Meddy ashobora kwitabira Coke Studio

Yanditswe na Uwiduhaye Theos
Kuya 20 Ugushyingo 2018 saa 07:42
Yasuwe :
0 0

Ngabo Medard Jobert umaze kwamamara mu muziki wo mu Rwanda no hanze yarwo nka Meddy, ashobora guhagararira u Rwanda mu kiganiro cy’umuziki cya Coke Studio Africa mu 2019 gitegurwa na Coca Cola.

Uyu muhanzi azaba yitabiriye nyuma ya Bruce Melodie wahagarariye u Rwanda mu 2017.

Coke Studio ni umushinga ugamije guteza imbere abanyamuziki, watangirijwe muri Brazil mu 2007 nyuma uza no kugezwa mu bindi bihugu bitandukanye nka Pakistan, u Buhinde no muri Afurika mu 2013.

Coke Studio ku Mugabane wa Afurika ihuza abahanzi bakunzwe kandi bafite ubuhanga budashidikanywaho mu bihugu byabo, bagahurizwa hamwe buri muhanzi agakorana n’undi wo mu kindi gihugu.

Amakuru yizewe agera kuri IGIHE, ni uko Coke Studio y’umwaka utaha izabera muri Kenya, Meddy ari we uzahagararira u Rwanda.

Umwe mu bantu bazi neza iby’iyi gahunda utashatse ko amazina ye atangazwa yagize ati “Meddy bari bamaze igihe bamushaka cyane. Ubwo yazaga muri Afurika y’Iburasirazuba mu Ukwakira yatangiye kugirana ibiganiro n’abategura Coke Studio ngo abe ashobora guhagararira u Rwanda. Bidahindutse ni we wajyayo.”

Abahanzi bari muri Coke Studio batangiye ibikorwa bitandukanye, aho buri umwe ajya muri Kenya muri studio y’aho iki gikorwa kibera agafata indirimbo mu buryo bw’amajwi ndetse agahabwa n’undi umwe baturutse mu bihugu bitandukanye bazahurira mu ndirimbo bo ubwabo bihitiyemo bakanahinduranya indirimbo buri umwe asubiramo iya mugenzi we.

Abahanzi bo mu bindi bihugu bamaze kumenyekana batangiye ibikorwa nk’ibi barimo Sheebah Karungi, Fiki Fameica, Rayvanny, Harmonize n’abandi.

Indirimbo zose ziri gukorwa abategura Coke Studio bazatangira kuzishyira ku rubuga rwa Youtube muri Gashyantare 2019, ndetse zinacishwe kuri televiziyo zitandukanye, aba bahanzi banaziririmbe mu buryo bwa live muri icyo gihe.

Umwaka ushize Bruce Melodie wahagarariye u Rwanda muri iki gikorwa yaririmbye indirimbo yitwa ‘Yego’ y’umuraperi wo muri Kenya witwa Khaligraph Jones.

Uyu muraperi we icyo gihe yasubiyemo indirimbo ya Bruce Melodie yitwa ‘Complete me’. Aba bombi banahuriye mu ndirimbo bise ‘Don’t Know’ ndetse na ‘Kirisense’.

Reba hano indirimbo Meddy ushobora kwitabira Coke Studio ahagarariye u Rwanda aherutse gushyira hanze yise ‘Adi Top’

Bruce Melodie ni we waserukiye u Rwanda umwaka ushize
Meddy amaze iminsi mu Karere ka Afurika y'Iburasirazuba ndetse ku wa 1 Mutarama 2019 azakorera igitaramo mu Rwanda
Meddy ashobora kwitabira Coke Studio
Meddy ni umwe mu bahanzi b'abanyagikundiro mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza