Filime ya John Wick yaciye kuri Avengers yari imaze ibyumweru bitatu iyoboye

Yanditswe na Muvunyi Arsène
Kuya 21 Gicurasi 2019 saa 09:52
Yasuwe :
0 0

Filime ya “John Wick: Chapter3 — Parabellum” yakuye ku ntebe y’icyubahiro “Avengers: Endgame” yari imaze ibyumweru bitatu ikunzwe cyane muri Amerika y’Amajyaruguru.

Mu mpera z’icyumweru gishize nibwo iyi filime yerekanywe bwa mbere yinjiza akayabo ka miliyoni 57$. Yahise ikuba inshuro ebyiri ayinjijwe herekanwa bwa mbere igice cya kabiri nacyo cyari cyakubye kabiri icya mbere cyerekanywe mu 2014.

Abagabo nibo barebye cyane iyi filime ku kigero cya 63% ndetse abenshi mu bayirebye barayishimye cyane bayiha inota rya A+ ibigaragaza ko ishobora kuzakora ibitangaza mu byumweru bikurikiraho.

Ibarura ryakozwe na Comscore ryagaragaje ko 70% bemeje ko bazabwira inshuti zabo kureba John Wick: Chapter3 — Parabellum naho 21% bakemeza bazongera kuyireba.

Ku rwego mpuzamahanga ukuyemo Amerika iyi filime yinjije miliyoni $35,2 mu bice 66 bitandukanye.

“Avengers:Endgame” yahise ijya ku mwanya wa kabiri mu cyumweru cyayo cya kane aho yinjije miliyoni 29,4$.

Avengers imaze kwinjiza miliyoni 771$ muri Amerika ikurikiye “Star Wars: The Force Awakens” yinjije miliyoni 937$. Ku rwego mpuzamahanga yinjije miliyari 2,6$ ikaba ikurikiye “Avatar” yinjije miliyari 2,8$.

"Pokémon Detective Pikachu" imaze ibyumweru bibiri nayo iracyahagaze neza aho yinjiije miliyoni 24,8 $ ariko John Wick yayigabanyirije umurego.

Filime ya Amblin Entertainment na Reliance Entertainment “A Dog’s Journey” iri ku mwanya wa kane aho yinjiye miliyoni 8 $. Iyi filime ishamikiye kuri “A Dog’s Purpose” yerekanywe bwa mbere mu 2017 ariko abakunzi bayo bagabanutseho ½ ugereranyije n’iya mbere yinjije miliyoni 18,2$ mu cyumweru kimwe.

Muri rusange impera z’icyumweru gishize zaranzwe n’ubwitabire buke bw’abareba filime aho bagabanutseho 31% no muri uyu mwaka bakaba baragabanutseho 9%.

Abasesenguzi mu by’isoko rya sinema bahamya ko ibi ari akaruhuko k’iminsi mike kuko mu gihe gito kiri imbere ibyumba bya sinema bishobora kuzuzura abantu bareba filime zikomeye nka “Rocketman”, “Aladdin”, na “Godzilla: King Of The Monsters”.

Urutonde rwa filime zarebwe cyane muri Amerika na Canada mu mpera z’icyumweru gishize zikinjiza agatubutse

1."John Wick: Chapter 3 — Parabellum," miliyoni 57$
2."Avengers: Engame," miliyoni 29.4 $
3."Pokémon Detective Pikachu," miliyoni 24.8 $
4."A Dog’s Journey," miliyoni 8 $
5."The Hustle," miliyoni 6.1 $
6."The Intruder," miliyoni 4 $
7."Long Shot," miliyoni 3.4 $
8."The Sun Is Also a Star," miliyoni 2.6 $
9."Poms," miliyoni 2.1 $
10."Uglydolls," miliyoni 1.6 $

Izarebwe cyane ku ruhando mpuzamahanga ukuyemo Amerika na Canada

1. "Pokémon Detective Pikachu," miliyoni 53.8 $.
2. "Avengers: Endgame," miliyoni 46.8 $.
3. "John Wick: Chapter 3 — Parabellum," miliyoni 35.2 $
4. "A Dog’s Journey," miliyoni 13.9 $.
5. "The Hustle," miliyoni 9.5 $.
6. "The Gangster, The Cop, The Devil," miliyoni 9.4 $.
7. "Capernaum," miliyoni 3.5 $.
8. "Miss & Mrs. Cops," miliyoni 3.1 $
9. "Uglydolls," miliyoni 3.1 $.
10. "Twin," miliyoni 2.9 $.

Igice cya gatatu cya John Wick ni filimi ikunzwe cyane muri iki gihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza