Igisekuru gishya muri muzika nyarwanda

Yanditswe na Uwiduhaye Theos
Kuya 19 Ugushyingo 2018 saa 09:52
Yasuwe :
0 0

Umunyarwanda yaravuze ngo ‘ibihe biha ibindi’ bishatse kuvuga ko buri rungano rugira ayarwo ari nako ubu bimeze mu muziki nyarwanda.

Tutagiye kure, ntawe uzibagirwa uburyo Miss Jojo, Rafiki, Mako Nikoshwa, Dr Claude n’abandi bihariye umuziki nyarwanda mu buryo bukomeye mu myaka ya 2004.

2008 abandi bahanzi barimo Tom Close, The Ben, King James, Butera Knowless, Urban Boyz, Meddy, Tough Gangz, Riderman bahise babagigika bazana impinduka z’injyana zitandukanye zirimo iz’iya Hip Hop na R&B bitari bimenyerewe mu Rwanda.

Ndetse hari n’abandi baje nyuma y’aba barimo Charly na Nina, Bruce Melodie, Christopher, Queen Cha n’abandi berekana impinduka zitandukanye mu muziki nyarwanda.

Ubu hari izindi mpano ziri kwishimirwa na benshi muri iki gihe zitanga icyizere cyo kuzakorera mu ngata abazibanjirije bakakanyuzaho bigatinda mu myaka yashize n’ubu bamwe bakaba bagifite igikundiro.

IGIHE yaganiriye n’abatunganya indirimbo barimo Pastor P, Clement Ishimwe, Knox, Iyzo, Bagenzi Bernard, Ency Pro, Bob Pro na MadeBeat nka bamwe mu nararibonye zihorana n’abahanzi.

Badutangarije abahanzi babona batanga icyizere cyo kugeza umuziki nyarwanda ku rwego mpuzamahanga. Muri abo, twakoze urutonde rw’icumi bahanzwe amaso.

Buravan

Burabyo Dushime Yvan ni umuhanzi w’umuhanga mu njyana ya R&B, yirahirwa na benshi kubera ijwi rye n’imiririmbire ihogoza abiganjemo igitsina gore.

Ni umusore w’imyaka 22 ubarizwa mu nzu ifasha abahanzi ya New Level.

Yatangiye kumenyekana cyane mu Rwanda mu 2016 bitewe n’indirimbo yakoze muri icyo gihe zirimo ‘Bindimo’, ‘Malaika’ n’izindi. Ubu agezweho muri ‘Garagaza’ na ‘Si belle’ aherutse gushyira hanze, ari no kwitegura kumurika album ye ya mbere yise ‘The love lab’.

Ubuhanga bwe bwamushyize mu bahanzi b’abahanga bahataniye igihembo cya Radiyo Mpuzamahanga y’Abafaransa,RFI, cyiswe Prix Decouverte 2018 aza no kucyegukana.

Igor Mabano

Uyu musore w’imyaka 23 ni umwe mu bafite impano ihambaye mu muziki biturutse ku bumenyi yavomye mu ishuri ry’umuziki ryo ku Nyundo yasorejemo amasomo ajyanye n’imiririmbire no kuvuza ingoma.

Yatangiye gutuma benshi bamwirahira muri Kamena uyu mwaka ubwo yashyiraga hanze indirimbo yise ‘Iyo utegereza’.

Ubu afite indi nshya yise ‘Back’ nayo iri mu zikunzwe mu Rwanda muri iki gihe. Akora cyane injyana yiganjemo R&B.

Alyn Sano
Aline Sano Shengero ni umukobwa w’impano itangaje. Mu muziki yahisemo kwitwa Alyn Sano.

Avuka ari uwa gatatu mu muryango w’abana batanu. Ahuza amateka n’abandi bahanzi bo mu Rwanda barereye impano yo kuririmba muri korali zo mu nsengero bigakomeza inganzo yabo.

Sano amaze imyaka ibiri mu muziki ariko mu kiganiro yagiranye na IGIHE mu minsi ishize yavuze ko mu 2018 yiyemeje kongeramo imbaraga nyuma yo kurangiza amasomo ya Kaminuza muri Akilah Institute.

Yamenyekanye cyane mu ndirimbo zirimo iyitwa ‘Witinda’, ‘Naremewe wowe’ n’izindi. Abakunze gusohokera mu gisope banyurwa n’ijwi rye ndetse n’ubuhanga bwe buhebuje.

Victor Rukotana

Ubusanzwe yitwa Mporera Victor ariko yahisemo kwinjirana mu muziki Victor yongeraho na ‘Rukotana’ rya Sekuru. Ni umusore w’imyaka 22 wavukiye i Ngoma.

Yatangiye umuziki nk’akazi mu 2017 ahita akora indirimbo yitwa ‘Mama Cita’, ‘Sweet love’ ndetse na Promise aherutse gushyira hanze.

Yabwiye IGIHE ko mu myaka itanu ashaka kuba ari umwe mu bahanzi bakomeye bishyurwa agatubutse n’urubuga rwa Youtube, yitabira amaserukiramuco akomeye ndetse anafite album ye.

Ati “Mu myaka itanu Imana niba ikintije ubuzima n’imbaraga ndashaka kuzaba mfite album yanjye iri ku mbuga zose zicuruza umuziki, ndi mu bahanzi Youtube yishyura cyane, naritabiriye amaserukiramuco atandukanye… imbere izina ryanjye ndaribona rikomeye cyane.”

Andy Bumuntu

Ni umuhanzi uririmba mu njyana ya Blues ivanzemo gakondo ya Kinyarwanda, amazina yiswe n’ababyeyi ni Kayigi Andy Dick Fred afite imyaka 23, yahisemo gukoresha izina ry’ubuhanzi rya “Andy Bumuntu”.

‘Andy’ ni rimwe mu mazina yiswe n’ababyeyi naho ‘Bumuntu’ arihitamo nk’iry’ubuhanzi agendeye ku bumuntu n’umutima ucyeye yiyumvamo kugira ngo birusheho kuba umwimerere we.

Izina rye ryatangiye kumvikana mu matwi ya benshi mu 2016 ubwo yashyiraga hanze indirimbo yise ‘Ndashaje’ yakanguye ibyiyumviro by’abato n’abakuru kubera impano z’uruvangitirane zari zuzuyemo.

Yakomeje kwigwizaho abakunda ibihangano bye mu Ukwakira umwaka ushize ubwo yashyiraga hanze indirimbo yise ‘Mine’. Benshi bamukundira ubuhanga mu miririmbire ye ahuza n’ijwi riremereye afite.

Ni umuvandimwe wa Umutare Gaby.

Marina

Amazina yiswe n’ababyeyi ni Uwase Ingabire Marine yavutse mu 1996, yasoje kwiga amashuri yisumbuye mu bijyanye n’icungamutungo mu 2016.

Kuza kwe mu muziki byaje nk’ubufindo mu 2017 kuko yahamagaye kuri Radiyo Kiss Fm mu kiganiro cya Uncle Austin agatoranywa mu bandi bari bahatanye na we.

Yaje gushaka nimero za telefoni za Uncle Austin barahura, uyu mugabo yishimira ubunga bw’imiririmbire atangira kumufasha nyuma aza kumutanga muri label ya The Mane ari n’aho abarizwa kugeza aha.

Ni umwe mu bahanzi b’abahanga bari kugaragaza impano idashidikanywaho mu muziki. Yamenyekanye cyane mu ndirimbo yatangiriyeho yise ‘Byarara bibaye’, ‘ Marina’, ‘ Log Out’, ‘ Love You’ yakoranye na Harmonize wo muri Tanzania n’izindi.

Ben Adolphe

Uyu musore ni umwe mu banyuze mu ishuri ry’umuziki ryahoze ku Nyundo, afite ubuhanga bwihariye mu gucuranga Gitari.

Ubusanzwe yitwa Murinda Benjamin Adolphe, amaze gukora indirimbo zirimo ‘Ni rurerure’, ‘Ni rushya’ n’izindi.

Ni umwe mu banyempano bakomoka i Rubavu bari kwigaragaza muri iki gihe kandi agatanga icyizere cyo kugeza umuziki we kure.

Jean Luc Ishimwe

Ishimwe Jean Luc w’imyaka 22 yazamukiye mu irushanwa ryo gufasha abafite impano idasanzwe yo kuririmba ryateguwe na King James. Uyu muhanzi ukiri muto yakomeje kwigaragaza mu ndirimbo zitandukanye zakiriwe neza n’abakurikira muzika y’u Rwanda.

Yaririmbye izirimo iyitwa ’Uri Uwanjye’, ’Nimpagera’, ’Uze Njye Nkomora’, ’Urumuri’, ’Narahindutse’ , ‘True Love’ n’izindi.

Ishimwe azwi cyane nk’umubyinnyi kuva mu mashuri yisumbuye aho yize muri Groupe Scolaire Officiel de Butare (GSOB) Indatwa n’Inkesha no muri College Ami des Enfants.

Uyu muhanzi avuga ko ibyo kuririmba yabyinjiyemo yiga muri Uganda muri St Lawrence London College aho yabaye umuyobozi wa Korali mu Kiliziya nyuma abamwumvise aririmba bamugira inama yo kwinjira mu buhanzi ari nabwo yatangiye kubigerageza mu 2016.

True Love yahuriyemo na Bulldog

Yverry

Ubusanzwe yitwa Rugamba Yves, ni umwe mu bahanzi b’abahanga mu njyana ya RnB n’izindi zigenda gake.

Afite ubuhanga bwihariye mu kugorora ijwi by’umwihariko akaba ari mu bavomye ubumenyi mu ishuri rya muzika riherereye i Muhanga ryahoze ku Nyundo.

Amaze kwamamara mu bihangano bitandukanye birimo Uzambabarire, Njye mbona dukundana, Nk’uko njya mbirota n’izindi nyinshi.

Yatangiye gukora umuziki kera ariko aza gutangira kumenyekana cyane mu 2016 ubwo yakoraga indirimbo yise ‘Uragiye’.

Seyn

Amazina ye bwite ni Rurangwa Hussein afite imyaka 22. Aherutse gusinya amasezerano y’imyaka itatu muri Incredible Record.

Seyn uherutse gushyira hanze indirimbo yitwa ‘Rewind’ icyo gihe yabwiye IGIHE ko afite intego y’uko mu myaka itatu iri imbere umuntu azajya avuga u Rwanda abantu bakabyumva vuba, bavuga ngo ‘ni hahandi hava umuhanzi witwa Seyn?’

Mu miririmbire ye yibanda cyane ku njyana zirimo R&B, Reggae, Afrobeat na Pop.

Mukadaff

Niyitegeka Gentil Leonce uzwi nka Mukadaff ari mu baraperi bari kwigaragaza cyane ndetse mu minsi ishize mugenzi we w’umuraperi Bulldog yigeze gutangaza ko ariwe muraperi abona uri gutanga icyizere.

Afite indirimbo nyinshi zirimo iyitwa Rap Nyayo, nta n’umwe, whisky na coca, Slow motion, Canganya, Gwamo n’iyitwa Agakote n’izindi.

Ni umwe mu bahanzi barangamiwe cyane muri Hip Hop.

2 in 1 ya Mukadaff na Bulldogg

Yemba Voice

Iri tsinda rigizwe n’abasore batatu (Moses Mungabutsinze, Norbert Rusanganya na Billy Ruzima ) biga mu ishuri ry’umuziki ryahoze ku Nyundo ubu rikorera i Muhanga. Ni bamwe mu banyempano bagaragaza icyizere muri muzika.

Izina ryabo ryatangiye kuvugisha benshi ubwo bashyiraga hanze indirimbo bise ‘African Woman’ yatumye batangira kwigwizaho abakunzi benshi.

Bamaze gukora indirimbo nyinshi zakunzwe zirimo ‘Uzanyumva’, ‘Turakundana’, ‘ So sweet’, ‘ Go down’ bahuriyemo na Riderman n’izindi.

Aba bahanzi baherutse gutumirwa mu iserukiramuco rikomeye ryaberaga muri Congo Kinshasa aho baririmbye kuwa 11 Gashyantare 2018.

Ubu, aba basore mu muziki wabo bafashwa cyane na Mani Martin wababonyemo impano ihambaye akiyemeza kubakurikirana ngo itazazima.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza