Indirimbo nshya “Icecekere” itsinda Just Family ryemera ko ryayiganye

Indirimbo nshya “Icecekere” itsinda Just Family ryemera ko ryayiganye


Yanditswe kuya 27-01-2013 - Saa 12:09' na Mathias Hitimana

Mu gihe abakurikira muzika bajya binubira ko abahanzi hariho ubwo badakora ibihangano by’umwimerere bakigana iby’abandi ariko ugasanga abahanzi bashaka kubihisha, umuhanzi Croidja Rajabu wo mu itsinda rya Just Family we yiyemerera ko indirimbo yabo nshya baheruka gusohora yitwa ‘Icecekere’ atari umwimerere wabo, ko ari indirimbo y’inyiganano iva ku ndirimbo ‘Balada (Tchê tcherere tchê tchê) y’umuhanzi wo muri Brezil witwa Gusttavo Lima.

Iyi ndirimbo Just Family yemera ko yiganye ifite amagambo yumvikana nk’ay’ikinyarwanda ku buryo iyo uzumvise zombi wumva ko zisa koko.

Aganira na IGIHE, Croidja we avuga ko kwigana indirimbo yo hanze atari ikibazo, ko ahubwo ikibazo ari uko ngo Abanyarwanda bafata nabi umuntu wiganye indirimbo yo hanze kandi ngo mu bihugu byo hanze bifatwa nk’ibisanzwe.

Yagize ati “Biriya ni Rhythm, mu mahanga hose, mu bantu bakora umuziki biremewe, ni uko mu Rwanda abantu babifata nk’aho ari ibintu bihambaye cyane. Ni indirimbo zingahe umaze kumva ziva ku ndirimbo yakunzwe y’umuntu umwe? Sinumva uko washinja umuntu amakosa rero? Iriya ndirimbo si iyacu ni iyo twumvise turayikunda tuyisubiramo gutyo kandi ntabwo twayisubiyemo nabi.”

Umva izo ndirimbo zombi hano:

Tumubajije niba barabisabiye uburenganzira nyira yo, ku buryo nta ngaruka zo gukurikiranwa Croidja yasubije ko nta burenganzira basabye. Ariko we ngo yizera ko nta ngaruka bizagira, ngo hari n’abandi basanzwe babikora, ati “Akon yasubiyemo indirimbo ya Michael Jackson nta burenganzira asabye, ariko nt’aho nigeze numva urubanza ngo bamureze.”

Itsinda rya Just Family

Akomeza avuga ko bahisemo kuyigana kuko ngo ari indirimbo kuri we yumvise ari nziza cyane, ashima kuyikora mu Kinyarwanda.

Tumubajije impamvu bahitamo kwigana iz’abandi aho guhimba izabo z’umwimerere, Croidja avuga ko atari ukubura inganzo nk’uko abantu bashobora kubikeka, ngo ahubwo ari uko bisanzwe bikorwa mu buhanzi, iyo hari uburyo iyo ndirimbo yaguhayeuburyo bwo kuririmba.

Mu 2012, Just Family na bwo biganye indirimbo ‘Danza Kuduro’ ya Lucenzo na Don Omar bayita ‘Arahebuje’ mu Kinyarwanda.
Itsinda Just Family ubu rigizwe ni abahanzi babiri, Croidja na Jimmy, kuko Bahati, baririmbanagamo aheruka gutangaza ko ahagaritse umuziki.

Umva indirimbo ya mbere Just Family basubiyemo:

Richard Irakoze

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO