Itegeko rirengera abahanzi ni yo Bibiliya yabo_Alain Muku

Yanditswe na

Gisèle Umutesi

Kuya 23 Nzeri 2012 saa 05:44
Yasuwe :
0 0

Iyo wumvise indirimbo nka Gloria, Murekatete n’izindi ziherekejwe n’ijwi rirongotse uhita utekerza kuri Alain Bernard Mukuralinda, Umuhanzi w’umunyamuziki akaba n’umunyamategeko.
Aganira n’umunyamakuru wa IGIHE yasobanuye n’ibindi byinshi bimwerekeyeho ndetse agira n’inama abahanzi bakiri bato.
IGIHE: Indirimbo ya mbere wakoze ukayisohora ni iyihe?
MUKU: yitwaga Njye ndatuje.
IGIHE: Ni iki gituma muri iyi minsi tutabona ibihangano byawe bishya? Ese waba warahagaritse umuziki?
MUKU: Burya (...)

Iyo wumvise indirimbo nka Gloria, Murekatete n’izindi ziherekejwe n’ijwi rirongotse uhita utekerza kuri Alain Bernard Mukuralinda, Umuhanzi w’umunyamuziki akaba n’umunyamategeko.

Aganira n’umunyamakuru wa IGIHE yasobanuye n’ibindi byinshi bimwerekeyeho ndetse agira n’inama abahanzi bakiri bato.

IGIHE: Indirimbo ya mbere wakoze ukayisohora ni iyihe?

MUKU: yitwaga Njye ndatuje.

IGIHE: Ni iki gituma muri iyi minsi tutabona ibihangano byawe bishya? Ese waba warahagaritse umuziki?

MUKU: Burya impano ntihagarara, igumana na nyira yo; ariko muri iyi minsi hari indirimbo nyinshi nakoze ziri kuri album enye. Gusa kubera inshingano nyinshi nk’umushinjacyaha, biragoye kubifatanya kuko hari ubwo akazi kaba kenshi.

Umuntu aba agomba guhitamo, cyane ko umuziki wo mu Rwanda utari wagera ku rwego rwo gutunga umuntu wonyine. Ibyo bituma umuntu atabona akanya cyane, ariko ntibibujije ko mbonye umwanya nakwandika indirimbo hanyuma nkazashaka uko nyikora.

IGIHE: Nk’umuhanzi ubona uruhare rw’umuhanzi w’umunyarwanda mu kigega Agaciro rwaba uruhe?

MUKU: Uruhare rwe numva ari uko yagira icyo ashyira muri kiriya kigega, kandi yaba atabishoboye agakangurira abantu abasobanurira icyo kigega icyo ari cyo, akamaro kacyo no kugira icyo bashyiramo. Burya abahanzi bagira Imana, ubutumwa bwabo burihuta kandi bukagera ku bantu benshi icyarimwe mu gihe gito.

IGIHE: Ubona ute umuziki nyarwanda muri uyu mwaka?

MUKU: Umuziki wo mu Rwanda harimo ikibazo. Ubundi abahanzi hari ibyo bakwiye kubanza kwibaza; ndahangira iki? Ese ni ukugira ngo nishimishe gusa cyangwa ni ukugira ngo mbigire umurimo uzantunga? Ndahangira nde?

Ese indirimbo mpanga abanyarwanda bose bazibonamo cyangwa se ni ba bana twigana bazibonamo gusa? Ubwo akaba ari ba bana mwigana batagira amafaranga yo kugura CD, batagira amafaranga yo kujya mu gitaramo. Ntacyo byaba bimaze dore ko ari na yo mpamvu ibitaramo bihomba kuko baba barahangiye babandi batagira amafaranga.

Ubundi ni injyana z’ahandi baririmba mu kinyarwanda kandi ntiwavuga ngo uraririmba hiphop ngo ujye kurushanwa n’abanyamerika bayizanye kimwe n’uko ntawarushanwa nawe mu kinimba.

Ikindi kandi bagomba kumenya gucuranga imbonankubone. Kandi ibi bibazo byose nibamara kumenya kubyisubiza umuziki nyarwanda uzatera imbere.

IGIHE: Ubona ari iki gituma mu Rwanda hatakiba ibitaramo byinshi ahubwo ugasanga n’ibihari ari byo gushyira ku mugaragaro album gusa?

MUKU: Biriya na byo ni amafuti. Njyewe nta n’ahandi nabibonye uretse mu Rwanda. Ni gute wakora igitaramo cyo gushyira album yawe hanze abantu batayizi? Barabicurika, ubundi ukora indirimbo ukayimenyekanisha, ugakora iya kabiri n’iya gatatu, ukazikorera n’amashusho, ukayajyana kuri televiziyo, na yo ukayimenyekanisha; ukuzuza album, ugatangira kuzicuruza abantu bakazimenya. Nyuma y’umwaka cyangwa ibiri, akaba ari bwo ujya gukora igitaramo, abantu baramenye indirimbo zawe.

Igitangaje ni uko wumva ngo umuntu agiye kumurika album ye, yewe nta n’aho uramwumva. Ni yo mpamvu buri gihe bahomba kubera ko baba batangiriye mu myenda.

Icya mbere kujya muri studio ukoresha amafaranga yawe, gushyira indirimbo kuri CD, na bwo aba ari ayawe, gukodesha ibyuma; na byo ni uko wenda n’iyo bagutera inkunga baguha nka kimwe cya kabiri, warangiza ugakora igitaramo hakaza abantu 100 ugahomba kuko wagiye gucurungira abantu indirimbo batazi. Urabanza ukimenyekanisha, ibitaramo bikaza waramaze kuba icyamamare.

IGIHE: Nk’umunyamategeko, itegeko rirengera abahanzi riteye rite?

MUKU: Ubundi hari amategeko abarengera, nk’iryasohotse mu 1983 rigendanye n’umutungo ku bijyanye n’ubwenge, ari byo birebana n’abahanzi. Icyo nsaba abahanzi uko bagomba kumenya ko ari yo Bibiliya yabo, uhereye ku ngingo ya 190 kugera ku ngingo yaryo ya nyuma ya 295. Izo ngingo ni bo zireba, zisobanura igihangano icyo ari cyo, ugicuruza ute? Wigana igihangano cy’abandi ute? Biriya bavuga byo gushishura birahanwa, ariko niba wiganye indirimbo ya Sebanani ukayisubiramo ibyo si ikosa n’ibindi byinshi.

Abahanzi ubwabo nibafate itegeko ryabo barisome, ni bwo bazamenya ibyo bakora uko bikorwa ndetse n’uko bikurikiranwa iyo hagize ubyangiza.

IGIHE: Ni iki wabwira abakunzi bawe cyane cyane abasoma ikinyamakuru IGIHE?

MUKU: Icyo nababwira ni uko ibihangano bihari, n’ubwo ubungubu akazi ari kenshi, ariko akanya kabonetse ibihangano bishya bazabibona, ibitaramo bizakorwa, kandi ntanashoboye kubikora nzafasha n’abandi ku buryo mu mpera z’uyu mwaka bazabona ibikorwa nzagenda nkora byo gufasha abandi bijyanye cyane cyane no gucuranga imbonankubone.

IGIHE: Murakoze cyane

MUKU: Murakoze namwe

Mu ndirimbo za Alain Mukukralinda zizwi cyane ni Gloria, Murekatete n’izindi.

Uwo ari we

Alain Bernard Mukuralinda yavutse mu 1970 muri Nyarugenge ariko afite inkomoka mu ntara y’Amajyaruguru mu karere ka Rulindo.

Yize amashuri abanza muri APE Rugunga, ayisumbuye ayiga i Rwamagana muri St Aloys ayarangiza mu 1990, hanyuma Kaminuza ayigira mu gihugu cy’u Bubiligi mu mategeko.

Yatangiye kuririmba kuva akiri umwana muri korali yabaga kuri Paruwasi Mutagatifu Mikayeri ariko mu 1991 yakoze indirimbo ya mbere ayikoreye muri Studio y’Impala, hanyuma akomereza umuziki we mu Bubiligi kuko ariho yakomereje amashuri. Arubatse, afite umugore n’abana babiri.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza