherereye muri Nyakabanda mu Mujyi wa Kigali. Biragoye cyane kumenya amakuru y’ahantu aherereye, kumufatisha ku murongo wa telefone cyangwa irindi tumanaho iryo ari ryo ryose akoresha na byo ni ingorabahizi.

Umuzi wo kuburirwa irengero kwe…

Amakuru yizewe IGIHE ikesha bamwe mu bazi ibya Young Grace, yemeza ko hari umucuruzi wahaye Young Grace miliyoni ebyiri z’amafaranga y’u Rwanda bemeranywa itariki n’ukwezi uyu mukobwa yagombaga kwishyuriraho aya mafaranga ariko ubukene buramwitambika ntiyabasha gusubiza ibyo yahawe uko babisezeranye.

Haba i Rubavu na Musanze asanzwe akunda kuruhukira ngo ntaheruka kuhagera

Nyiri guha Young Grace aya mafaranga yakomeje kumushyiraho igitutu ngo amwishyure undi abuze uko abigenza amusinyira sheki ya miliyoni ebyiri. Undi agihabwa iyi sheki, feri ya mbere yayifatiye kuri banki yizeye neza ko agiye kubikuza umutungo we nyamara ntibyakunze kuko akigerayo bamubwiye ko nta faranga na rimwe uyu mukobwa afite kuri konti.

Uyu mugabo ngo amaze kubona ko Young Grace yamupfunyikiye amazi yahise ajyana ikirego muri Polisi kugira ngo ikurikirane uyu mukobwa. Young Grace yaba yarafashe umwanzuro wo kuva i Kigali nyuma yo kumenya ko ari gushakishwa n’inzego z’umutekano.

Umuryango we wasigaye mu rujijo

King Philosophe musaza wa Young Grace banabana mu nzu bakodesha i Kigali yabwiye IGIHE ko na we atazi irengero rya mushiki we ndetse ubwo aheruka gusura umuryango we i Rubavu ngo ntiyamusanzeyo.

Yagize ati “ntabwo nzi ahantu ari pe, ubwo mperukana na we yambwiye ko ngo agiye muri deals(gahunda) ze ariko ntabwo mbizi. Nanjye numva telefone ye ifunze, sinzi ahantu ari”

Uyu muhanzi wahoze muri Super Level ubu akurikiranyweho ubwambuzi no gutanga sheki itazigamiye

Abajijwe amakuru ya nyuma afite kuri mushiki we cyangwa niba yaba azi amerekezo aherereyemo, yasubije agira ati “Naba nkubeshye. Ntabyo nzi”.

Musaza wa Young Grace kandi ngo ntabwo azi niba mushiki we hari imyenda akurikiranyweho ndetse ngo nta makuru ahagije na we amufiteho nubwo bavukana.

Polisi y’u Rwanda yemeje ko ikurikiranye uyu mukobwa

Umuvugizi wa Polisi y’u Rwanda CSP Celestin Twahirwa yabwiye Izuba Rirashe ko uyu muryango[na wo uvuga ko utazi irengero ry’umwana wabo] utarageza ikirego kuri Polisi uvuga ko Young Grace yabuze.

Arashakishwa na Polisi y'u Rwanda

Ahubwo, umuvugizi wa Polisi mu Mujyi wa Kigali, Supt. Mbabazi Modeste, yemeje amakuru yari amaze iminsi avugwa, ko koko hari sheke itazigamiye Young Grace yahaye umuntu, bityo ko ashakishwa na Polisi.

Yagize ati "Sitasiyo ya Polisi y’i Nyamirambo hari sheke itazigamiye imukurikiranyeho. Twaramuhamagaye ntiyitaba, ubu igisigaye ni ugukurikiza inzira zisanzwe ziteganywa n’amategeko agakurikiranwa.”

Twitter: @murungisabin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza