Impaka zikomeye ku ndirimbo ’Icange’ ya Nsengiyumva waririmbye ‘Igisupusupu’

Yanditswe na Muvunyi Arsène
Kuya 9 Gicurasi 2019 saa 03:22
Yasuwe :
0 0

Indirimbo yitwa Icange ya Nsengiyumva yateje impaka aho bamwe bamushinja gushyigikira ihohoterwa rikorerwa abagore abandi bakabifata binyuranye.

Icange imaze iminsi mike igiye hanze. Ni indirimbo icurangishijwe umuduri ariko mu buryo buteye imbere.

Mu butumwa buri muri iyi ndirimbo bushingiye ku nkuru y’umukobwa ukundana n’umusore bakageraho biyemeza kurushinga n’ababyeyi babyemeye.

Mu gihe ubukwe bwegereje umusore w’umuturanyi amufata ku ngufu akamutera inda umusore yabimenya akamusenda.

Barada wamamaye mu itangazamakuru, aherutse kuyitangaho ibitekerezo agaragaza ko yanenze imyandikire yayo igaragaza gushyigikira ihohoterwa rikorerwa abakobwa.

Ati “Indirimbo irimo umukobwa se atanga kubera ibintu umuhungu yatanze, yarataga, nyuma umukobwa akaza gufatwa ku ngufu, agaterwa inda, umwe wamushakaga atanze ibintu akamwanga.”

Akomeza ati “Muri make abandi baririmba bamagana ihohoterwa, gufatwa ku ngufu k’umukobwa ariko uyu we ndabona abisingiza ati " icange cange mukobwa uraberewe" aberewe gute? Ibyamubayeho ni ibyo kwishimira? Wowe bikubayeho cyangwa bikaba ku wawe, wamwihanganisha umubwira ngo icange, icange mukobwa uraberewe? Ngo injyana ni sawa, ngo ni nziza? ngo abantu benshi bayikunze?”

Barada yanenze abantu bakunze iyi ndirimbo birengagije ko ubutumwa burimo bukangurira abantu guhohotera abagore.

Hari abamushyigikiye barimo uwitwa Claire Muneza Gates wavuze ko muri iyi ndirimbo nta butumwa bwubaka abanyarwanda burimo.

Ku rundi ruhande ntabwo Barada ahuza na Emma Claudine bigeze gukorana mu itangazamakuru akaba ari umwe mu baharanira uburenganzira bw’abagore.

Emma Claudine yavuze ko ibyo Nsengiyumva yaririmbye nta kibazo kirimo kuko n’ubwo umukobwa yabenzwe kuko yafashwe ku ngufu yanze guherenwa n’agahinda bityo ko afite impamvu yo kwicanga.

Ati “Icyo nakunze ni uko umukobwa ataheranwe n’agahinda, kandi yihagazeho [...] Kuri njye, n’ubwo haburamo kurega uwafashe ku ngufu (ariko bikaba ari amahitamo y’umuhanzi kuko tugifite ikibazo cy’uko abafatwa ku ngufu bose batarega, bivuga ngo n’ubundi yaririmbye ubuzima buriho), ariko numva rwose uyu mukobwa akwiriye kwicanga kuko afite agaciro, kabone n’ubwo yaba yarabyaye umwana mbere yo kurushinga. Nta kimubuza kwicanga.”

Umuhanzi Bisangwa Nganji Benjamin yavuze ko nta kibazo abona mu ndirimbo ya Nsengiyumva ahubwo ikibazo ari abashaka gusobanura inganzo kurusha nyirayo.

Ati “Ahubwo ni uko abantu bashaka gusesengura inganzo y’abandi ariko burya ntawayisesengura 100% nka nyirayo [...] Si ngombwa ko umuhanzi yigisha ngo anakubwire ko akwigishije, ashobora kukugaragariza ibibaho mu buzima ugakuramo isomo.”

“Murumva nta somo indirimbo itanga? Byonyine kwitondera uwo mwahoze mukundana mu gihe wamubenze ukaba utegura ubukwe ni isomo, byongeye kuba umuntu yakuziza amaherere y’ibyago wagize ukihagararaho nabyo ni irindi.”

Umujyanama wa Nsengiyumva, Alain Mukuralinda yabwiye IGIHE ko umuhanzi atigeze ashaka kwamamaza ihohoterwa rikorerwa abakobwa ahubwo ababifata gutyo bagoreka ubutumwa nkana.

Ati “Niba uwo abona ko turi kwamamaza ihohoterwa no gufatwa ku ngufu kw’abari n’abategarugori ni uburenganzira bwe busesuye kuko ntabwo ayobewe ko kuvuga ibibazo biba mu mibanire y’abantu ari bumwe mu buryo bwo kubimenyekanisha no kubishakira ibisubizo.”

Mukuralinda kandi yasabye abantu kwirinda gucengeza ibitekerezo byabo mu bandi bagamije gusebya iyi indirimbo.

Ati “Ni byiza gutanga ibitekerezo bye ari ko ni bibi gushaka kubitsindagira mu bandi nk’aho bo batagira amatwi yo kwiyumvira, amaso yo kwirebera n’ubwenge bwo kwisesengurira.”

Icange imaze kurebwa inshuro zirenga ibihumbi 270 ku rubuga rwa Youtube bigaragaza uburyo ikunzwe na benshi. Yaje ikurikira iyitwa “Mariya Jeanne” [Igisupusupu] nayo yakunzwe mu buryo budasanzwe aho imaze kurebwa inshuro zirenga miliyoni.
Icange imaze iminsi irindwi igiye hanze

Iyitwa Mariya Jeanne imaze kurebwa n’abasaga miliyoni mu gihe cy’amezi ane

Nsengiyumva yibasiwe na bamwe bamushinja kwamamaza ihohotera rikorerwa abakobwa
Alain Mukuralinda ufasha Nsengiyumva yavuze ko abanenga iyi ndirimbo ari abashaka kuyigoreka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza