Diamond yasangiye n’abahanzi bo mu Rwanda bemeranya ubufatanye

Yanditswe na Dusabimana Aimable
Kuya 22 Mutarama 2018 saa 02:47
Yasuwe :
0 0

Umuhanzi Diamond Platnumz wari umaze iminsi ine mu ruzinduko i Kigali yarusoje aganira n’abahanzi batandukanye bakorera umuziki mu Rwanda mu kungurana inama ku iterambere ry’ibikorwa byabo no kumenyana birushijeho.

Uyu musangiro wabaye mu ijoro ryo ku Cyumweru rishyira kuri uyu wa Mbere, tariki 22 Mutarama 2018. Muri iki gikorwa cyateguwe bigizwemo uruhare na Clouds Tv, Diamond yaganiriye n’abahanzi barenga icumi ndetse n’abarimo abajyanama bakomeye mu muziki w’u Rwanda bungurana ibitekerezo.

Abahanzi bo mu Rwanda n’abafite aho bahurira n’uruganda rwa muzika bitabiriye ibi biganiro barimo Deejay Pius, Pastor P, Uncle Austin, Marina, Muyoboke Alex, Riderman, Safi Madiba na Baad Rama uyobora The Mane abarizwamo.

Ndayisaba Lee uyubora Clouds Tv mu Rwanda iri mu bagize uruhare mu mitegurire y’urugendo rwa Diamond i Kigali n’iki kiganiro, yabwiye IGIHE ko intego nyamukuru mu byaganiriweho nubwo byose bitashyizwe mu itangamakuru ari ukumenyana birushijeho, banemeranyijwe n’ubufatanye mu mishinga itandukanye.

Yagize ati "Bicaye baraganira, yabanyuriyemo inkuru y’ubuzima bwe, umuziki uburyo awukora, aho ageze, igituma abasha kugera aho ageze ubu. Muri make ni ukungurana inama uburyo bakora umuziki, kuwumenyekanisha. Ni byinshi baganiriyeho. Baganiriye hafi kugera saa munani z’ijoro."

Yongeyeho ati "Bemeranyijwe ubufatanye, bahanye nimero za telefoni habaho kumenyana birushijeho, icyari kigenderewe cyane ni ukugira ngo baganire ibindi bazagenda babivugana ku giti cyabo."

Naseeb Abdul Juma [Diamond] umaze gukora ibihangano byinshi byamenyekanye bimushyira mu bakomeye muri Afurika, yageze i Kigali mu gitondo cyo wa Gatanu tariki ya 19 Mutarama 2018. Yaje muri gahunda ze bwite n’ibindi bikorwa.

Mu kiganiro Diamond aherutse kugirana n’itangazamakuru ryo mu Rwanda mu mpera z’icyumweru gishize, yavuze ko mu mishinga yamuzanye harimo no kureba uburyo yatangiza ibikorwa bya Wasafi Records mu Rwanda, abifashijwemo n’abasanzwe basobanukiwe uruganda rw’umuziki w’imbere mu gihugu akaba yabona abahanzi bafite impano bakorana.

Naseeb Abdul Juma [Diamond] amaze gukora ibihangano byinshi byamenyekanye bimushyira mu bakomeye. Yaririmbye indirimbo zizwi zirimo ’Mbagala’, ‘Nataka Kulewa’, ‘Moyo Wangu’, ‘Nana’ na ‘Number One’ yasubiranyemo na Davido, igatuma amenyekana muri Afurika.

Abajyanama ba Diamond bari mu batanze ibitekerezo muri iyi nama
Baad Rama ukuriye inzu ya The Mane ibarizwamo Safi atanga ibitekerezo
Riderman atanga ibitekerezo muri uyu musangiro
Umuhanzikazi Marina nawe yari ahari
Diamond ngo yabanyuriyemo uko yateye imbere mu muziki
Dj Pius ari mu bahanzi baganiriye na Diamond
Producer Pastor P atanga igitekerezo
Safi Madiba ni umwe mu bitabiriye ibi biganiro
Uncle Austin ni umwe mu bitabiriye ibi biganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza