Meddy yashyize ahagaragara amashusho y’indirimbo ’Ntawamusimbura’

Yanditswe na Uwishyaka Jean Louis
Kuya 9 Mutarama 2017 saa 02:45
Yasuwe : XX
0

Umuhanzi w’Umunyarwanda Ngabo Medard Jobert [Meddy] umaze imyaka itandatu akorera umuziki muri Amerika, yasohoye amashusho y’indirimbo ’Ntawamusimbura’ yakoreye mu butayu bwo muri Oklahoma bufitanye isano n’ubwa Sahara.

Uyu muhanzi uri mu bakunzwe cyane mu Rwanda, yaherukaga gusohora amashusho y’indirimbo ye bwite mu ntangiriro za 2015 ubwo yaririmbaga iyitwa ’Burinde Bucya’ iri mu zaciye agahigo mu Rwanda mu kurebwa cyane.

Muri Leta Zunze Ubumwe za Amerika, Meddy umuziki awufatanya n’amasomo ya kaminuza ari na bimwe mu bimuhugije muri iki gihe. Yiga mu mwaka wa Gatatu, mu ishami rya Actuarial Science mu ishuri ryitwa Tarrant College riherereye mu Mujyi wa Texas ari n’aho atuye.

Meddy yabwiye IGIHE ko amashusho y’indirimbo ’Ntawamusimbura’ ari yo mpano yateguriye abanyarwanda mu rwego rwo kubifuriza umwaka mushya wa 2017. Amashusho y’iyi ndirimbo avuga ko yayakoreye mu butayu buherereye muri Oklahoma.

Ati "Buriya butayu ni ubw’ahantu hitwa muri Oklahoma, buri hafi ya za Texas na Arkansas [...] Ibijyanye n’ubushobozi bwo gukora amashusho byantwaye ntabwo nigeze mbara neza gusa nishimira ko byagenze neza kandi abanyarwanda nizeye ko baza kuyikunda."

Ubu butayu Meddy yakoreyemo amashusho ya ’Ntawamusimbura’ , bufite amateka yihariye y’ubwiganze bw’ibitare by’ivumbi byasizwe n’umugezi witwa Cimarron River wahahoze mu myaka irenga ibihumbi cumi na kimwe ishize.

Ubu butayu buri mu cyanya cyagizwe Pariki y’Igihugu muri Leta Zunze Ubumwe za Amerika, bufatwa nk’ubugaragaza ishusho n’imiterere y’ubwa Sahara buherereye mu Majyaruguru y’umugabane wa Afurika.

Indirimbo ’Ntawamusimbura’ ya Meddy yatunganyijwe na Lick Lick, amashusho yayo yakozweho na Cedru basanzwe bakorana n’undi witwa Christian Kayiteshonga uri kuzamuka mu bijyanye no gutunganya amashusho bafasha abahanzi b’abanyarwanda batuye muri Amerika.

Meddy mu mashusho y'indirimbo 'Nta wamusimbura'
Meddy n'umukobwa yakoresheje mu mashusho y'indirimbo ye
Ubutayu bwa Little Sahara Meddy yaririmbiyemo bufite amateka yo kuva mu myaka myinshi ishize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE