Producer Chris Chettah yakomoye inganzo kuri se waririmbye muri Orchestre Irangira

Producer Chris Chettah yakomoye inganzo kuri se waririmbye muri Orchestre Irangira


Yanditswe kuya 3-02-2013 - Saa 14:52' na Richard Irakoze

Umwe mu batunganya indirimbo mu Rwanda uzwi ku izina rya Chris Chettah (ubusanzwe witwa Iradukunda Christian) avuga ko akomora iyo mpano kuri se witwa Sibomana Joseph waririmbaga muri Orchestre Irangira.

Aganira na IGIHE, Chris Chettah avuga ko yamukomoyeho gucuranga ibikoresho bya muzika birimo gitari na piano.

Nyinshi mu ndirimbo yakoze ni iz’umuhanzi Tom Close bakunda gukorana cyane, n’izindi z’abahanzi nka Jody, Kamichi, Urban Boyz, Kitoko, Uncle Austin, Khizz n’abandi.

Afite imyaka 21, ku gihagararo akaba umusore w’ibigango ushinguye. Abo bavukana hafi ya bose binjiye mu bijyanye na muzika, mushiki we ararimba, barumuna be, umwe atunganya indirimbo naho undi utunganya amashusho.

Gutunganya indirimbo, Chris Chettah abikorera iwabo.

Ikiganiro kirambuye yagiranye na IGIHE :

Chris Chettah ari kumwe na se

IGIHE : Watwibwira ?

Chris Chettah : Amazina yanjye nitwa Iradukunda Christian, navutse mu 1992. Amashuri abanza nayize muri ETO Muhima yaje kwimukira ETO Kicukiro, narangije umwaka wa 2012 mu bijyanye n’amashanyarazi (Nize Techniques).

Ndi mwene Sibomana Joseph na Icyimanizanye Marie Rose. Ndi umwana wa kabiri mu muryango w’abana barindwi. Ababyeyi banjye baracyariho bombi.

IGIHE : Wakuyehe ubumenyi mu bya muzika ?

Ni impano mfite impano nkomora ku babyei, nzi piano na gitari kuko data yari umuhanzi akabinyigisha.

IGIHE : Papa wawe se iby’umuziki yarabiretse ?

Chris Chettah : Data ubundi ni umushoferi utwara ibikamyo bijya Kenya-Da-Es-Salaam. Nk’uko nabikubwiye yari umusolisite(yacuranganga gitari) muri Irangira kandi n’ubu aracyabikora. N’ubu aracyakorera umuhanzi Makanyaga indirimbo ; urugero iyitwa “Chouchou”, “Ndagukunda”, “Rubanda” remix n’zindi mbese hafi Album ebyiri-iza kera n’iz’ubu.

Twagiye tuzikorana anyerekera gukora umuziki kuko ni nawe usanzwe unzanira porogaramu nifashisha(softwares).

IGIHE : Watangiye gutunganya umuziki ryari ?

Chris Chettah : Natangiye production neza niga mu wa kabiri mu mashuri yisumbuye, ariko kuva kera nacurangaga piano bisanzwe.

IGIHE : Uretse papa wawe, hari undi muvandimwe wawe se uri mu by’ubuhanzi ?

Chris Chettah : Yego. Mfite na murumuna wanjye witwa Niyigena Bruno (Sean Breezy) wiga mu mwaka wa gatanu APACOPE (Accountance) utunganya indirimbo nawe. Yakoze Beat y’indirimbo yitwa "Akabindi" k’umurozi ya P’Fla na mushiki wanjye witwa Lil Key, warangije amashuri yisumbuye.

Mfite n’undi murumuna wanjye wa kane witwa Muhoranimana Eloi, wiga mu mwaka wa mbere mu mashuri yisumbuye i Gitarama ku kigo cyitwa Cite Nazareth, atunganya amashusho, yakoze videwo "Akaruhuko" ya G-Bruce.

IGIHE : Wanyurira muri bimwe mu bihangano umaze gukora byamenyekanye cyane ?

Chris Chettah : Maze gukora Album nshyashya ya Tom Close aheruka kumurika umwaka ushize iriho indirimbo nka “Rimwe Gusa”, “Nzagutegereza”, “Rubanda”, “Ndagukunda”, “Umutima Wanjye”, “Nuru”, “Nkingurira” yakoranye n’umuhanzi w’umurndi witwa Sat-B na Uncle Austin, “Wowe” n’izindi zitari kuri iyo Album yitwa “Ni Beza Cyane”, za “Ndinda Tujyane”.

Nakoze “Ndafuha” na “Nkunda u Rwanda” za Uncle Austin. Nakoze Tonight ya Urban Boyz, Umucakara ya Allioni, Ndasigaye ya Kamichi, “Si Ibanga” ya Emmy, “Ndabaza” na “Indahemuka” za Tete Roca, “Gakosi” y’umuraperi mushya ukiri muto witwa Benzo, “Warezwe Nande”, “Uragumana Nanjye” za Charly.

Nakoranye n’umuhanzi Khizz indirimbo “Uwagukurikira” na “Ohereza”. Nakoreye G-Bruce na The Sun indirimbo yitwa “Nguhaye Urukoze”, “Ndacyashidikanya” ya Joddy, “Aho Wahereye” ya Sacha, “Ndaremerewe” y’umuhanzi mushya witwa Aimee, “Simbuka” y’umuhanzi urimba indirimbo zihimbaza Imana witwa Serge n’izindi.

Chris Chettah ari iku kiyaga cya Muhazi mu butemere

IGIHE : Kubera iki ukunda gukorana na Tom Close cyane ?

Chris Chettah : Ni uko twumvikana cyane kandi akunda production zanjye cyane kurusha abandi bose.

IGIHE : Ni gute watangiye kumenyana n’abahanzi batangira kukugana ubakorera indirimbo ?

Chris Chettah : Bagiye bumva ibihangano nakoze nuko nabo bakanshaka, bashakisha nomero zanjye bakampamagara bakangeraho. Hari n’abangeraho batampamagaye. Iyo bumvise izina ryanjye.

IGIHE : Ni abahe bahanzi baje gukorana nawe ukumva biragutunguye, cyangwa se biragushimishije cyane

Chris Chettah : Ni abahanzi batatu, ni Tom Close, Kitoko kuko ndimo ndamukorera Album y’indirimbo umunani yasohoyeho indirimbo imwe yitwa “Reka Ubwoba”, Kamichi, Urban Boyz abantu nk’abo.

IGIHE : Ni iki cyagutunguye se icyo gihe ubabona baje mugakorana ?

Chris Chettah : Icyantunguye ni icyizere bangiriye bakaza iwanjye gukorana nanjye. Njyewe nari mfite icyizere ko bashobora kuza bitewe n’uko nakoraga baje rero numva nkabije inzozi.

IGIHE : Ni ibihe byiza n’ibibi wahuye nabyo bitewe n’uko watunganyaga indirimbo uri n’umunyeshuri mu mashuri yisumbuye ?

Nari nzwi cyane ku ishuri pe, ubwo nigaga mu mwaka wa gatanu no mu wa gatandatu. Icyatangazaga abantu ni uburyo nakoraga niga nzwi ndi umustar.

Naho ikibi ni uko ari ibintu wabonaga bingora kubyakira, bikanantera stress kubivanga kubera akazi kenshi.

Producer Chris Chettah

IGIHE : Ese hari indirimbo ukora wayirangiza ukabyiyumvamo ko izamenyekana ?

Chris Chettah : Rimwe na rimwe, hari ubwo nkora indirimbo nanjye nkavuga nti ni hit kabisa bitewe n’uko numva ifite amanota meza, ibikenewe byose ibifite kabisa.

IGIHE : Hanyuma bikaba ?

Chris Chettah :Yego bikaba

IGIHE : Urugero ?

Chris Chettah :Iriya ndirimbo ya Tom Close bita “Umutima Wanjye” n’indi bita “Ndafuha” ya Uncle Austin nari mbizi kabisa ko izamenyekana, n’iriya ya Kitoko bita “Reka Ubwoba”.

IGIHE : Hari izo wakoze wikinira se ukumva nyuma ziramenyekanye cyane bikagutungura ?

Chris Chettah :Yego zirahari ; nka “Ndabaza” ya Tete Roca, “Nkunda U Rwanda” ya Unce Austin, n’indirimbo yanjye mperuka gusohora yitwa “Sinakurenganya” nyumva kenshi ku munsi kabisa kandi nabikoze nikinira singiye kukubeshya, n’iriya ya Khizz yitwa Uwagukurikira n’izindi nyinshi cyane ntabasha kwibuka pe.

IGIHE : Eh, nawe se uri umuhanzi ? Wabitangiye ute se kuririmba byo ?

Chris Chettah :Njyewe ni imikino nyine tu. Mbese ni kwa kundi umuntu aba yumva ashaka kugerageza, uti “Reka ndebe niba nanjye mbizi” sindi umuhanzi by’umwuga ariko ni ukureba niba nanjye mbishoboye. Ubundi impano yanjye ni ugutunganya indirimbo nibyo nzi cyane.

IGIHE : Indirimbo zawe ubu ni izihe ?

Chris Chettah :Ni iyo bita “Sinakurenganya” mperuka gusohora na “Sinayobye” iri mu njyana ya Rock nizo zanjye bwite.

IGIHE : Unagaragara mu mashusho y’indirimbo z’abandi bahanzi, ese ubu ni izihe urimo ?

Chris Chettah :Ni iza Tom Close ; “Ndinda Tujyane”, “Rimwe Gusa”, “Umwihariko” ya Tete Roca n’indi imwe ya Dream Boyz ntibuka.

IGIHE : Ni uwuhe mu producteur wo hanze ukunda kurusha abandi, ukunda ibihangano bye ?

Chris Chettah :David Guetta n’uwo bita Timbaland bombi babiri nibo nemera kuri iyi si y’Imana. Ngitangira cyane nakuraga inganzo kuri Timbaland nyuma nza gutangira gukunda David Guetta numva style akora ariyo nkunze kandi nyishoboye. Iyo style ya pop kandi ninjye wayigaragaje mu Rwanda mu baproducteur bose.

Iriya ndirimbo ya “Tonight” ya Urban Boyz, “Rimwe Gusa” ya Tom Close nakoze yatumye abaproducer bandi babyuka bantangira gushidukira iyo style nshya nari nzanye mu Rwanda bituma n’abantu batangira kuyiyumvamo.

IGIHE : Mu Rwanda se ukunda uwuhe muproducer ?

Chris Chettah :Mu Rwanda nkunda Nicolas na Clement Ishimwe

Producer Chris Chettah agaragara mu mashusho ya zimwe mu ndirimbo za Tom Close

IGIHE : Wakuyehe ubushobozi bwo gukora studio ?

Iyi studio ni iya Papa niwe wayinshingiye. Ibikoresho byose birimo niwe wabiguze pe. Yabonye ko nzi gukora umuziki, abona ko mfite impano nuko anshingira iyi studio.

IGIHE : Kuki iyi studio muyita JFB Records ?

Chris Chettah :Biriya ni izina rya Papa ni Sibomana Joseph Jeff (JF) bivuga Joseph, naho B bivuga Sibomana nafashe B iva muri iryo zina Sibomana.

IGIHE : Ni iki cyagushimishije cyane mu gutunganya indirimbo kwawe ?

Chris Chettah :Kuba narakoze indirimbo yitwa "Ndacyashidikanya" ya Jody umuhanzi The Ben akampamagara akambwira ko nakoze indirimbo nziza akanyihamagarira akavuga ngo wakoze indirimbo nziza. Yarambwiye ati “Nice Work-wakoze akazi keza !” numva ndishimye pe.

IGIHE : Ni uwuhe muhanzi mwakoranye ukumva ko afite impano kurusha abandi ?

Chris Chettah : Ni mushiki wanjye witwa Lil Key niwe ubanza. Hamwe na Joddy kuko nawe mu miririmbire ye ararenze, aririmba umuziki uyunguruye wa Classique na Charly nawe arabizi.

IGIHE : Ese ubasha gukura amafaranga mu gutunganya indirimbo ?

Chris Chettah :Si menshi icy’ingenzi ni uko mbonamo make amfasha mu mibereho isanzwe, mu kwishyura ishuri , ing=dendo kwambara n’ibindi.

IGIHE : Ni izihe ndirimbo zawe nshyashya uheruka gushyira hanze n’iozo uteganya gusohora ?

Chris Chettah :Ni iya Kitoko yitwa “Reka Ubwoba” n’iyanjye yitwa “Sinakurenganya” n’iya Tom Close “Ni Uwanjye” n’iya Jody yitwa nizo nasohoye mu cyumweru gishize.

IGIHE : Ni iki uteganya gushyiraho imbaraga mu kazi kawe, wenda ubona kitagenda neza ?

Chris Chettah ari kumwe na murumuna we witwa Sean Breezy nawe ucuranga akanatunganya indirimbo

Chris Chettah :Ni ukwamamaza ibihangano byanjye. Nari ndyamye ntakora cyane ntamenyekanisha cyane ibihangano byanjye kubera amashuri akenshi.

IGIHE : Mu bindi bibazo by’ubuzima busanzwe, ese ufite umukunzi ? Yitwa nde ?

Iribagiza, umukunzi wa Chris Chettah

Chris Chettah :Njywe mfite girlfriend( inshuti y’umukobwa) witwa Iribagiza Linah

IGIHE : Hari ikindi tutakubajije wumva abakurikira muzika bamenya ku buhanzi bwawe ?

Chris Chettah :Ndakeka ko ntacyo

IGIHE : Murakoze

Chris Chettah :Murakoze namwe kandi Imana ibahe umugisha, ndashimira n’Imana kuba ngeze aha.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO