Umwuka mubi hagati ya Bruce Melody n’abaraperi bo mu Rwanda

Umwuka mubi hagati ya Bruce Melody n’abaraperi bo mu Rwanda


Yanditswe kuya 22-11-2012 - Saa 14:20' na Vénuste Kamanzi

Indirimbo zimaze kuba esheshatu umuhanzi Bruce Melody yaririmbyemo nyamara ntagaragare mu mashusho ya zo; Bruce Melody akavuga ko biterwa n’Abaraperi bakorana batagira gahunda, Abaraperi bamwe bo bakavuga ko biterwa n’uko abiyemeraho.

Mu kiganiro IGIHE yagiranye na Black B., Rudahusha na POG Bin Cell bagize itsinda rya Hood Rapperz baherutse gusohora indirimbo bari bakoranye na Bruce Melody bise “Isi najemo”, badutangarije ko bashatse gufata amashusho y’iyo ndirimbo bwa mbere akababwira ko ari muri Primus Guma Guma ataboneka, nyuma habonetse umwanya abasaba ko bamugurira imyenda kugira ngo azemo.

POG Bin Cell ati”yashakaga kutwakiraho(ko tumugira umusirimu), ni ubwiyemezi amaze kumva ko hari aho ageze, niyo yakwisubiraho nta gahunda yo kuyisubiramo dufite kuko ahubwo kuba atarayigaragayemo ninabwo yabaye nziza.”

Bruce Melody we yatangarije IGIHE ko ibyo kuvuga ko yasabye Hood Rapperz imyenda ari ugusebanya, ashimangira ko atajya yanga kugaragara mu mashusho y’indirimbo aba yaririmbyemo bimuturutseho.

Ati “Abaraperi…ba nyira zo nta gahunda bagira, usanga duhana gahunda bakazica, nko mu ndirimbo Igifu ya Amag yaransabye ngo mbanze nishyure kugira ngo ngaragare mu mashusho yayo kandi nararirimbyemo chorus(inyikirizo).”

Bruce Melody yemeza ko ashobora kutazagaragara no mu ndirimbo ya “Hisha mu nda” yakoranye na Jay Polly, kuko ngo ashobora kuba yafata imyanzuro yo kutazongera gukorana n’abaraperi bo mu Rwanda kuko ngo barimo kumwicira isura, abakunzi be bakaba bamufata nk’umwiyemezi.

Amag the Black nawe bakoranye indirimbo bise “Igifu”, ahakana ko yatse amafaranga Melody ngo akunde ku mushyira mu mashusho yayo.
Ati “Ni ibihuha Mister (musore)nonese na Marshall Mampa yaramwishyuje n’abandi bamuciye amafaranga? Ibyo ntibibaho, wakwishyuza umuntu mwaririmbanye?”

Akomeza avuga ko byatewe n’uko icyo gihe yigize umuntu ufite gahunda nyinshi, utabone kandi yari ataranamenyekana mu muziki kandi icyo gihe nta na telefone yari afite ngo babe bamuhamagara, bituma afata umwanzuro wo kuyisohora, kuko igikuru byari ubutumwa buri muri iyo ndirimbo. Akavuga ko na Bruce Melody ubwe ashobora gukora indirimbo ntayigaragaremo, agashyiramo andi mashusho atambutsa ubutumwa ashaka kuvuga.

Ati “Bruce Melody aragoranye cyane, yigira muntu utaboneka, hari n’abanga kumushyira mu mashusho y’indirimbo zabo babishaka, no muri Kigali Ngari ntazabonekamo. ariko njye nta kibazo binteye ninongera no kumukenera nzamubwira.”

Izindi ndirimbo Bruce Melody yaririmbyemo ntagaragare mu mashusho yazo hari nka Zanyumiyeho ya Marshall Mampa na Fireman na “Inzira” y’umuraperi ukiri muto Benzo, we watangaje ko byamubabaje cyane kuba Mellody ataragaragayemo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO