Meddy yasomye umukunzi we imbere y’abafana mu gitaramo yakoreye i Montreal

Yanditswe na Muvunyi Arsène
Kuya 23 Ukuboza 2018 saa 04:27
Yasuwe :
0 0

Umuhanzi w’umunyarwanda Ngabo Medard (Meddy), bwa mbere yerekanye umukunzi we Mehfira Mimi, mu gitaramo yakoreye i Montreal muri Canada.

Kuri uyu wa 23 Ukuboza 2018 Meddy uba muri Leta Zunze Ubumwe za Amerika, yakoreye igitaramo mu Mujyi wa Montreal, nyuma y’icyo yakoreye mu Mujyi wa Ottawa.

Uyu musore ukunzwe mu buryo budasanzwe mu ndirimbo ze nka Slowly, Adi Top, Ntawamusimbura n’izindi, yari yatumiwe muri Canada mu rwego rwo kubataramira muri iki gihe bitegura iminsi mikuru ya Noheli n’Ubunani.

Amashusho yerekana ko muri iki gitaramo Meddy yatunguranye ahamagara ku rubyiniro, umukunzi we ukomoka muri Ethiopia, Mimi Mehfira maze amwereka imbaga y’abari bateraniye aho.

Icyo gihe Meddy yari ari kuririmba indirimbo ye yise Ntawamusimbura, uyu mukobwa yanagaragaye mu mashusho yayo.

Yaririmbaga iyi ndirimbo umukunzi we yamwiyegamije mu gituza, ariko nako ubona ibinezaneza mu maso yabo. Mbere y’uko amurekura yamusomye ku gahanga no ku ijosi.

Ni ku nshuro ya kabiri, Meddy ajyanye n’umukunzi we mu gitaramo kibereye hanze ya Leta Zunze Ubumwe za Amerika, nyuma y’aho mu bajyanye mu Bwongereza mu bitaramo yakoreyeyo muri Nzeri.

Mu ijoro ryo kuwa 15 Ukuboza 2018 ubwo uyu mukobwa yizihizaga isabukuru y’imyaka 30, byongeye kwerekana ko bashinze imizi mu rukundo rwabo, dore ko Meddy yari amaze iminsi muri Tanzaniya ariko agafata rutekama ikirere akajya i Dallas kwishimana n’umukobwa wamurutiye abandi.

Ejo kuwa mbere i saa cyenda z’amanywa nibwo Meddy azagera i Kigali, binashoboka ko yazana n’uyu mukobwa akamwereka inshuti n’umuryango.

Kuwa 29 no kuri 30 Ukuboza 2018 Meddy afite ibitaramo i Burundi n’ubwo biri gushidikanywa ko azajyayo kubera ibibazo by’umutekano. Tariki ya 01 Mutarama 2019 azataramira abanyarwanda mu gitaramo cya East African Party kizabera kuri sitade Amahoro i Remera.

Meddy yaririmbaga anicurangira gitari
Meddy aririmbira abakunzi be batuye i Montreal
Umukunzi wa Meddy nawe yizihiwe n'indirimbo ze arabyina
Mimi asigaye aba hafi cyane y'umukunzi we
Isabukuru ya Mimi yongeye gushimangira ko byakomeye
Mimi umukobwa watwaye umutima Meddy
Meddy yasomye umukunzi ku gahanga imbere y'abafana
Nyuma yo kumusoma ku gahanga yamusomye no ku ijosi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza