MTN irahuza abahanzi basezeye muri Salax Awards n’Ikirezi Group

MTN irahuza abahanzi basezeye muri Salax Awards n’Ikirezi Group


Yanditswe kuya 22-01-2013 - Saa 15:22' na Vénuste Kamanzi

MTN yateguteye inama kuri uyu wa kabiri iza guhuza abahanzi batangaje ko basabye gukurwa ku rutonde rw’abahanzi bahatanira ibihembo bya Salax Awards 2012 n’ubuyobozi bw’Ikirezi Group bubitegura.

Ubusanzwe MTN ni yo muterankunga mukuru wa Salax Awards, bikaba bivugwa ko itashimishijwe no kuba bamwe mu bahanzi bivugwa ko bikuye muri Salax Awards harimo Jay Polly na Uncle Austin kandi ari abambasaderi bayo, bikaba bisa nko gusuzugura igikorwa yateye inkunga.

Uncle Austin yatubwiye ko atazi neza niba MTN iribuze kubasaba gusubiramo ku ngufu.

Twamubajije niba yaranditse asaba gusezera nk’uko babisabwe n’Ikirezi avuga ko atarabikora, ariko bidasobanuye ko agiye kwisubiraho, ati “Ndahura nabo nk’abantu, kuko ndi ambasaderi wa MTN kandi ngomba kwitabira inama zose intumiyemo ariko ibyo ndibubasabe nta kintu nabivugaho kuko ibyifuzo byanjye sibyo byakora mu Kirezi.”

Emma Claudine Ntirenganya, Umuyobozi wa Ikirezi Group, yatubwiye ko iyi nama ari umwanya mwiza babonye wo kongera gusobanurira aba bahanzi icyo Salax aricyo, akamaro ibafitiye n’ako ifitiye umuziki nyarwanda; kuko ngo bigaragara ko bashobora kuba batabisobanukiwe neza bibafashe gufata umwanzuro.

Gusa ngo Ikirezi yiteguye guhura n’aba bahanzi ndetse no kugirana nabo ibiganiro kuko ubusanzwe ntacyo bapfa.

Mugabe Robert, umuvugizi wa MTN, yatubwiye ko nta makuru ahagije abifiteho kuko amaze iminsi ari mu kiruhuko.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO