Hari ubuzima bubi Abaraperi nyarwanda baririmba barabubayemo

Hari ubuzima bubi Abaraperi nyarwanda baririmba barabubayemo


Yanditswe kuya 23-11-2012 - Saa 11:33' na Vénuste Kamanzi

Mu gihe usanga ahenshi ku isi abaririmbyi baririmba mu njyana ya ‘rap’ ari bamwe mu bahanzi bakunze gufungwa bazira ibiyobyabwenge, ubugambanyi, kurwana, kwitwaza intwaro, mu Rwanda naho usanga abaririmba Rap bibanda ku buzima bubi nk’ubwo muri gereza ndetse akenshi bakaba barabubayemo.

Abaraperi nk’abagize itsinda rya Tuff Gangs, Pacson, Marshal Mampa, Amag the black, P-Fla, Riderman, Diplomat, Ally G, Bably, M.O.P Kosovo camp n’abandi; bakunze kuririmba ubuzima bwo ku mihanda, ibiyobyabwenge n’ubuzima bwo mu magereza kandi abenshi muri bo ibyo baririmba babibayemo.

P-FLA ni umwe mu baraperi bagiye bafungwa kenshi

P-FLA (Power First Ladies After), amateka ye abenshi iyo bayumvise bibaza impamvu yageze mu Rwanda akitonda. Yiyemerera ko we ubwe yafungiwe kenshi mu bihugu by’i Burayi inshuro nyinshi.

Kimwe mu bitangazamakuru twasomye dutegura iyi nkuru, cyaranditse kiti “Hagati y’umwaka wa 2000 na 2008 yazengurutse ibihugu byinshi by’u Burayi: Denmark, Norvege, u Buhorandi, u Budage, u Bufaransa n’ahandi henshi ari na ko yagendaga afungwa hamwe bitewe n’uko yakoreshaga impapuro mpimbano ahandi bitewe n’ubucuruzi bw’ibiyobyabwenge.”

Iby’umuraperi Marshal Mampa byo byarasakaye cyane kuko yanakatiwe n’inkiko z’u Rwanda akamara igihe muri gereza ya Kimironko.

Abagize Tuff Gangs banaririmbye indirimbo bise “Gereza” bavugamo ubuzima bwo mu magereza bati “Reka nigumire gereza aho nzarindwa indaya n’imbobo zinkoresha degat(amakosa)…”, icyakora nta bihe bizwi bikomeye bagiriye mu magereza by’umwihariko uretse ibyagiye bivugwa kuri Jay Polly ko yafungiwe muri Kenya akekwaho gushaka impapuro z’inzira mu buryo bunyuranyije n’amatege ariko akaza kubihakana.

Abaraperi bose si ko baririmba ibibi byababayeho, Diplomat usanga we aririmba ubuzima busanzwe

Ubwo IGIHE yaganiraga n’umuraperi Fireman mu mwaka ushize, yatangaje ko bazavuga ibibazo by’abana bo ku muhanda n’ibi bibazo byose abanyarwanda bafite kugeza ubwo bizaba bikemutse.

Ally G, Diplomat, M.O.P Kosovo camp, Rudahusha wo muri Hood rappers, ni bamwe mu baraperi bavuzweho gufungwa cyangwa gufatirwa nibura igihe gito bakekwaho ibyaha bitandukanye nyuma bakarekurwa batarakatirwa.

Abandi akenshi baririmba ubuzima bwa gereza n’ubwo ku muhanda batarabubayemo ariko bashaka gutanga ubutumwa ku buzima bubi buhaba kugira ngo abantu birinde.

Bulldogg wa Tough G. na baganzi be baririmbye gereza akaba yarafatiriwe

Kuririmba amagambo y’umujinya avuga ku buzima bubi abirabura babagamo muri Leta Zunze Ubumwe za America, kuririmba ibitutsi, ni bimwe mu byatumye abaraperi nka Coolio, 2Pac n’abandi bamenyekana cyane ndetse bituma abaraperi benshi ku isi bakurikiza iyo nzira kugira ngo bazamuke.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO