Byinshi utari uzi ku mukobwa ugaragara mu ndirimbo “I’m in Love” ya The Ben

Byinshi utari uzi ku mukobwa ugaragara mu ndirimbo “I’m in Love” ya The Ben


Yanditswe kuya 21-11-2012 - Saa 18:18' na Vénuste Kamanzi

Nyuma y’aho umuhanzi The Ben ashyiriye ahagaragara indirimbo yahaye izina ry’Icyongereza,“I’m in Love”, ariko iririmbye ahanini mu Kinyarwanda, umukobwa witwa Chantal Landry Sangwa ugaragara mu mashusho y’iyo ndirimbo benshi baramukunze bifuza kumumenya.

Ku maradiyo atandukanye, mu tubari, amaresitora, mu matelefone y’abantu n’ahandi hatandukanye, hagaragara kenshi indirimbo I’m in Love ya The Ben, uko irebwa ni nako benshi bibaza umukobwa uyigaragaramo uwo ari we ndetse banibifuza kumenya byinshi kuri we.

Hifashishijwe urubuga Facebook, Chantal Landry Sangwa, umukobwa umwe rukumbi ugaragara muri “I’m in Love”, yaganiriye na IGIHE.


IGIHE
: Ufite uruhe rwego rw’amashuri? Waba warigeze wiga mu Rwanda?

Sangwa : Ndimo ndiga Ubuforomo n’Ibinyabuzima (Nursing/Biology) muri Kaplan University, ndi mu mwaka wa kabiri. Mbere y’uko nza muri Leta Zunze Ubumwe za Amerika nigaga Ubumenyi n’Ikoranabuhanga (Information Technology) muri Adventist University of Central Africa i Mudende. Amashuri yisumbuye yo, nayize kuri LDK(Lycée deKigali).

IGIHE: Mu buzima busanzwe ukora uwuhe mwuga?

Sangwa: Ndi umunyeshuri ubikunze , ariko iyo ntari mu masomo murika imideri i Pennsylvania na Texas muri Leta Zunze Ubumwe za Amerika.

IGIHE: Wavukiye he? Ryari?

Sangwa: Navutse tariki 25 Ugushyingo (umwaka wo sinshaka kuwuvuga). Navukiye mu Rwanda ndanahakurira.

IGIHE: Wagiye muri Leta Zunze Ubumwe za Amerika ryari ? Hari umuryango ufite mu Rwanda?

Sangwa: Nimukiye muri Leta Zunze Ubumwe za Amerika nje kwiga mu 2009, ntangirira amasomo muri La Roche College. Mfite ababyeyi na musaza wanjye Nick breezy (umuraperi urimo kuzamuka muri muzika mu Rwanda) baba mu Rwanda, ariko hari n’abandi bantu bo mu muryango wanjye baba muri Leta zitandukanye za hano muri Leta Zunze Ubumwe za Amerika

IGIHE: Ubu ubahe?

Sangwa: Mba i Pennsylvania.

IGIHE: Ese kugaragara muri I’m in Love byari ubwa mbere ugaragaye mu mashusho y’indirimbo?

Sangwa: Byari ku nshuro ya mbere ngaragaye mu mashusho y’indirimbo. Nayungukiyemo ubunararibonye bufatika cyane n’ubwo byari biteye ubwoba kuko byari ubwa mbere.

Mu kumurika imideri ntabwo uba usabwa kumenya kwifotoza cyangwa kwiyerekana gusa, ahubwo uba ugomba no kumenya uko bitwara neza imbere ya camera. Nakoze amashusho y’indirimbo rero kugira ngo mbone n’ubwo bunararibonye.

"I am in love" ni indirimbo nziza cyane kandi ifite amashusho ashobora gukurura ibitekerezo bya buri wese, ndizera ntashidikanya ko buri wese ayikunda.

IGIHE: Umuryango wawe n’inshuti zawe za hafi babyakiriye gute?

Sangwa: Abantu b’ingirakamaro kuri njye babyakiriye neza kandi bishimiye kubona akazi keza twakoze twembi (we na The Ben).

IGIHE: I’m in Love muri iyi minsi irimo kuvugisha abantu, wowe wayivugaho iki?


Sangwa
: ”I am in love" ni indirimbo ikora ku mutima, kugeza n’ubu ndacyashima akazi The Ben yakoze.

Kanda hano uyirebe: http://www.youtube.com/watch?v=roojUo48yqE

IGIHE: Ndizera ko kugaragara mu mashusho y’iriya ndirimbo byongereye umubare w’abaguhamagara wakiraga ku munsi, abagusaba ubucuti cyangwa abagukurikira ku mbuga nkoranyambaga, wagereranya ukaduha umubare w’uko biyongereye?


Sangwa
: (Aseka) hahaha....Ibyo uvuze ni ukuri, abantu bahita bashaka kumenya uwo uri we, ubuzima bwawe, inshuti zawe n’umuryango wawe. Ariko …ntacyo ndabasha kwitaho!

IGIHE: Biravugwa ko wakundanaga n’umuraperi w’umunyarwanda Roger, byaba ari ukuri?

Sangwa: Oya! Roger atereta inshuti yanjye. Nta kintu kiri hagati yanjye nawe kirenze ubucuti busanzwe.

IGIHE: Biravugwa ko waba warigeze kwiyamamariza kuba nyampinga wa Kaminuza wigaho, byaba ari byo?

Sangwa: Sinigeze ngerageza kuba Nyampinga kuri Kaminuza, ariko mu 2007 naje mu bakobwa 10 bahataniraga kuba Nyampinga w’Umujyi wa Kigali.

IGIHE: Murakoze cyane ku mwanya muduhaye w’ikiganiro.

Sangwa: Murakoze namwe.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO