Fespaco: Filime ya Joël Karekezi yegukanye igihembo nyamukuru

Yanditswe na Uwiduhaye Theos
Kuya 3 Werurwe 2019 saa 08:46
Yasuwe :
0 0

Filime yitwa ‘Mercy of The Jungle’ yayobowe na Joël Karekezi uri mu bahanga mu ruganda rwa sinema mu Rwanda, yegukanye ibihembo bibiri mu iserukiramuco nyafurika rya sinema ribera i Ouagadougou muri Burkina Faso birimo n’igihembo nyamukuru cyitwa ‘l’Étalon de Yennenga’.

FESPACO yari imaze icyumweru iri kubera muri Burkina Faso, yabaye hagati yo ku wa 23 Gashyantare kugeza ku wa 02 Werurwe 2019.

Filime ya Joël Karekezi yahawe n’ikindi gihembo cy’iyahize izindi mu cyiciro cy’iz’abagabo.

Joël Karekezi ahabwa igihembo nyamukuru cya l’Étalon de Yennenga, yafatanyije na Perezida w’u Rwanda Paul Kagame kucyakira.

Iri serukiramuco ryitwa Festival Panafricain du cinéma et de la télévision de Ouagadougou (FESPACO). Ryari riri kuba ku nshuro yaryo ya 26 hanizihizwa isabukuru y’imyaka 50 rimaze ritangiye. Riba rimwe mu myaka ibiri.

Muri iri serukiramuco herekaniwemo filime zitandukanye zirimo iz’abanyarwanda nka ‘Icyasha’ ya Dusabejambo Marie Clementine, ‘Inanga’ ya Jean Claude Uwiringiyimana ndetse na ‘Mercy of The Jungle’ ya Joël Karekezi.

Habaye ibiganiro ku cyakomeza guteza imbere sinema nyafurika, risozwa no gutanga ibihembo ku babaye indashyikirwa mu byiciro bitandukanye.

Igikorwa cyo gusoza iri serukiramuco cyari cyitabiriye n’abanyacyubahiro batandukanye barimo Perezida Paul Kagame; Perezida wa Burkina Faso, Roch Marc Christian Kaboré n’umufasha we Sika Kaboré, Perezida wa Mali, Ibrahim Boubacar Keïta n’umufasha we Keïta Aminata Maïga na Jerry John Rawlings wigeze kuba Perezida wa Ghana.

Iki gihembo nyamukuru cya l’Étalon de Yennenga Joël Karekezi, gifite agaciro ka 10 000 000 CFA angana na 15 218 912 Frw, yagishyikijwe na Perezida wa Repubulika y’u Rwanda Paul Kagame wageze muri Burkina Faso agiye gusoza iri serukiramuco.

Filime ya Joel Karekezi yari iherutse kwegukana ibihembo bibiri muri Festival du Cinema Africain de Khouribga muri Maroc.

Filime “The Mercy of the Jungle”, irimo Nirere Shanel ikubiyemo inkuru ishushanya urugendo rw’umusirikare w’u Rwanda [ukina yitwa Xavier] watsinze urugamba nyuma akisanga mu ishyamba ryo muri Congo Kinshasa mu gice cyari cyuzuyemo abanzi.

Imara iminota 90, yanditswe na Casey Schroen, Joel Karekezi ndetse na Aurélien Bodinaux. Ifatwa ry’amashusho n’imirimo yo kuyitunganya byayobowe na Joel Karekezi.

Irimo abakinnyi nka Marc Zinga, Stéphane Bak, Ibrahim Ahmed Pino , Nirere Shanel , Kantarama Gahigiri n’abandi batandukanye.

Mu mashusho: Uko ibirori byo gusoza iri serukiramuco byagenze

Perezida Kagame ari mu bashyikirije Joel Karekezi igihembo
Joel Karekezi akimara kwegukana iki gihembo abanyarwanda bitabiriye iri serukiramuco bahise bazamura ibendera ry'igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza